ଲୋକସଭାରେ ହମାସ ପ୍ରଶ୍ନର ଉତ୍ତର ଦେବା ପ୍ରସଙ୍ଗ: ଅଭିଯୋଗକୁ ଅସ୍ବୀକାର କଲେ ଲେଖୀ

ନୂଆଦିଲ୍ଲୀ: ବୈଦେଶିକ ବ୍ୟାପାର ମନ୍ତ୍ରଣାଳୟ ଶନିବାର ସ୍ପଷ୍ଟ କରିଛି ଯେ ରାଷ୍ଟ୍ରମନ୍ତ୍ରୀ ଭି ମୁରଲୀଧରନଙ୍କୁ ସଂସଦୀୟ ପ୍ରଶ୍ନର ଉତ୍ତରରେ ସରକାରୀ ଭାବେ ତାଲିକାଭୁକ୍ତ କରାଯିବା ଉଚିତ ଥିଲା ଏବଂ ରାଷ୍ଟ୍ରମନ୍ତ୍ରୀ ମୀନାକ୍ଷୀ ଲେଖୀ କହିଛନ୍ତି ଯେ ସରକାରୀ ୱେବସାଇଟରେ ପୋଷ୍ଟ କରାଯାଇଥିବା ଦସ୍ତାବିଜରେ ଦର୍ଶାଯାଇଥିବା ପ୍ରଶ୍ନର ଉତ୍ତର ସେ ଦେଇନାହାନ୍ତି। ହମାସକୁ ନିଷିଦ୍ଧ କରିବା ପାଇଁ ସରକାରଙ୍କ କୌଣସି ପ୍ରସ୍ତାବ ଅଛି କି ବୋଲି ପଚରାଯାଇଥିବା ପ୍ରଶ୍ନର ଉତ୍ତର ଲେଖୀ ଦେଇଥିବା ଦସ୍ତାବିଜରୁ ଜଣାପଡ଼ିବା ପରେ ସେ ଏକ୍ସରେ ଏକ ପୋଷ୍ଟରେ କହିଛନ୍ତି ଯେ ସେ ଏହି ପ୍ରଶ୍ନ ଏବଂ ଏହି ଉତ୍ତର ସହିତ କୌଣସି କାଗଜପତ୍ରରେ ସ୍ୱାକ୍ଷର କରିନାହାନ୍ତି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚୀ ଅନେକ ଘଣ୍ଟା ପରେ ସ୍ପଷ୍ଟ କରିଛନ୍ତି ଯେ କାଗଜପତ୍ରରେ ବୈଷୟିକ ସଂଶୋଧନ ଆବଶ୍ୟକ। ତେବେ କେମିତି ତ୍ରୁଟି ଘଟିଲା ସେ ସମ୍ପର୍କରେ ସେ ବିସ୍ତୃତ ବିବରଣୀ ଦେଇ ନାହାନ୍ତି।

ସୂଚନାଯୋଗ୍ୟ, କଂଗ୍ରେସ ଦଳର ସାଂସଦ କୁମ୍ବାକୁଡି ସୁଧାକରନ ପ୍ରଶ୍ନ କରିଥିଲେ ଯେ ଗାଜାସ୍ଥିତ ହମାସକୁ ଭାରତରେ ଆତଙ୍କବାଦୀ ସଂଗଠନ ଘୋଷଣା କରିବା ପାଇଁ ସରକାରଙ୍କର କୌଣସି ପ୍ରସ୍ତାବ ଅଛି କି ନାହିଁ ଏବଂ ଇସ୍ରାଏଲ ସରକାର ଏ ସଂକ୍ରାନ୍ତରେ ଭାରତ ନିକଟରେ କୌଣସି ଦାବି କରିଛନ୍ତି କି? ସରକାରୀ ୱେବସାଇଟରେ ପୋଷ୍ଟ କରାଯାଇଥିବା ଦସ୍ତାବିଜରେ ଲିଖିତ ଉତ୍ତରରେ କୁହାଯାଇଛି ଯେ, କୌଣସି ସଂଗଠନକୁ ଆତଙ୍କବାଦୀ ଘୋଷଣା କରିବା ବେଆଇନ କାର୍ଯ୍ୟକଳାପ ନିବାରଣ ଆଇନର ଅନ୍ତର୍ଭୁକ୍ତ ଏବଂ କୌଣସି ସଂଗଠନକୁ ଆତଙ୍କବାଦୀ ଘୋଷଣା କରିବା ପାଇଁ ସମ୍ପୃକ୍ତ ସରକାରୀ ବିଭାଗ ଦ୍ୱାରା ଆଇନର ବ୍ୟବସ୍ଥା ଅନୁଯାୟୀ ନିଷ୍ପତ୍ତି ନିଆଯାଏ।