ଉତ୍ତରାଖଣ୍ଡ ଲୋକସେବା ଆୟୋଗରେ ସଂସ୍କାର ଦାବିରେ ପ୍ରାର୍ଥୀଙ୍କ ହିଂସାତ୍ମକ ବିକ୍ଷୋଭ, ଲାଠି ଚଳାଇଲା ପୁଲିସ୍

ଡେରାଡୁନ: ଉତ୍ତରାଖଣ୍ଡ ଲୋକସେବା ଆୟୋଗରେ ସଂସ୍କାର ଦାବିରେ ଉତ୍ତରାଖଣ୍ଡରେ ଆରମ୍ଭ ହୋଇଥିବା ଆନ୍ଦୋଳନ ତୀବ୍ର ହେବାରେ ଲାଗିଛି। ଗୁରୁବାର ଡେରାଡୁନରେ ବିକ୍ଷୋଭ ପ୍ରଦର୍ଶନ କରୁଥିବା ବେକାର ଯୁବକମାନେ ପୁଲିସ ସହ ମୁହାଁମୁହିଁ ହୋଇଥିଲେ। ବେରୋଜଗାର ଯୁବକମାନେ ବିକ୍ଷୋଭ ପ୍ରଦର୍ଶନ କରିବା ସହ ସ୍ଲୋଗାନ ଦେଇଥିଲେ। କେତେକ ଭିଡିଓରେ ଗାନ୍ଧି ପାର୍କ ନିକଟରେ ବିକ୍ଷୋଭ ପ୍ରଦର୍ଶନ କରୁଥିବା ଯୁବକମାନେ ପୁଲିସ ଉପରକୁ ପଥର ମାଡ଼ କରୁଥିବା ଦେଖିବାକୁ ମିଳିଛି ।

ଖାଲି ସେତିକି ନୁହେଁ, ସରକାରୀ ଚାକିରିରେ ନିଯୁକ୍ତିରେ ଅନିୟମିତତା ଅଭିଯୋଗର ସିବିଆଇ ତଦନ୍ତ ଦାବିକରି ବିକ୍ଷୋଭକାରୀମାନେ ଅନେକ ପୁଲିସ ଗାଡ଼ି ଭଙ୍ଗାରୁଜା କରିଛନ୍ତି। ସେହିପରି ଆଇନଶୃଙ୍ଖଳା ରକ୍ଷା ପାଇଁ ଗାନ୍ଧୀ ପାର୍କ ନିକଟରେ ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଛି ।

ନିଯୁକ୍ତିରେ ଜାଲିଆତି ହେଉଛି ବୋଲି ଯୁବକମାନେ ଅଭିଯୋଗ କରିଛନ୍ତି। ପ୍ରତିଯୋଗିତାମୂଳକ ପରୀକ୍ଷା ଦେଉଥିବା ଛାତ୍ରଛାତ୍ରୀଙ୍କ ମତରେ ରାଜ୍ୟ ସରକାର ପ୍ରଥମେ ନକଲି ନିରୋଧୀ ଆଇନ ପ୍ରଣୟନ କରନ୍ତୁ। ଏହାପରେ କାହାକୁ ନିଯୁକ୍ତି ଦେବା ଦରକାର। ନିଯୁକ୍ତିରେ ଅନିୟମିତତାର ସିବିଆଇ ତଦନ୍ତ ଦାବିରେ ବିକ୍ଷୋଭ ପ୍ରଦର୍ଶନ କରୁଥିବା ବେଳେ ଅନେକ ବିକ୍ଷୋଭକାରୀଙ୍କୁ ପୁଲିସ ଅଟକ ରଖିଛି। ଘଟଣା ବଢ଼ୁଥିବା ଦେଖି ରାଜ୍ୟ ସରକାରଙ୍କ ମନ୍ତ୍ରୀମାନେ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ। ସେ ଉତ୍ତ୍ୟକ୍ତ ଯୁବକଙ୍କୁ ବୁଝାଇବାକୁ ଚେଷ୍ଟା କରିଥିଲେ।