ବନ୍ଧକଙ୍କୁ ମୁକ୍ତ କରିବା ଚୁକ୍ତି ପାଇଁ ଏହା ଶେଷ ସୁଯୋଗ: ଇଜିପ୍ଟକୁ ଇସ୍ରାଏଲର ଚେତାବନୀ

ଜେରୁଜେଲମ୍: ସମ୍ପ୍ରତି ପୃଥିବୀର ଅନେକ ଦେଶ ମଧ୍ୟରେ ଯୁଦ୍ଧ ଜାରି ରହିଛି। ରୁଷିଆ-ୟୁକ୍ରେନ ଯୁଦ୍ଧର ଦୁଇ ବର୍ଷରୁ ଅଧିକ ସମୟ ବିତିଗଲାଣି । ଏଥି ସହିତ ଇରାନ ଏବଂ ଇସ୍ରାଏଲ ମଧ୍ୟରେ ମଧ୍ୟ ଯୁଦ୍ଧ ଆରମ୍ଭ ହୋଇଛି। ଦୁଇ ଶତ୍ରୁ ଦେଶ ମଧ୍ୟରେ ତିକ୍ତତା ଶିଖରରେ ପହଞ୍ଚିଛି। ସେହିପରି ହମାସ ଏବଂ ଇସ୍ରାଏଲ ଗତ ୬ମାସ ଧରି ଯୁଦ୍ଧରେ ଲିପ୍ତ ଅଛନ୍ତି।

ହମାସକୁ ଟାର୍ଗେଟ କରିବା ପାଇଁ ଦକ୍ଷିଣ ଗାଜାରେ ନିଜର ସାମରିକ ଅଭିଯାନ ଜାରି ରଖିବାକୁ ଶପଥ ନେଇଥିବା ଇସ୍ରାଏଲ୍ ରାଫା ଉପରେ ଏୟାର ଷ୍ଟ୍ରାଇକ୍ କରିଛି। ତେବେ ଗ୍ରାଉଣ୍ଡ ଆକ୍ରମଣ ଆରମ୍ଭ କରିବା ପୂର୍ବରୁ ଇସ୍ରାଏଲ ଶେଷ ସୁଯୋଗ ଦେବା ନେଇ ମନ୍ତବ୍ୟ ପ୍ରଦାନ କରିଛି। ବନ୍ଧକମାନଙ୍କୁ ମୁକ୍ତ କରିବା ପାଇଁ ଏକ ଚୁକ୍ତିରେ ପହଞ୍ଚିବା ପାଇଁ ଗାଜା ଏବଂ ଇଜିପ୍ଟ ମଧ୍ୟରେ ଚାଲିଥିବା କଥାବାର୍ତ୍ତାର ଏହା ଶେଷ ସୁଯୋଗ ବୋଲି ଇସ୍ରାଏଲ୍ ଚେତାବନୀ ଦେଇଛି।

ଏକ ରିପୋର୍ଟ ଅନୁଯାୟୀ, ଦୀର୍ଘ ଦିନର ସ୍ଥଳଯୁଦ୍ଧ ଯୋଜନା ଆରମ୍ଭ କରିବା ପୂର୍ବରୁ ଅସ୍ତ୍ରବିରତି ଚୁକ୍ତି ପାଇଁ ଏହା ଶେଷ ସୁଯୋଗ ବୋଲି ଇସ୍ରାଏଲ ଚେତାବନୀ ଦେଇଛି।

ଇସ୍ରାଏଲର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଆଲୋଚନା ବହୁତ ଭଲ ଥିଲା। ସମସ୍ତ ଆଲୋଚନା ମାନଦଣ୍ଡରେ ଅଗ୍ରଗତି ହୋଇଛି। ଇଜିପ୍ଟର ଏକ ପ୍ରତିନିଧୀ ଦଳ ସହ ଆଲୋଚନା ସମ୍ପର୍କରେ ଇସ୍ରାଏଲ୍ ଅଧିକାରୀ କହିଛନ୍ତି ରାଫାରେ ଆଗକୁ ବଢ଼ିବାକୁ ଇସ୍ରାଏଲର ବହୁତ ଗୁରୁତ୍ବପୂର୍ଣ୍ଣ ଉଦ୍ଦେଶ୍ୟ ରହିଛି। ଇଜିପ୍ଟୀୟମାନେ ହମାସ ଉପରେ ଚାପ ପକାଇବାକୁ ପ୍ରସ୍ତୁତ ଥିବା ଦେଖାଯାଉଛି।

ଅଧିକାରୀ କହିଛନ୍ତି ବର୍ତ୍ତମାନ ଇଜିପ୍ଟର ଏକ ପ୍ରତିନିଧୀ ଦଳ ଇସ୍ରାଏଲରେ ଅଛନ୍ତି। ବନ୍ଧକମାନଙ୍କୁ ମୁକ୍ତ କରିବା ଏବଂ ଗାଜାରେ ଅସ୍ତ୍ରବିରତି ଉଲ୍ଲଂଘନ ପାଇଁ ଦୀର୍ଘ ସମୟ ଧରି ଚାଲିଥିବା ଆଲୋଚନା ସହିତ ଆଗକୁ ବଢ଼ିବା ଉପରେ ଆଲୋଚନା ହେଉଛି। ଏହାର ସୀମା ନିକଟ ରାଫାରେ ହୋଇଥିବା ଆକ୍ରମଣକୁ ନେଇ ଇଜିପ୍ଟ ଚିନ୍ତିତ। ନିକଟ ଅତୀତରେ, ପ୍ରାୟ ଏକ ଲକ୍ଷ ପାଲେଷ୍ଟାଇନବାସୀ ରାଫାରୁ ପଳାୟନ କରିଛନ୍ତି।

ରିପୋର୍ଟ ଅନୁଯାୟୀ, କାତାର ଏବଂ ଇଜିପ୍ଟର ମାସେ ଧରି ବୁଝାମଣା ପରେ ମଧ୍ୟ ମୌଳିକ ଉଦ୍ଦେଶ୍ୟକୁ ନେଇ ମତଭେଦ ଯୋଗୁ ହମାସ ଏବଂ ଇସ୍ରାଏଲ ମଧ୍ୟରେ ଶାନ୍ତି ପ୍ରୟାସ ବିଫଳ ହୋଇଛି।

ଏହାପୂର୍ବରୁ ମାର୍ଚ୍ଚ ୧୫ ରେ ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ କହିଥିଲା ରାଫାରେ ଅପରେସନ୍ ପାଇଁ ସେନାର ଯୋଜନାକୁ ଅନୁମୋଦନ କରାଯାଇଛି। ତେବେ ଅପରେସନର ସମୟ ନିର୍ଦ୍ଦିଷ୍ଟ ନକରି ନେତାନ୍ୟାହୁ କହିଥିଲେ ରାଫାରେ ପ୍ରବେଶ କରିବା ଏବଂ ସେଠାରେ ଆତଙ୍କବାଦୀ ବାଟାଲିୟନ ଧ୍ୱଂସ କରିବାର ଆବଶ୍ୟକତା ରହିଛି।