ଇନ୍ଦିରା ଗାନ୍ଧୀଙ୍କୁ ‘ଭାରତମାତା’ କହିଲେ କେନ୍ଦ୍ରମନ୍ତ୍ରୀ

ଚେନ୍ନାଇ: କେନ୍ଦ୍ରମନ୍ତ୍ରୀ ସୁରେଶ ଗୋପୀ ବୁଧବାର ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କୁ ‘ଭାରତମାତା’ ଏବଂ ସ୍ୱର୍ଗତ କଂଗ୍ରେସ ମୁଖ୍ୟମନ୍ତ୍ରୀ କେ କରୁଣାକରନଙ୍କୁ ଜଣେ ସାହସୀ ପ୍ରଶାସକ ଭାବେ ବର୍ଣ୍ଣନା କରିଛନ୍ତି। କରୁଣାକରନ ଓ ବରିଷ୍ଠ ମାର୍କ୍ସବାଦୀ ନେତା ଇକେ ନାୟନାରଙ୍କୁ ବି ଏହି ବିଜେପି ନେତା ତାଙ୍କର ‘ରାଜନୈତିକ ଗୁରୁ’ ବୋଲି କହିଛନ୍ତି। ପୁନକୁନ୍ନମ୍‌ରେ ଥିବା କରୁଣାକରନଙ୍କ ସ୍ମାରକୀ 'ମୁରଲୀ ମନ୍ଦିରମ୍' ପରିଦର୍ଶନ କରିବା ପରେ ଗୋପୀ ସାମ୍ବାଦିକମାନଙ୍କୁ ଏହା କହିଛନ୍ତି।

ସୂଚନାଯୋଗ୍ୟ, ସୁରେଶ ଗୋପୀ କରୁଣାକରନଙ୍କ ପୁଅ ତଥା କଂଗ୍ରେସ ନେତା କେ ମୁରଲୀଧରନଙ୍କ ଆଶାକୁ ଧୂଳିସାତ କରି ତ୍ରିସୁର ଲୋକସଭା ଆସନରେ ବିଜୟୀ ହୋଇଥିଲେ, ଯିଏ କି ଏପ୍ରିଲ ୨୬ ନିର୍ବାଚନରେ ତ୍ରିକୋଣୀୟ ମୁକାବିଲାରେ ତୃତୀୟ ସ୍ଥାନରେ ରହିଥିଲେ। କରୁଣାକରନ ସ୍ମାରକୀ ପରିଦର୍ଶନରୁ କୌଣସି ରାଜନୈତିକ ଅର୍ଥ ବାହାର ନ କରିବାକୁ ଗଣମାଧ୍ୟମ ପ୍ରତିନିଧିମାନଙ୍କୁ ଅନୁରୋଧ କରି ବିଜେପି ନେତା କହିଛନ୍ତି ଯେ ସେ ତାଙ୍କ ଗୁରୁଙ୍କୁ ଶ୍ରଦ୍ଧାଞ୍ଜଳି ଜଣାଇବା ପାଇଁ ଏଠାକୁ ଆସିଛନ୍ତି। ସେ ଜୁନ୍ ୧୨ ତାରିଖରେ ନାୟନାରଙ୍କ କନ୍ନୁରସ୍ଥିତ ଘରକୁ ଯାଇ ତାଙ୍କ ପରିବାର ସଦସ୍ୟଙ୍କ ସହ ସମ୍ପର୍କ ପୁନଃସ୍ଥାପନ କରିଥିଲେ।