ଟି-୨୦ ବିଶ୍ବକପ ୨୦୨୪: ସେମିଫାଇନାଲ୍ ଟାଇ ହେଲେ ଅବା ବର୍ଷା ଯୋଗୁ ମ୍ୟାଚ୍ ଶେଷ ନ ହେଲେ କେଉଁ ଦଳ ଫାଇନାଲ୍ ଖେଳିବେ? କ’ଣ ରହିଛି ନିୟମ...

କୋଲକାତା: ଅଧିକାଂଶ ଦେଶ ଟି-୨୦ ବିଶ୍ୱକପ ପାଇଁ ନିଜ ଦଳ ଘୋଷଣା କରି ସାରିଛନ୍ତି। ଆଇପିଏଲ ପରେ ଦଳମାନେ ବିଶ୍ୱକପ ପାଇଁ ଆମେରିକା ଯିବେ। ଜୁନ୍ ୨ ରୁ ଟି-୨୦ ବିଶ୍ୱକପ୍ ଖେଳାଯିବ। ଏଥର ବିଶ୍ୱକପ ପାଇଁ ୨୦ଟି ଦଳ ରହିଛନ୍ତି। ଦଳ ଗୁଡ଼ିକ ଏ,ବି,ସି,ଡି ୪ଟି ଗ୍ରୁପ୍‌ରେ ବିଭକ୍ତ ହୋଇଛନ୍ତି। ବିଶ୍ୱକପରେ ୫୫ଟି ମ୍ୟାଚ୍ ଖେଳାଯିବ। ପ୍ରଥମେ ଏକ ଗ୍ରୁପ୍ ପର୍ଯ୍ୟାୟ ହେବ। ଯେଉଁଥିରୁ ଆଠଟି ଦଳ ସୁପର-୮ ପର୍ଯ୍ୟାୟକୁ ଉନ୍ନୀତ ହେବେ। ଏହା ପରେ ୪ ଟି ଦଳ ମଧ୍ୟରେ ସେମିଫାଇନାଲ ଏବଂ ତା’ପରେ ୨ ଟିମ ମଧ୍ୟରେ ଫାଇନାଲ ହେବ।

କାରିବିୟାନ୍ ଦେଶରେ ଜୁନ୍ ମାସରେ ଗରମ ଏବଂ ବର୍ଷା ହେବାର ସମ୍ଭାବନା ମଧ୍ୟ ଅଛି । ଏଭଳି ପରିସ୍ଥିତିରେ ସେମିଫାଇନାଲରେ ବର୍ଷା ହୋଇପାରେ। ପ୍ରଥମ ସେମିଫାଇନାଲ ପାଇଁ ଏକ ରିଜର୍ଭ ଦିବସ ରଖାଯାଇଛି ଏବଂ ଦ୍ୱିତୀୟ ସେମିଫାଇନାଲ ପାଇଁ ୨୫୦ ମିନିଟ ଅତିରିକ୍ତ ସମୟ ରଖାଯାଇଛି। ଯଦି ସେମିଫାଇନାଲ୍ ସମୟରେ ବର୍ଷା ହୁଏ ତେବେ କେଉଁ ଦଳ ଫାଇନାଲ୍ ଖେଳିବେ? ଏଥିପାଇଁ ଏକ ନିୟମ ରହିଛି।

ନିୟମ ଅନୁଯାୟୀ ଯଦି ସେମିଫାଇନାଲ ଟାଇ ହୁଏ ତେବେ ଦଳମାନଙ୍କୁ ସୁପର ଓଭର ଖେଳିବାକୁ ପଡ଼ିବ। ସେହିପରି ବର୍ଷା ଯୋଗୁ ମ୍ୟାଚ୍ ବାତିଲ୍ ହେଲେ ଦ୍ୱିତୀୟ ରାଉଣ୍ଡ ଗ୍ରୁପରେ ପ୍ରଥମ ସ୍ଥାନ ହାସଲ କରିଥିବା ଦଳ ଫାଇନାଲକୁ ଉନ୍ନୀତ ହେବ। ଅର୍ଥାତ୍ ସୁପର-୮ ସମୟରେ, ଯେଉଁ ଦଳ ରାଉଣ୍ଡ ଗ୍ରୁପରେ ନିଜ ଗ୍ରୁପ୍ ଶୀର୍ଷରେ ରହିଥିବ, ସେହି ଦଳ ଫାଇନାଲ୍ ଖେଳିବ।

ଟିମ୍ ଇଣ୍ଡିଆ ଆୟର୍ଲାଣ୍ଡ ବିପକ୍ଷରେ ପ୍ରଥମ ମ୍ୟାଚ୍ ଖେଳିବ। ଭାରତୀୟ ଦଳ ଏହି ମ୍ୟାଚ୍ ଜୁନ୍ ୩ରେ ଖେଳିବ। ଏହା ପରେ ଭାରତ ଏବଂ ପାକିସ୍ତାନ ମଧ୍ୟରେ ବହୁ ପ୍ରତୀକ୍ଷିତ ମ୍ୟାଚ୍ ଜୁନ୍ ୯ରେ ଅନୁଷ୍ଠିତ ହେବ। ଟିମ୍ ଇଣ୍ଡିଆର ପରବର୍ତ୍ତୀ ଦୁଇଟି ମ୍ୟାଚ୍ ଜୁନ୍ ୧୨ ରେ ଆମେରିକା ଏବଂ ଜୁନ୍ ୧୫ ରେ କାନାଡା ବିପକ୍ଷରେ ହେବ।