'ଗାଙ୍ଗୁଲି, ଶାହାଙ୍କୁ ଟିକେ ମିଠା ଦହି ଖାଇବାକୁ ଦେବ': ମମତା ବାନାର୍ଜୀ

କୋଲକାତା: ବିସିସିଆଇର ଅଧ୍ୟକ୍ଷ ତଥା ପ୍ରିନ୍ସ ଅଫ କୋଲକାତା ନାମରେ ଜଣାଶୁଣା ସୌରଭ ଗାଙ୍ଗୁଲିଙ୍କ ବାସଭବନରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଆଜି ରାତିରେ ଭୋଜନ କରିବେ। ସୌରଭ ଗାଙ୍ଗୁଲିଙ୍କ ଘରେ ଶାହାଙ୍କ ଭୋଜନକୁ ନେଇ ପଶ୍ଚିମବଙ୍ଗ ରାଜନୀତିରେ ଜୋରଦାର ଚର୍ଚ୍ଚା ହୋଇଛି | ଶାହା ଗାଙ୍ଗୁଲିଙ୍କ ଘରେ ପହଞ୍ଚିବାର କିଛି ସମୟ ପୂର୍ବରୁ ବିସିସିଆଇ ଅଧ୍ୟକ୍ଷ ଗାଙ୍ଗୁଲି କହିଛନ୍ତି ଯେ ଗୃହମନ୍ତ୍ରୀଙ୍କ ଖାଇବା ପାଇଁ ସେ ଶାକାହାରୀ ଖାଦ୍ୟ ପ୍ରସ୍ତୁତ କରିଛନ୍ତି। ଗାଙ୍ଗୁଲି କହିଛନ୍ତି ଯେ ଗୃହମନ୍ତ୍ରୀ ରାତ୍ରି ଭୋଜନ ପାଇଁ ତାଙ୍କ ନିମନ୍ତ୍ରଣ ଗ୍ରହଣ କରିଛନ୍ତି ଏବଂ ସେମାନେ ଏକାଠି ରାତ୍ରି ଭୋଜନ କରିବେ।

ଗାଙ୍ଗୁଲି ବିସିସିଆଇର ଅଧ୍ୟକ୍ଷ ଥିବାବେଳେ ଅମିତ ଶାହାଙ୍କ ପୁଅ ଜୟ ଶାହା ବିସିସିଆଇର ସମ୍ପାଦକ ଅଛନ୍ତି । ଗାଙ୍ଗୁଲି କହିଛନ୍ତି ଯେ ସେ ଶାହାଙ୍କୁ ୨୦୦୮ ମସିହାରୁ ଜାଣିଛନ୍ତି। ତେବେ ଏହି ଭୋଜନ ପର୍ବକୁ ନେଇ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଚିହିଁକି ଉଠିଛନ୍ତି | ସେ କହିଛନ୍ତି ଯେ ପଶ୍ଚିମବଙ୍ଗରେ ଅତିଥିମାନଙ୍କୁ ଭବ୍ୟ ସ୍ୱାଗତ କରିବାର ଆମର ପରମ୍ପରା ଅଛି। ମୁଁ ସୌରଭ ଗାଙ୍ଗୁଲିଙ୍କୁ କହିବାକୁ ଚାହେଁ ଯେ ଯେମିତି ବି ହେଲେ ଶାହାଙ୍କୁ ମିଠା ଦହି ଖାଇବାକୁ ଦେବେ | ତେବେ ଏହି ଭେଟଘାଟକୁ ନେଇ ରାଜନୀତି ଚର୍ଚ୍ଚା ମଧ୍ୟ ଜୋର ଧରିଛି |

ବିଜେପି ସୂତ୍ରରୁ ପ୍ରକାଶ ଯେ ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ସୌରଭ ଗାଙ୍ଗୁଲି ବିଜେପିରେ ଯୋଗ ଦେଇଥାନ୍ତେ | କିନ୍ତୁ ହୃଦଘାତ ପରେ ସେ ବିଶ୍ରାମ ନେବାକୁ ପସନ୍ଦ କରିଥିଲେ | ଗାଙ୍ଗୁଲି ଭାରତୀୟ କ୍ରିକେଟ୍ ଦଳର ସବୁଠାରୁ ସଫଳ ଅଧିନାୟକ ହୋଇଥିବାବେଳେ ପଶ୍ଚିମବଙ୍ଗରେ ତାଙ୍କର ଅନେକ ପ୍ରଶଂସକ ଅଛନ୍ତି | ସେ କୋଲକାତାର ପ୍ରିନ୍ସ ଭାବରେ ମଧ୍ୟ ଜଣାଶୁଣା | ଏଭଳି ପରିସ୍ଥିତିରେ ଗାଙ୍ଗୁଲିଙ୍କୁ ନେଇ ବିଜେପି ମମତା ବାନାର୍ଜୀଙ୍କ ଦୁର୍ଗରେ ପ୍ରବେଶ କରିବାକୁ ଚାହୁଁଛି ଏବଂ ଲୋକସଭା ନିର୍ବାଚନରେ ​​ମଧ୍ୟ ନେତୃତ୍ୱ ନେବାକୁ ଚାହୁଁଛି।