ନୂଆ ମୋଡ଼ ନେଉଛି ଏନ୍‌ସିପି ନେତାଙ୍କ ବୋହୂ ମୃତ୍ୟୁ ମାମଲା: ଚକିତ କଲା ବ୍ୟବଚ୍ଛେଦ ରିପୋର୍ଟ

ନୂଆଦିଲ୍ଳୀ: ନ୍ୟାସନାଲିଷ୍ଟ କଂଗ୍ରେସ ପାର୍ଟି (ଏନସିପି) ନେତା ରାଜେନ୍ଦ୍ର ତୁକାରାମ ହାଗାୱାନେଙ୍କ ୨୪ ବର୍ଷୀୟା ବୋହୂ ତାଙ୍କ ଘରୁ ଝୁଲନ୍ତା ଅବସ୍ଥାରେ ଉଦ୍ଧାର ହୋଇଛନ୍ତି। ତେବେ ଏହା ଏକ ଆତ୍ମହତ୍ୟା ମାମଲା କି ହତ୍ୟା; ତାହାକୁ ନେଇ କଳ୍ପନାଜଳ୍ପନା ଆରମ୍ଭ ହୋଇଛି। 

ପ୍ରଥମେ ମହିଳାଙ୍କ ମୃତ୍ୟୁ ଏକ ଆତ୍ମହତ୍ୟା ମାମଲା ବୋଲି ଜଣାପଡ଼ୁଥିଲେ ମଧ୍ୟ, ମୃତକଙ୍କ ବେକରେ ଶାରୀରିକ ଆଘାତ ଚିହ୍ନ ଥିବାରୁ ତଦନ୍ତକାରୀମାନଙ୍କ ମନରେ ‌ଏବେ ସନ୍ଦେହ ଉପୁଜିଛି। 

ପୀଡ଼ିତା ବୈଷ୍ଣବୀ ଶଶାଙ୍କ ହାଗାୱାନେ ତାଙ୍କ ଶ୍ୱଶୁର ଘରେ ଝୁଲନ୍ତା ଅବସ୍ଥାରେ ମିଳିବା ପରେ ଶଶୁରଘର ଲୋକ ଦାବି କରିଥିଲେ ଯେ ତାଙ୍କର ମୃତ୍ୟୁ ଆତ୍ମହତ୍ୟା ଦ୍ୱାରା ହୋଇଛି। ମାତ୍ର ତାଙ୍କ ଶରୀରରେ  ଚିହ୍ନ ଦେଖିବା ପରେ ପୀଡ଼ିତାଙ୍କ ପରିବାର ସଦସ୍ୟ ସନ୍ଦେହ କରିଥିଲେ ଏବଂ ବ୍ୟବଚ୍ଛେଦ ପାଇଁ ଦାବି କରିଥିଲେ।

ହସ୍ପିଟାଲରୁ ମିଳିଥିବା ତଥ୍ୟ ମାମଲାକୁ ଆହୁରି ତୀବ୍ର କରିଛି। ବ୍ୟବଚ୍ଛେଦ ରିପୋର୍ଟରେ ଗଳାକାଟି ହତ୍ୟା କରାଯାଇଥିବା ସୂଚନା ରହିଛି। 

ବ୍ୟବଚ୍ଛେଦ ପରେ ପୁଲିସ ତିନି ଜଣଙ୍କୁ ଗିରଫ କରିଛି। ସେମାନେ ହେଲେ ବୈଷ୍ଣବୀଙ୍କ ସ୍ୱାମୀ ଶଶାଙ୍କ ହାଗାୱାନେ, ଶାଶୂ ଲତା ହାଗାୱାନେ ଏବଂ ନଣନ୍ଦ କରିସ୍କା ହାଗାୱାନେ। ସନ୍ଦିଗ୍ଧଙ୍କୁ ସ୍ଥାନୀୟ କୋର୍ଟରେ ହାଜର କରାଯାଇଥିଲା। ସେମାନଙ୍କୁ ମେ ୨୧ ପର୍ଯ୍ୟନ୍ତ ପୁଲିସ ହେପାଜତକୁ ପଠାଯାଇଥିଲା। ବୈଷ୍ଣବୀଙ୍କ ଶ୍ୱଶୁର ରାଜେନ୍ଦ୍ର ହାଗାୱାନେ ତାଙ୍କ ପୁଅ ସୁଶୀଲ ହାଗାୱାନେଙ୍କ ସହିତ ଫେରାର ଅଛନ୍ତି।