ଶରଣ ଦେବାକୁ ରାଜି ହେଉନି ବ୍ରିଟେନ, ଭାରତରେ ଆଉ କିଛି ଦିନ ରହିବେ ଶେଖ ହସିନା

ନୂଆଦିଲ୍ଲୀ: ବିଦ୍ରୋହ ପରେ ବାଂଲାଦେଶରେ ହିଂସା ଓ ଅଶାନ୍ତି ଜାରି ରହିଛି। ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେବା ପରେ ଶେଖ୍ ହସିନା ଭାରତରେ ପହଞ୍ଚିଛନ୍ତି। ସେ ବର୍ତ୍ତମାନ ୟୁପିର ହିଣ୍ଡନ ଏୟାରବେସର ଗେଷ୍ଟ ହାଉସରେ ରହୁଛନ୍ତି । ସେମାନଙ୍କୁ କଡ଼ା ସୁରକ୍ଷା ବଳୟ ମଧ୍ୟରେ ରଖାଯାଇଛି। ସେ କିଛି ଦିନ ଭାରତରେ ରହିପାରନ୍ତି ବୋଲି ସୂତ୍ରରୁ ପ୍ରକାଶ। ତେବେ ହିଣ୍ଡନ ଏୟାରବେସରୁ ସେ ବାହାରକୁ ଆସିବେ ନାହିଁ । ହିଣ୍ଡନ ଏୟାରବେସରେ ଥିବା ଗେଷ୍ଟ ହାଉସରେ ଶେଖ ହସିନା ରହିବାର ବ୍ୟବସ୍ଥା କରାଯାଇଛି । ଶେଖ ହସିନାଙ୍କ ସହ କିଛି ସମ୍ପର୍କୀୟ ଲଣ୍ଡନ ଅଭିମୁଖେ ଯାତ୍ରା କରିଛନ୍ତି। ପୂର୍ବତନ ପ୍ରଧାନମନ୍ତ୍ରୀ ହସିନା କୁଆଡ଼େ ଯିବେ, ସେ ନିଜେ ନିଷ୍ପତ୍ତି ନେବେ।

ଅନ୍ୟପକ୍ଷରେ ମିଳିଥିବା ସୂଚନା ଅନୁସାରେ ଶେଖ ହସିନାଙ୍କୁ ଆଶ୍ରୟ ଦେବା ସମ୍ପର୍କରେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନି ବ୍ରିଟେନ । ତେବେ ବ୍ରିଟିଶ ବୈଦେଶିକ ସଚିବ ଡେଭିଡ୍ ଲାମି ମଧ୍ୟ ବାଂଲାଦେଶର ସ୍ଥିତିକୁ ନେଇ ଏକ ବୟାନ ଦେଇଛନ୍ତି। ସେ କହିଛନ୍ତି ଯେ ଗତ କିଛି ସପ୍ତାହ ମଧ୍ୟରେ ବାଂଲାଦେଶରେ ବ୍ୟାପକ ହିଂସାକାଣ୍ଡ ଘଟିଛି ଏବଂ ଧନଜୀବନ ହାନି ହୋଇଛି। ମିଳିତ ଜାତିସଂଘ ନେତୃତ୍ୱରେ ସେଠାକାର ଲୋକମାନେ ଏହି ଘଟଣାର ସମ୍ପୂର୍ଣ୍ଣ ଏବଂ ସ୍ୱାଧୀନ ତଦନ୍ତ ପାଇଁ ଯୋଗ୍ୟ।