‘ନିର୍ବାଚନ ପ୍ରକ୍ରିୟାରେ ସ୍ବଚ୍ଛତା ହ୍ରାସ ପାଉଛି’: ନିର୍ବାଚନୀ ନିୟମ ସଂଶୋଧନ ବିରୋଧରେ କଂଗ୍ରେସ ସୁପ୍ରିମ୍ କୋର୍ଟଙ୍କ ଦ୍ୱାରସ୍ଥ

ନୂଆଦିଲ୍ଲୀ: ନିର୍ବାଚନୀ ନିୟମ, ୧୯୬୧ରେ କେନ୍ଦ୍ର ସରକାର କରିଥିବା ସଂଶୋଧନକୁ ଚ୍ୟାଲେଞ୍ଜ କରି କଂଗ୍ରେସ ମଙ୍ଗଳବାର ସୁପ୍ରିମ୍ କୋର୍ଟରେ ଏକ ପିଟିସନ୍ ଦାଖଲ କରିଛି। ଏଥିରେ କୁହାଯାଇଛି ଯେ କେନ୍ଦ୍ର ସରକାର ଅତ୍ୟନ୍ତ ବେପରୁଆ ଭାବେ ସଂଶୋଧନ ଆଣିଥିବାରୁ ଏହାଦ୍ବାରା ମତଦାନ ପ୍ରକ୍ରିୟାର ସ୍ବଚ୍ଛତା ହ୍ରାସ ପାଉଛି। ସିସିଟିଭି କ୍ୟାମେରା ଓ ୱେବକାଷ୍ଟିଂ ଫୁଟେଜ ଭଳି କେତେକ ଇଲେକ୍ଟ୍ରୋନିକ୍ ଦସ୍ତାବିଜର ସର୍ବସାଧାରଣ ଯାଞ୍ଚ ଏବଂ ପ୍ରାର୍ଥୀଙ୍କ ଭିଡିଓ ରେକର୍ଡିଂକୁ ରୋକିବା ପାଇଁ କେନ୍ଦ୍ର ସରକାର ନିର୍ବାଚନ ନିୟମରେ ପରିବର୍ତ୍ତନ କରିବା ପରେ ଦଳ ପକ୍ଷରୁ ଏହି ପଦକ୍ଷେପ ନିଆଯାଇଛି।

ଏହି ପ୍ରସଙ୍ଗରେ କଂଗ୍ରେସ ନେତା ଜୟରାମ ରମେଶ କହିଛନ୍ତି ଯେ ନିର୍ବାଚନ ଆୟୋଗ ଏକ ସାମ୍ବିଧାନିକ ସଂସ୍ଥା ହୋଇଥିଲେ ମଧ୍ୟ ଏହାର ଗୁରୁତ୍ବକୁ ସରକାର ହ୍ରାସ କରୁଛନ୍ତି। ଅବାଧ ଓ ନିରପେକ୍ଷ ନିର୍ବାଚନ ପରିଚାଳନା କମିସନଙ୍କ ଦାୟିତ୍ବ ଥିବା ବେଳେ ଏହାକୁ ନେଇ କୌଣସି ସାଲିସ ହୋଇପାରିବ ନାହିଁ। ଏପରି ଏକ ଗୁରୁତ୍ୱପୂର୍ଣ୍ଣ ଆଇନରେ ଏକତରଫା ସଂଶୋଧନ କରିବାକୁ ଅନୁମତି ଦିଆଯାଇ ପାରିବ ନାହିଁ ବୋଲି ରମେଶ କହିଛନ୍ତି। ଜନସାଧାରଣଙ୍କ ପରାମର୍ଶ ବିନା ଏଭଳି ଏକ ଗୁରୁତ୍ୱପୂର୍ଣ୍ଣ ଆଇନକୁ ଏଭଳି ଖୋଲାଖୋଲି ଭାବେ ସଂଶୋଧନ କରାଯାଇପାରିବ ନାହିଁ। ସୁପ୍ରିମ୍ କୋର୍ଟ କେନ୍ଦ୍ର ସରକାରଙ୍କ ସଂଶୋଧନ ବ୍ୟବସ୍ଥାକୁ ଖାରଜ କରି ଏହାର ପୁନରୁଦ୍ଧାର କରିବାରେ ସହାୟକ ହେବେ ବୋଲି ସେ କହିଛନ୍ତି।

ତେବେ ସର୍ବୋଚ୍ଚ ନିର୍ବାଚନ ସଂସ୍ଥାର ସୁପାରିସ ଆଧାରରେ କେନ୍ଦ୍ର ଆଇନ ମନ୍ତ୍ରଣାଳୟ ନିର୍ବାଚନ ପରିଚାଳନା ନିୟମ, ୧୯୬୧ର ନିୟମ ୯୩(୨)(କ)ରେ ସଂଶୋଧନ ଆଣିଥିବାରୁ କଂଗ୍ରେସର ଏଭଳି ପଦକ୍ଷେପ କେବଳ ଶସ୍ତା ରାଜନୀତିର ନମୂନା ବୋଲି ବିଜେପି କହିଛି। ଇଲେକ୍‌ଟ୍ରୋନିକ ଦସ୍ତାବିଜର ଦୁରୁପଯୋଗ ରୋକିବା ପାଇଁ ଏଭଳି ସଂଶୋଧନ ଜରୁରୀ ଥିଲା ବୋଲି ପୂର୍ବରୁ କେନ୍ଦ୍ର ସରକାର ସ୍ପଷ୍ଟ କରିସାରିଛନ୍ତି।