ସେୟାର ବଜାରରେ ହ୍ରାସ, ନିବେଶକଙ୍କ କ୍ଷତି ୬ ଲକ୍ଷ କୋଟି

ମୁମ୍ବାଇ: ଭାରତୀୟ ଷ୍ଟକ ବଜାରରେ ହ୍ରାସ ଧାରା ଥମିବାର କୌଣସି ସଙ୍କେତ ଦେଖାଯାଉନାହିଁ । ୧୨ ନଭେମ୍ବର ୨୦୨୪, ମଙ୍ଗଳବାର ବ୍ୟବସାୟ ଅଧିବେଶନରେ ଭାରତୀୟ ବଜାର ସକାଳେ ବୃଦ୍ଧି ସହିତ ଖୋଲିଥିଲା। ତେବେ ଦିନର କାରବାର ସମୟରେ ବ୍ୟାଙ୍କିଙ୍ଗ, ଏଫଏମସିଜି, ଅଟୋ ଏବଂ ଶକ୍ତି କ୍ଷେତ୍ରର ଷ୍ଟକଗୁଡ଼ିକରେ ପ୍ରବଳ ବିକ୍ରି ଚାପ ଯୋଗୁଁ ବଜାର ପୁଣି ଥରେ ହ୍ରାସ ପାଇଥିଲା। ସେନ୍ସେକ୍ସ ୭୯,୦୦୦ ପଏଣ୍ଟ ତଳକୁ ଖସିଥିବା ବେଳେ ନିଫ୍ଟି ୨୪,୦୦୦ ପଏଣ୍ଟତଳକୁ ଖସିଆସିଛି। ଆଜିର କାରବାର ଶେଷ ବେଳକୁ ବିଏସ୍ଇ ସେନ୍ସେକ୍ସ ୮୨୧ ପଏଣ୍ଟ ହ୍ରାସ ପାଇ ୭୮,୬୭୫ ରେ ପହଞ୍ଚିଥିବା ବେଳେ ଏନ୍ଏସ୍ଇ ନିଫ୍ଟି ୨୫୭ ପଏଣ୍ଟ ହ୍ରାସ ପାଇ ୨୩,୮୮୩ ପଏଣ୍ଟରେ ବନ୍ଦ ହୋଇଛି।

ବଜାରରେ ଦ୍ରୁତ ହ୍ରାସ ଯୋଗୁଁ ନିବେଶକମାନେ ଯଥେଷ୍ଟ କ୍ଷତି ସହିଛନ୍ତି। ବିଏସଇରେ ତାଲିକାଭୁକ୍ତ ଷ୍ଟକଗୁଡ଼ିକର ବଜାର ପୁଞ୍ଜି ୪.୩୬ ଲକ୍ଷ କୋଟି ଟଙ୍କାକୁ ହ୍ରାସ ପାଇଛି, ଯାହା ପୂର୍ବ କାରବାର ଅଧିବେଶନରେ ୪.୪୨ ଲକ୍ଷ କୋଟି ଟଙ୍କା ଥିଲା। ଅର୍ଥାତ୍ ଆଜିର ଅଧିବେଶନରେ ନିବେଶକମାନେ ୫.୯୫ ଲକ୍ଷ କୋଟି ଟଙ୍କାର କ୍ଷତି ସହିଛନ୍ତି।