ଭାରତର ପଡ଼ୋଶୀ ଦେଶରେ ବିଭାଜନ ଆଶଙ୍କା!: ଆରାକାନ୍ ସେନା ବଦଳାଇବ ଏସିଆର ମାନଚିତ୍ର

ନାପିଦ୍ବ: ମିଆଁମାରରେ ସାମରିକ ଶାସନ ବିରୋଧରେ ଲଢୁଥିବା ଆରାକାନ୍ ସେନା ସ୍ୱାଧୀନତାର ଲକ୍ଷ୍ୟ ହାସଲ କରିବାର ଅତି ନିକଟତର ହୋଇଛି। ଯାହା କିଛି ମାସ ପାଇଁ ଅସମ୍ଭବ ମନେ ହେଉଥିଲା ଏବେ ତାହା ସମ୍ଭବ ହେବାକୁ ଯାଉଛି।

ଦେଶର ରାଖାଇନ୍ ରାଜ୍ୟର ୧୮ଟି ପ୍ରଦେଶ ମଧ୍ୟରୁ ୧୫ଟି ଅରାକାନ୍ ସେନା ଦଖଲ କରିଛି। ଯଦି ସେମାନେ ସମଗ୍ର ରାଖାଇନ୍ ରାଜ୍ୟକୁ ଦଖଲ କରି ସ୍ବାଧୀନତା ଘୋଷଣା କରନ୍ତି ତେବେ ଏହା ୧୯୭୧ ମସିହାରେ ବାଂଲାଦେଶ ସୃଷ୍ଟି ହେବା ପରଠାରୁ ଏସିଆର ପ୍ରଥମ ନୂଆ ଦେଶ ଭାବେ ସୃଷ୍ଟି ହେବ। ଏହା ଦ୍ବାରା ମିଆଁମାରର ବିଭାଜନ ହେବ।

ଯଦି ମିଆଁମାରର ବିଭାଜନ ହୋଇ ନୂଆ ଦେଶ ସୃଷ୍ଟି ହୁଏ ତେବେ ଆରାକାନ୍ ସେନା  ଏସିଆର ମାନଚିତ୍ର ବଦଳାଇବାକୁ ସକ୍ଷମ ହେବ।

ୟୁନାଇଟେଡ୍ ଲିଗ୍ ଅଫ୍ ଆରାକାନ୍ (ୟୁଏଲଏ)ର ସାମରିକ ୱିଙ୍ଗ୍ ଆରାକାନ୍ ଆର୍ମି ରାଖାଇନ୍‌ର ବଡ଼ ଅଂଶ ଦଖଲ କରିଛି। ବର୍ତ୍ତମାନ କେବଳ ଭାରତୀୟ ଅନୁଦାନ ପ୍ରାପ୍ତ ସିଟ୍ଟୱେ ବନ୍ଦର ଏବଂ ଚୀନ୍‌ରୁ ସହାୟତା ପ୍ରଦାନ କରାଯାଇଥିବା ଗଭୀର ସମୁଦ୍ର ବନ୍ଦର କାୟୁକଫ୍ୟୁ ଏବଂ ମୁନ୍ନାଙ୍ଗ ସହର ମିଆଁମାରର ସାମରିକ ଶାସକ ଜୁଣ୍ଟା ନିୟନ୍ତ୍ରଣରେ ରହିଛି।

୨୦୨୪ର ଶେଷରେ, ଆରାକାନ୍ ସେନା ରାଖାଇନ୍‌ରେ ଅବସ୍ଥିତ ମିଆଁମାର ସେନାର ୱେଷ୍ଟର୍ଣ୍ଣ କମାଣ୍ଡର ମୁଖ୍ୟାଳୟ ଆନ୍ ସହରକୁ ଦଖଲ କରିଥିଲା ​। ଏହା ସହିତ ମାଓଁଗଡାକୁ ମଧ୍ୟ ଦଖଲ କରାଯାଇଥିଲା।  ଏହା ସହିତ ଆରାକାନ୍ ସେନା ବାଂଲାଦେଶ ସହିତ ସମଗ୍ର ସୀମା ଉପରେ ନିୟନ୍ତ୍ରଣ ରଖିଛି।

ଅଧିକାଂଶ ରାଖାଇନ୍ ରାଜ୍ୟକୁ ନିୟନ୍ତ୍ରଣ କରୁଥିବା ଆରାକାନ୍ ସେନା ମଧ୍ୟ ସାମରିକ ଜୁଣ୍ଟା ସହ ଆଲୋଚନା କରିବାକୁ ରାଜି ହୋଇଛି। ଏକ ବିବୃତିରେ ଏହା କୁହାଯାଇଛି ଯେ, ସାମରିକ ସମାଧାନ ପରିବର୍ତ୍ତେ ରାଜନୈତିକ ଉପାୟ ମାଧ୍ୟମରେ ବିଦ୍ୟମାନ ଆଭ୍ୟନ୍ତରୀଣ ସମସ୍ୟାର ସମାଧାନ ପାଇଁ ଆମେ ସର୍ବଦା ସହମତ ରହିଛୁ।

ୟୁଏଲଏର ବିବୃତି ବିଦେଶୀ ଦେଶ ଭାରତ ଏବଂ ଚୀନ୍‌କୁ ଆଶ୍ୱାସନା ଦେଇଛି ଯେ, ଏହା ରାଖାଇନ୍ ରାଜ୍ୟରେ ସେମାନଙ୍କ ନିବେଶକୁ ସୁରକ୍ଷା ଦେବ। ବେଜିଂର ନେତୃତ୍ୱକୁ ପ୍ରଶଂସା କରି ଏହି ବିବୃତି ଚାଇନିଜ୍ ଭାଷାରେ ପ୍ରକାଶ ପାଇଛି। ଏଥିରେ କୁହାଯାଇଛି ଯେ,ଆରାକାନ୍ ସେନା ସମସ୍ତ ବିଦେଶୀ ପୁଞ୍ଜି ନିବେଶକୁ ସ୍ୱାଗତ କରୁଛି ଏବଂ ସ୍ୱୀକୃତି ଦେଉଛି ଯାହା ଆରାକାନ୍ ପାଇଁ ଲାଭଦାୟକ ହେବ ଏବଂ ଏହାର ବିକାଶ ତଥା ପ୍ରଗତିରେ ସହାୟକ ହେବ।

ଆରାକାନ୍ ସେନାର ବରିଷ୍ଠ ନେତାମାନେ ଭାରତ ଏବଂ ଚୀନ୍‌ର ବରିଷ୍ଠ ସୁରକ୍ଷା ଅଧିକାରୀଙ୍କ ସହ ଗୁପ୍ତ ବୈଠକ ମଧ୍ୟ କରିଛନ୍ତି। ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ଯେ ଆରାକାନ୍ ସେନା ସିଟ୍ଟୱେ ଏବଂ କାୟୁକଫ୍ୟୁକୁ ଦଖଲ କରିବ ଅଥବା ଚୀନ୍ ଏବଂ ଭାରତର ପ୍ରତିକ୍ରିୟାକୁ ଅପେକ୍ଷା କରିବ। ମିଆଁମାରର ଜୁଣ୍ଟା ସେନା ବିଦ୍ରୋହୀମାନଙ୍କ ବିରୁଦ୍ଧରେ ବାୟୁସେନା ଏବଂ ନୌସେନା ବ୍ୟବହାର କରିଛି, ତଥାପି ଆରାକାନ୍ ସେନା ବିଜୟ ହାସଲ କରିଛି।

ଅଧିକ ପଢ଼ନ୍ତୁ: ଡୋଭାଲଙ୍କ ନୀତି ଭଳି ଟିଟିପି ବିରୋଧରେ ପାକିସ୍ତାନୀ ସେନାର ସର୍ଜିକାଲ୍ ଷ୍ଟ୍ରାଇକ୍

ବିଶ୍ଳେଷକମାନେ କହିଛନ୍ତି ଯେ, ଆରାକାନ୍ ସେନାର କଥାବାର୍ତ୍ତା ଏବଂ ବିଦେଶୀ ନିବେଶକଙ୍କୁ ଆଶ୍ୱାସନା ଦେବା ପ୍ରକୃତ କାରଣ ହେଉଛି ଯଦି ସ୍ବାଧୀନତା ହାସଲ ହୁଏ ତେବେ କୂଟନୈତିକ ସ୍ୱୀକୃତିର ଆଶା ଆକଳନ କରିବାକୁ ଏହି ବିବୃତି ଯୋଗୁ ସମୟ ମିଳିପାରିବ।

ଏକ ସ୍ବାଧୀନ ଦେଶ ସୃଷ୍ଟି ପାଇଁ ୟୁଏଲଏର ସ୍ୱପ୍ନ ଏସିଆ ଏବଂ ପାଶ୍ଚାତ୍ୟର ଗୁରୁତ୍ୱପୂର୍ଣ୍ଣ ଦେଶଗୁଡିକର ସ୍ୱୀକୃତି ବିନା ପୂରଣ ହୋଇପାରିବ ନାହିଁ। ମିଆଁମାର ଭାରତର ଆଖପାଖରେ ଏକ ନୂଆ ସିରିଆ ପାଲଟିବାରେ ଲାଗିଛି ବ‌ୋଲି ବିଶେଷଜ୍ଞ ମତପୋଷଣ କରିଛନ୍ତି। 

ଅଧିକ ପଢ଼ନ୍ତୁ: ଇସ୍ରାଏଲ-ତୁର୍କୀ ଯୁଦ୍ଧମୁହାଁ: ଏର୍ଦୋଗନଙ୍କ ଯୋଗୁ ପରିସ୍ଥିତି ଉତ୍ତେଜନାପୂର୍ଣ୍ଣ