ଛୋଟବଡ଼ ସହର ଓ ଗ୍ରାମାଞ୍ଚଳର ଛାତ୍ରଛାତ୍ରୀ ନବୋଦ୍ଭାବନ ଓ ଉଦ୍ୟମିତାର ପଥ ଆପଣାଉଛନ୍ତି: ଧର୍ମେନ୍ଦ୍ର ପ୍ରଧାନ

ନୂଆଦିଲ୍ଲୀ: ଗୁଗ୍‌ଲ ଓ ଇଣ୍ଡିଆନ୍ ଏକ୍ସପ୍ରେସ୍ ଦ୍ବାରା ନୂଆଦିଲ୍ଲୀଠାରେ ଆୟୋଜିତ ଭାରତୀୟ ଶିକ୍ଷା ସମ୍ମିଳନୀ ୨୦୨୨ରେ ଉଦ୍‌ବୋଧନ ଦେଇ କେନ୍ଦ୍ର ଶିକ୍ଷା ଓ କୌଶଳ ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ ଯେ, ଭାରତକୁ ଜ୍ଞାନମୂଳକ ଅର୍ଥନୀତିରେ ପରିଣତ କରିବା ତଥା ଦେଶର ପ୍ରତ୍ୟେକ କୋଣ-ଅନୁକୋଣରେ ଯୁବବର୍ଗଙ୍କଠାରେ ନବୋଦ୍ଭାବନର ଭାବନାକୁ ପୁଷ୍ଟ କରିବା ପାଇଁ ଆମକୁ ପ୍ରତି ଭାରତୀୟଙ୍କ ପାଖରେ ଶିକ୍ଷା ଓ କୌଶଳ ପହଞ୍ଚାଇବାକୁ ପଡ଼ିବ।
ପରୀକ୍ଷା ପେ ଚର୍ଚ୍ଚା ୨୦୨୨ ସମୟରେ ଛାତ୍ରଛାତ୍ରୀଙ୍କ ନବୋଦ୍ଭାବନ ପ୍ରତି ଆଗ୍ରହ ଦେଖି ସେ ଖୁସି ହୋଇଥିଲେ ବୋଲି ମନ୍ତ୍ରୀ କହିଥିଲେ। ସେ କହିଛନ୍ତି ଯେ ଅନଲାଇନ୍ କର୍ମଶାଳା ମାଧ୍ୟମରେ ବୈଦିକ ଗଣିତକୁ ସରଳୀକରଣ କରୁଥିବା କେରଳର ଭାଇଭଉଣୀ ନନ୍ଦିନୀ ଏବଂ ନିବେଦିତା ହୁଅନ୍ତୁ କି ସେମାନଙ୍କ ପରି ଯୁବକମାନେ ଆଗାମୀ ଦଶନ୍ଧିରେ ଭାରତର ବିରାଟ ଉନ୍ନତି ସାଧନରେ ସହାୟକ ହେବେ।

ପରୀକ୍ଷା ପେ ଚର୍ଚ୍ଚା ସମୟରେ ଗରୱା, ଗ୍ବାଲିୟର, ଜାମତରା, କୋଟାୟାମ୍ ଓ ଖୋର୍ଦ୍ଧାର ଛାତ୍ରମାନଙ୍କ ଦ୍ୱାରା ପ୍ରଦର୍ଶିତ ନବୋଦ୍ଭାବନ ପାଇଁ ଉତ୍ସାହ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ସେ ଆହୁରି ମଧ୍ୟ କହିଛନ୍ତି ଯେ ଛୋଟବଡ଼ ସହର ଏବଂ ଗ୍ରାମାଞ୍ଚଳର ଛାତ୍ରଛାତ୍ରୀମାନେ ନବୋଦ୍ଭାବନ ଓ ଉଦ୍ୟମିତାର ରାସ୍ତା ବାଛୁଛନ୍ତି। ସ୍ଥାନୀୟ ଭାଷା ଏବଂ ମାତୃଭାଷାର ଗୁରୁତ୍ୱ ବିଷୟରେ ମନ୍ତ୍ରୀ ପ୍ରଧାନ କହିଛନ୍ତି ଯେ ଗୁରୁତ୍ବପୂର୍ଣ୍ଣ ଚିନ୍ତାଧାରାର ବିକାଶ ପାଇଁ ସ୍ଥାନୀୟ ଭାଷା ଶିଖିବା ମଧ୍ୟ ଜରୁରୀ ଯାହା ଜାତୀୟ ଶିକ୍ଷା ନୀତିର ଏକ ପ୍ରମୁଖ କ୍ଷେତ୍ର। ଭାରତର ବିକାଶ ଯାତ୍ରା ପାଇଁ ଆସନ୍ତା ୨୫ ବର୍ଷ ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି ମନ୍ତ୍ରୀ ପ୍ରଧାନ କହିଥିଲେ।