ଯାନ୍ତ୍ରିକ ତ୍ରୁଟି ଯୋଗୁଁ ଫେରିଆସିଲା ଦିଲ୍ଲୀ-ଭିଏତନାମ୍ ଏୟାର ଇଣ୍ଡିଆ ଫ୍ଲାଇଟ୍

ନୂଆଦିଲ୍ଲୀ: ପୁଣି ଥରେ ଚର୍ଚ୍ଚାକୁ ଆସିଛି ଏୟାର ଇଣ୍ଡିଆ। ଦିଲ୍ଲୀରୁ ଭିଏତନାମ ଯାଉଥିବା ଏୟାର ଇଣ୍ଡିଆର ବିମାନ ଏଆଇ-୩୮୮କୁ ଯାନ୍ତ୍ରିକ ତ୍ରୁଟି ଯୋଗୁଁ ଉଡ଼ାଣର ଗୋଟିଏ ଘଣ୍ଟା ମଧ୍ୟରେ ଦିଲ୍ଲୀକୁ ଫେରିଆସିଛି। ବିମାନଟିକୁ ନିରାପଦରେ ଦିଲ୍ଲୀ ବିମାନବନ୍ଦରରେ ଅବତରଣ କରାଯାଇଥିଲା। ଏହି ଘଟଣା ପୁଣି ଥରେ ଏୟାର ଇଣ୍ଡିଆର ଅନ୍ତର୍ଜାତୀୟ ବିମାନ ଉଡ଼ାଣ ଉପରେ ଗମ୍ଭୀର ପ୍ରଶ୍ନ ଉଠାଇଛି।

ଦିଲ୍ଲୀ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଆରମ୍ଭ କରିବା ପରେ ଏୟାର ଇଣ୍ଡିଆର ବିମାନ ଏଆଇ-୩୮୮ ଦୀର୍ଘ ସମୟ ପର୍ଯ୍ୟନ୍ତ ଦିଲ୍ଲୀ ବିମାନବନ୍ଦରର ପରିଧିରେ ଘୂରି ବୁଲିଥିଲା। କୌଣସି ବଡ଼ ଯାନ୍ତ୍ରିକ ତ୍ରୁଟି ଆଶଙ୍କା କରି ପାଇଲଟ୍ ପରବର୍ତ୍ତୀ ଉଡ଼ାଣ ବାତିଲ କରି ଦିଲ୍ଲୀ ବିମାନବନ୍ଦରରେ ପୁନର୍ବାର ଅବତରଣ କରିଥିଲେ। ତେବେ ଏୟାର ଇଣ୍ଡିଆର ଏହି ବିମାନଟି ବୋଇଂ ନିର୍ମିତ ବିମାନ ନଥିଲା, ଏହା ଏକ ଏୟାରବସ ବିମାନ ଥିଲା, ଅର୍ଥାତ୍ ସେହି ୟୁରୋପୀୟ କମ୍ପାନୀର ଯାହାର ବିମାନଗୁଡ଼ିକ ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଏବଂ ସୁରକ୍ଷା ପାଇଁ ଜଣାଶୁଣା।