ମାଡ୍ରାସ ହାଇକୋର୍ଟର ଅଧିକାରିକ ଭାଷା ହେଉ ତାମିଲ, ପ୍ରଧାନମନ୍ତ୍ରୀ ଓ ସୁପ୍ରିମକୋର୍ଟର ମୁଖ୍ୟ ବିଚାରପତିଙ୍କୁ ଚିଠି ଲେଖିଲେ ତାମିଲନାଡୁ ମୁଖ୍ୟମନ୍ତ୍ରୀ

ଚେନ୍ନାଇ: ମାଡ୍ରାସ ହାଇକୋର୍ଟର ଅଧିକାରିକ ଭାଷା ହେଉ ତାମିଲ | କିଛି ଏଭଳି ଦାବି ନେଇ ଆଜି ପ୍ରଧାନମନ୍ତ୍ରୀ ଓ ସୁପ୍ରିମକୋର୍ଟର ମୁଖ୍ୟ ବିଚାରପତିଙ୍କୁ ଚିଠି ଲେଖିଛନ୍ତି ତାମିଲନାଡୁ ମୁଖ୍ୟମନ୍ତ୍ରୀ | ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଗୁରୁବାର ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସୁପ୍ରିମକୋର୍ଟର ପ୍ରଧାନ ବିଚାରପତି ଏନ.ଭି ରମନାଙ୍କୁ ଏକ ଚିଠି ଲେଖିଛନ୍ତି। ମୁଖ୍ୟମନ୍ତ୍ରୀ ଷ୍ଟାଲିନଙ୍କର ପ୍ରଥମ ଦାବି ହେଉଛି ତାମିଲ ଭାଷାକୁ ମାଡ୍ରାସ ହାଇକୋର୍ଟର ସରକାରୀ ଭାଷା ଭାବରେ ଘୋଷଣା କରାଯିବା ଉଚିତ୍। ଷ୍ଟାଲିନ ଯୁକ୍ତି କରିଛନ୍ତି ଯେ ରାଜସ୍ଥାନ, ମଧ୍ୟପ୍ରଦେଶ, ବିହାର ଏବଂ ଉତ୍ତରପ୍ରଦେଶର ହାଇକୋର୍ଟରେ ଇଂରାଜୀ ସହିତ ହିନ୍ଦୀ ହେଉଛି ସରକାରୀ ଭାବେ ସ୍ବୀକୃତ ଭାଷା। ତେଣୁ ହାଇକୋର୍ଟର ସରକାରୀ ଭାଷା ଭାବରେ ଇଂରାଜୀ ସହିତ ଅନ୍ୟାନ୍ୟ ରାଜ୍ୟର ସରକାରୀ ଭାଷାକୁ ରଖିବାରେ ଅସୁବିଧା ନାହିଁ |

ଷ୍ଟାଲିନ ଲେଖିଛନ୍ତି ଆଇନ ଏବଂ ନ୍ୟାୟକୁ ସାଧାରଣ ଲୋକଙ୍କ ନିକଟରେ ପହଞ୍ଚାଇବା ଏବଂ କୋର୍ଟର କାର୍ଯ୍ୟକୁ ବୁଝାଇବା ପାଇଁ ନ୍ୟାୟିକ ବ୍ୟବସ୍ଥାରେ କିଛି ପରିବର୍ତ୍ତନ କରାଯିବା ଆବଶ୍ୟକ। ସୂଚନାଯୋଗ୍ୟ, ଷ୍ଟାଲିନଙ୍କ ଏହି ଚିଠି ଏମିତି ଏକ ସମୟରେ ଆସିଛି ଯେତେବେଳେ ପ୍ରଧାନ ବିଚାରପତି ତଥା କେନ୍ଦ୍ର ଆଇନ ମନ୍ତ୍ରୀ କିରେନ ରିଜିଜୁଙ୍କ ଉପସ୍ଥିତିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଥିଲେ ଯେ କୋର୍ଟରେ ସ୍ଥାନୀୟ ଭାଷାରେ ଶୁଣାଣି ହେବା ଉଚିତ। ଯାହାଦ୍ୱାରା ସ୍ଥାନୀୟ ଲୋକ ଅଦାଲତର ପ୍ରକ୍ରିୟା ଏବଂ ଏହା କିପରି କାର୍ଯ୍ୟ କରେ ସେ ସମ୍ବନ୍ଧରେ ସହଜରେ ବୁଝିପାରିବେ |

କୋର୍ଟରେ ସ୍ଥାନୀୟ ଭାଷାକୁ ପ୍ରୋତ୍ସାହିତ କରିବା ଉଚିତ ବୋଲି ପ୍ରଧାନମନ୍ତ୍ରୀ ମୋଦୀ କହିଥିଲେ। ଏହା ବ୍ୟତୀତ ଷ୍ଟାଲିନ ସୁପ୍ରିମକୋର୍ଟର ଏକ ଆଞ୍ଚଳିକ ବେଞ୍ଚ ପ୍ରତିଷ୍ଠା କରିବାକୁ ଦାବି କରିଛନ୍ତି | ସମ୍ବିଧାନର ଧାରା ୩୨ କୁ ଉଲ୍ଲେଖ କରି ଷ୍ଟାଲିନ ଲେଖିଛନ୍ତି ଯେ ସମ୍ବିଧାନର ଧାରା ୩୨ ରେ କୁହାଯାଇଛି ଯେ ଦେଶର ସମସ୍ତ ଲୋକ, ଧନୀ କିମ୍ବା ଗରିବ, ଦେଶର ସର୍ବୋଚ୍ଚ ନ୍ୟାୟାଳୟରେ ପହଞ୍ଚିବା ଉଚିତ୍ | ସେ କହିଛନ୍ତି ଯେ ଭୌଗଳିକ ଦୃଷ୍ଟିରୁ ନୂଆଦିଲ୍ଲୀଠାରୁ ଦୂରରେ ଥିବାରୁ ଦକ୍ଷିଣ ଭାରତର ଲୋକମାନେ ସୁପ୍ରିମକୋର୍ଟରେ ପହଞ୍ଚିପାରନ୍ତି ନାହିଁ |