କେସିଆରଙ୍କ ପାଇଁ ରାଜନୀତି ସର୍କସ ଭଳି: କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ

ହାଇଦ୍ରାବାଦ : ଆଜି ପ୍ରୋଟକଲ ଭାଙ୍ଗିଛନ୍ତି ତେଲେଙ୍ଗାନା ମୁଖ୍ୟମନ୍ତ୍ରୀ କେ.ଚନ୍ଦ୍ରଶେଖର ରାଓ । ହାଇଦ୍ରାବାଦ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସ୍ବାଗତ କରିବାକୁ ସେ ଏୟାରପୋର୍ଟ ନଯାଇ ନିଜର ଜଣେ ମନ୍ତ୍ରୀଙ୍କୁ ପଠାଇଦେଇଥିଲେ । ଆଉ ଏହାକୁ ନେଇ କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ କଡା ନିନ୍ଦା କରିଛନ୍ତି। ସେ କହିଛନ୍ତି ଯେ କେସିଆର କୌଣସି ବ୍ୟକ୍ତିବିଶେଷଙ୍କୁ ନୁହେଁ ବରଂ ଏକ ଅନୁଷ୍ଠାନକୁ ଅପମାନିତ କରିଛନ୍ତି । ସ୍ମୃତି ଇରାନୀ କହିଛନ୍ତି ଯେ ସେ ସମ୍ବିଧାନକୁ ପରିହାସ କରିଛନ୍ତି। ସୂଚନାଯୋଗ୍ୟ, ଆଜି ପ୍ରଧାନମନ୍ତ୍ରୀ ମୋଦି ହାଇଦ୍ରାବାଦରେ ପହଞ୍ଚି ବିଜେପି ଜାତୀୟ କାର୍ଯ୍ୟକାରିଣୀ ବୈଠକରେ ଭାଗ ନେଇଛନ୍ତି।

ପ୍ରୋଟୋକଲ ଅନୁଯାୟୀ, ମୁଖ୍ୟମନ୍ତ୍ରୀ ତାଙ୍କୁ ଗ୍ରହଣ କରିବାକୁ ଯାଇଥାନ୍ତେ, କିନ୍ତୁ କେସିଆର ତାହା କରିନଥିଲେ ଏବଂ କେବଳ ତାଙ୍କର ଜଣେ ମନ୍ତ୍ରୀଙ୍କୁ ପ୍ରଧାନମନ୍ତ୍ରୀ ଗ୍ରହଣ କରିବାକୁ ପଠାଇଥିଲେ। ଅନ୍ୟପଟେ କିନ୍ତୁ ମୁଖ୍ୟମନ୍ତ୍ରୀ କେସିଆର ତାଙ୍କ ସମସ୍ତ ମନ୍ତ୍ରୀଙ୍କ ସହ ହାଇଦ୍ରାବାଦ ବିମାନବନ୍ଦରରେ ପହଞ୍ଚି ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ ଯଶୱନ୍ତ ସିହ୍ନାଙ୍କୁ ସ୍ୱାଗତ କରିଥିଲେ। ଏହାପୂର୍ବରୁ ସ୍ମୃତି ଇରାନୀ ବିଜେପିର ଜାତୀୟ କାର୍ଯ୍ୟକାରିଣୀ ବୈଠକ ବାବଦରେ ସମ୍ପୂର୍ଣ୍ଣ ବିବରଣୀ ଦେଇଥିଲେ |

ସେ କହିଥିଲେ ଯେ ପଶ୍ଚିମବଙ୍ଗ, କେରଳ, ଜମ୍ମୁକଶ୍ମୀରରେ ମୃତ୍ୟୁ ହୋଇଥିବା ଦଳର କର୍ମୀଙ୍କୁ ବିଜେପିର ଜାତୀୟ ଅଧ୍ୟକ୍ଷ ଜେପି ନଡ୍ଡା ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ସେ କହିଛନ୍ତି ଯେ ଆମ ସରକାର ଗତ ଆଠ ବର୍ଷ ମଧ୍ୟରେ ମହିଳା ଏବଂ ଯୁବକଙ୍କ ଉନ୍ନତି ପାଇଁ କାର୍ଯ୍ୟ କରିଛନ୍ତି। ଏହା ବ୍ୟତୀତ ସେ ଜନ ଧନ ଯୋଜନା ବିଷୟରେ ମଧ୍ୟ ଉଲ୍ଲେଖ କରିଛନ୍ତି, ଯାହା ମାଧ୍ୟମରେ ଦେଶର ୪୫ କୋଟି ଲୋକ ଆର୍ଥିକ ସହାୟତା ପାଇଛନ୍ତି।