ଏହା ଆମର ଲଢ଼େଇ ନୁହେଁ: ସିରିଆ ଗୃହଯୁଦ୍ଧ ନେଇ ଟ୍ରମ୍ପଙ୍କ ମନ୍ତବ୍ୟ

ୱାଶିଂଟନ: ସିରିଆର ଆଭ୍ୟନ୍ତରୀଣ ବିବାଦ ବୃଦ୍ଧି ପାଉଛି ଏବଂ ବିଦ୍ରୋହୀ ଗୋଷ୍ଠୀ ରାଜଧାନୀ ଦମାସକସରେ ପ୍ରବେଶ କରିଛନ୍ତି। ସିରିଆ ଗୃହଯୁଦ୍ଧ ଆମେରିକାର ନବ ନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଘୋଷଣା କରିଛନ୍ତି ଯେ ଏହା ଆମର ଲଢ଼େଇ ନୁହେଁ ଏବଂ ଆମେରିକା ଏଥିରେ ଜଡିତ ହେବା ଉଚିତ୍ ନୁହେଁ। 

ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ ସୋସିଆଲରେ ଡୋନାଲ୍ଡ ଟ୍ରମ୍ପ ଲେଖିଛନ୍ତି ଯେ, ସିରିଆରେ ସଙ୍କଟ ବଢ଼ିବାରେ ଲାଗିଛି। କିନ୍ତୁ ସିରିଆ ଆମର ବନ୍ଧୁ ନୁହେଁ। ଆମେରିକାର ଏହା ସହିତ କୌଣସି ସମ୍ପର୍କ ନାହିଁ। ଏହା ଆମର ଲଢ଼େଇ ନୁହେଁ । ଆମେ ଏଥିରେ ସାମିଲ ହେବା ଉଚିତ୍ ନୁହେଁ । ଆମେ ଏଥିରୁ ଦୂରେଇ ରହିବା ଉଚିତ୍ ।

ଟ୍ରମ୍ପ କହିଛନ୍ତି ଯେ, ବଶର-ଅଲ-ଅସଦଙ୍କ ସହଯୋଗୀ ରୁଷିଆ। କିନ୍ତୁ  ସମ୍ପ୍ରତି ରୁଷିଆ ନିଜେ ୟୁକ୍ରେନ ଯୁଦ୍ଧରେ ଜଡିତ ଅଛି। ଏଭଳି ପରିସ୍ଥିତିରେ ସିରିଆରେ କ’ଣ ଘଟୁଛି ସେ ବିଷୟରେ ଅଧିକ କିଛି କରିବା ସ୍ଥିତିରେ ରୁଷିଆ ନାହିଁ। ବହୁ ବର୍ଷ ଧରି   ସିରିଆକୁ ରୁଷିଆ ରକ୍ଷା କରୁଥିଲା। ମାତ୍ର ଏବେ ରୁଷିଆର ସ୍ଥିତି ଖରାପ ରହିଛି।

ଟ୍ରମ୍ପ ଏହା ମଧ୍ୟ ଲେଖିଛନ୍ତି ଯେ ଯଦି ରୁଷିଆ ପକ୍ଷରୁ ସିରିଆକୁ ସମର୍ଥନ ନ ମିଳିବ ତେବେ ଏହା କେବଳ ରୁଷିଆ ପାଇଁ ଲାଭଦାୟକ ହେବ କାରଣ ସେ ସିରିଆରୁ କିଛି ପାଇ ନାହିଁ।

ଯଦିଓ ଟ୍ରମ୍ପ କହିଛନ୍ତି ଯେ, ଆମେରିକା ସିରିଆ ଯୁଦ୍ଧରୁ ଦୂରେଇ ରହିବ, ତଥାପି ସିରିଆରେ ୯୦୦ ଆମେରିକୀୟ ସୈନିକ ନିୟୋଜିତ ଅଛନ୍ତି। ତାଙ୍କର ପ୍ରଥମ କାର୍ଯ୍ୟକାଳ ମଧ୍ୟରେ ମଧ୍ୟ ଟ୍ରମ୍ପ ସିରିଆରୁ ସୈନ୍ୟ ପ୍ରତ୍ୟାହାର ବିଷୟରେ କହିଥିଲେ। ଏଭଳି ପରିସ୍ଥିତିରେ ଟ୍ରମ୍ପ ପୁଣି ଥରେ କ୍ଷମତାକୁ ଆସିବା ପରେ ଏଭଳି ନିଷ୍ପତ୍ତି ନେଇପାରନ୍ତି।

ତେବେ ପ୍ରତିରକ୍ଷା ପରାମର୍ଶଦାତାଙ୍କ ଅନୁସାରେ ଆମେରିକା ଏହା କରିବା ଉଚିତ୍ ନୁହେଁ କାରଣ ଏହା ଦ୍ୱାରା ସୃଷ୍ଟି ହୋଇଥିବା ଶୂନ୍ୟସ୍ଥାନ ରୁଷିଆ ଏବଂ ଇରାନ ଦ୍ୱାରା ଦଖଲ ହୋଇପାରେ। 

ସୂଚନାଯୋଗ୍ୟ, ସିରିଆରେ ଚାଲିଥିବା ଗୃହଯୁଦ୍ଧ  ସମଗ୍ର ପଶ୍ଚିମ ଏସିଆ ଉପରେ ପ୍ରାଧାନ୍ୟ ରାଜନୀତିର ଏକ ଅଂଶ। ଇରାକ, ତୁର୍କୀ, ଜୋର୍ଡାନ, ଲେବାନନ୍ ଏବଂ ଇସ୍ରାଏଲ୍ ଭଳି ଦେଶ ସହିତ ସିରିଆର ସୀମା ରହିଛି।

ଅଧିକ ପଢ଼ନ୍ତୁ: ବିରୋଧୀଙ୍କୁ କ୍ଷମତା ହସ୍ତାନ୍ତର କରିବାକୁ ପ୍ରସ୍ତୁତ: ସିରିଆ ପ୍ରଧାନମନ୍ତ୍ରୀ

ସିରିଆ ଉପରେ ପ୍ରାଧାନ୍ୟ ଅର୍ଥ ହେଉଛି ପଶ୍ଚିମ ଏସିଆର ଗୁରୁତ୍ୱପୂର୍ଣ୍ଣ ବାଣିଜ୍ୟ ମାର୍ଗ ଏବଂ ଶକ୍ତି କରିଡରରେ ପ୍ରବେଶ। ଏହା ମାଧ୍ୟମରେ ସମଗ୍ର ପଶ୍ଚିମ ଏସିଆ ଉପରେ ଚାପ ପକାଯାଇପାରିବ। ସିରିଆରେ ବଶର ଅଲ-ଅସଦ ସରକାରଙ୍କୁ କ୍ଷମତାରୁ ହଟିବା ରୁଷିଆ ଉପରେ ସବୁଠାରୁ ଅଧିକ ପ୍ରଭାବ ପକାଇବ, କାରଣ ସିରିଆ ପଶ୍ଚିମ ଏସିଆରେ ରୁଷିଆର ସବୁଠାରୁ ନିର୍ଭରଯୋଗ୍ୟ ସହଯୋଗୀ ଥିଲା।

ବିଦ୍ରୋହୀ ଗୋଷ୍ଠୀ ପଛରେ ଆମେରିକାର ସମର୍ଥନ ରହିଛି। ସିରିଆ ଗୃହଯୁଦ୍ଧ ଯୋଗୁଁ ଅନ୍ତର୍ଜାତୀୟ ବଜାରରେ ‌ତୈଳ ଦର ବୃଦ୍ଧି ହେବାର ସମ୍ଭାବନା ରହିଛି, ଯାହା ଭାରତ ଉପରେ ମଧ୍ୟ ପ୍ରଭାବ ପକାଇବ ବୋଲି କୁହାଯାଉଛି। 

ଅଧିକ ପଢ଼ନ୍ତୁ: ଦମାସକସରେ କ୍ଷମତା ଦଖଲ ପାଇଁ ରକ୍ତାକ୍ତ ଯୁଦ୍ଧ: ଦେଶ ଛାଡିଲେ ରାଷ୍ଟ୍ରପତି