ଛାତ୍ରଙ୍କୁ ମାଡ଼ ମାରି ନିଲମ୍ବିତ ହେଲେ ଶିକ୍ଷକ, ଅଟକ ରଖିଲା ପୁଲିସ୍‌

ଅହମ୍ମଦାବାଦ: ଅହମ୍ମଦାବାଦର ଜଣେ ସ୍କୁଲ ଶିକ୍ଷକ ଜଣେ ଛାତ୍ରକୁ ତାଙ୍କ ସହପାଠୀଙ୍କ ସାମ୍ନାରେ ନିର୍ଦ୍ଦୟ ଭାବରେ ମାଡ ମାରିବାର ଭିଡିଓ ଭାଇରାଲ ହୋଇଛି। ଭିଡିଓ ଭାଇରାଲ୍‌ ହେବା ପରେ ଶିକ୍ଷକଙ୍କୁ ଏବେ ପୁଲିସ୍‌ ଅଟକ ରଖିଛି।

ଭାଟଭାସ୍ଥିତ ମାଧବ ପବ୍ଲିକ୍ ସ୍କୁଲରେ ଗଣିତ ଶିକ୍ଷକ ଥିବା ଅଭିଷେକ ପଟେଲଙ୍କୁ ଉକ୍ତ ଛାତ୍ରଙ୍କ ଉପରେ ହାତ ଉଠାଇଥିବା କାରଣରୁ ନିଲମ୍ବିତ ମଧ୍ୟ କରାଯାଇଛି। 

ପଟେଲ ଛାତ୍ରଙ୍କ ବାହୁକୁ ମୋଡ଼ି କରି, ତାଙ୍କ କେଶକୁ ମାଡ଼ ମାରିଥିବା ଭିଡିଓରେ ଦେଖିବାକୁ ମିଳିଥିଲା। ଶିକ୍ଷକ ଛାତ୍ର ଜଣକୁ ମାରୁଥିବାର ଭିଡିଓ ସିସିଟିଭି ଫୁଟେଜରେ ଦେଖିବାକୁ ମିଳିଛି। ଶିକ୍ଷକ ତାଙ୍କର  ନାବାଳକ ଛାତ୍ରଙ୍କୁ ପ୍ରାୟ ବାର ଥର ଚାପୁଡ଼ା ମାରି ତଳେ ଠେଲି ଦେଇଥିବା ଦେଖିବାକୁ ମିଳିଛି।

ଭିଡିଓ ଭାଇରାଲ ହେବା ପରେ ଜିଲ୍ଲା ଶିକ୍ଷା ଅଧିକାରୀ ବିଦ୍ୟାଳୟର ପ୍ରଧାନଶିକ୍ଷକଙ୍କୁ ନୋଟିସ ଜାରି କରି ଶିକ୍ଷକଙ୍କୁ ନିଲମ୍ବନ କରିବାକୁ ନିର୍ଦ୍ଦେଶ ଦେଇଛନ୍ତି। ପଟେଲଙ୍କୁ ଭାଟଭା ପୁଲିସ ଗିରଫ କରି ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ବୋଲି ସୂଚନା ଦେଇଛି।

ଭାରତରେ ଶାରୀରିକ ଦଣ୍ଡ ବେଆଇନ। କିନ୍ତୁ ପିଲାମାନଙ୍କୁ ଅନୁଶାସନ କରିବା ପାଇଁ ଆଜି ବି ଦେଶର ଶିକ୍ଷକମାନେ ବହୁଳ ଭାବରେ ଛାତ୍ରମାନଙ୍କୁ ଶାରୀରିକ ନିର୍ଯାତନା ଦେଉଛନ୍ତି। 

ଉଲ୍ଲେଖ‌ଯୋଗ୍ୟ, ୨୦୦୦ ମସିହାରେ ସୁପ୍ରିମକୋର୍ଟ ସମସ୍ତ ଶିକ୍ଷାନୁଷ୍ଠାନରେ ଶାରୀରିକ ଦଣ୍ଡର ବ୍ୟବହାର ଉପରେ ପ୍ରତିବନ୍ଧକ ଲଗାଇଥିଲେ।