ତହବୁର ରାଣାକୁ ପଚରାଉଚରା: ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣ ସମ୍ପର୍କରେ ଆଶ୍ଚର୍ଯ୍ୟଜନକ ଖୁଲାସା

ନୂଆଦିଲ୍ଲୀ: ୨୬/୧୧ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣାକୁ ଏନ୍‌ଆଇଏ ପଚରାଉଚରା କରୁଛି। ଏଥିରୁ ଡେଭିଡ୍ କୋଲମ୍ୟାନ୍ ହେଡଲି ସହ ରାଣାର ସାକ୍ଷାତ୍ ଏବଂ ମୁମ୍ବାଇରେ ଆକ୍ରମଣରେ ତା’ର ସମ୍ପୃକ୍ତି ସମେତ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି। ମୁମ୍ବାଇ ନିକଟ ଆରବ ସାଗରରେ ଉଚ୍ଚ ଜୁଆର ଯୋଗୁଁ ଆକ୍ରମଣ ପାଇଁ ଧାର୍ଯ୍ୟ ତାରିଖକୁ ଏକ ସମୟରେ ଘୁଞ୍ଚାଇବାକୁ ପଡ଼ିଥିଲା। ପାକିସ୍ତାନ ୨୬/୧୧ ଅଭିଯାନ ଆରମ୍ଭ କରିବା ପୂର୍ବରୁ ଲସ୍କର-ଏ-ତୋଇବା ଓ ତହବୁର ରାଣା ସହ ଗୁଇନ୍ଦା ଏଜେନ୍ସି ଆଇଏସ୍‌ଆଇ ସମୁଦ୍ର ସ୍ଥିତିରେ ସୁଧାର ଆସିବା ପର୍ଯ୍ୟନ୍ତ ଅପେକ୍ଷା କରିବାକୁ ନିଷ୍ପତ୍ତି ନେଇଥିଲା। ଆକ୍ରମଣ ପୂର୍ବରୁ ଏକ କଥାବାର୍ତ୍ତାରେ ଡେଭିଡ୍ କୋଲମ୍ୟାନ୍ ହେଡଲି ରାଣାକୁ ଜଣାଇଥିଲା ଯେ ସମୁଦ୍ର ଅଶାନ୍ତ ଥିବାରୁ ମିସନ ବିଳମ୍ବିତ ହୋଇଛି।

ତହବୁର ରାଣା ମୁମ୍ବାଇ ଆକ୍ରମଣ ଯୋଜନା ବିଷୟରେ ସମ୍ପୂର୍ଣ୍ଣ ଅବଗତ ଥିଲା। ତା’ ପାଖରେ ଜାକି-ଉର-ରେହମାନ ଲଖଭି, ହାଫିଜ ସୟିଦ, ମକ୍କି ଓ ଅନ୍ୟାନ୍ୟ ଷଡ୍‌ଯନ୍ତ୍ରକାରୀଙ୍କ ଭଳି ପ୍ରମୁଖ ଆତଙ୍କବାଦୀଙ୍କ ସହ ସମାନ ତଥ୍ୟ ଥିଲା। ୨୬/୧୧ ଷଡ୍‌ଯନ୍ତ୍ରର ବିସ୍ତୃତ ଦିଗ ରାଣାକୁ କ୍ରମାଗତ ଅବଗତ କରାଯାଉଥିଲା ବୋଲି ଆମେରିକୀୟ ତଦନ୍ତକାରୀ କର୍ତ୍ତୃପକ୍ଷ ନିଶ୍ଚିତ କରିଛନ୍ତି। ୨୦୦୮ ଏପ୍ରିଲ ଶେଷ ଭାଗରେ ହେଡଲି ପ୍ରାୟ ୬ ସପ୍ତାହ ରହଣି ପାଇଁ ଆମେରିକା ଗସ୍ତ କରିଥିଲା। ମେ ମାସ ଶେଷରେ ସେ ସିକାଗୋରେ ରାଣା ସହ ସାକ୍ଷାତ୍ କରିଥିଲା। ଏହି ସମୟରେ ହେଡଲି ଜଣାଇଥିଲା ଯେ ପ୍ରତିକୂଳ ସମୁଦ୍ର ପରିବେଶ କାରଣରୁ ଆକ୍ରମଣକୁ ସ୍ଥଗିତ ରଖାଯାଇଛି। ଯଦିଓ ହେଡଲି ୨୦୦୮ ମେ ମାସରେ ସିକାଗୋରେ ସାକ୍ଷାତ୍ ସମୟରେ ରାଣାକୁ ଏହି ଗୁରୁତ୍ୱପୂର୍ଣ୍ଣ ଯୋଜନା ବିଷୟରେ ଜଣାଇଥିଲା, କିନ୍ତୁ ପରେ ରାଣା ଆମେରିକାର ତଦନ୍ତକାରୀମାନଙ୍କୁ ବିଭ୍ରାନ୍ତ କରି କହିଥିଲା ଯେ ୨୬/୧୧ ଆକ୍ରମଣ ବିଷୟରେ ତା’ର କୌଣସି ପୂର୍ବ ଜ୍ଞାନ ନ ଥିଲା। ୨୬/୧୧ ମୁମ୍ବାଇ ଆକ୍ରମଣ ପଛରେ ଥିବା ଷଡ଼୍‌ଯନ୍ତ୍ରର ପ୍ରତିଟି ବିବରଣୀ ଯେପରି ପଦାକୁ ଆସିବ ସେଥିପାଇଁ ଜାତୀୟ ତଦନ୍ତକାରୀ ଏଜେନ୍ସି (ଏନ୍‌ଆଇଏ) ତହବୁର ରାଣାକୁ ଲଗାତାର ପଚରାଉଚରା ଜାରି ରଖିଛି।