ଯଦି ରୁଷ ଜି-୮ରେ ଥାନ୍ତା, ଯୁଦ୍ଧ ହୋଇନଥାନ୍ତା : ଟ୍ରମ୍ପ

ଓଟାଓ୍ବା : ଜି-୭ ଶିଖର ସମ୍ମିଳନୀ ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ବଡ଼ ଦାବି କରିଛନ୍ତି। ସେ କହିଛନ୍ତି ଯେ ଯଦି ରୁଷ ଜି-୮ରେ ରହିଥାନ୍ତା, ତେବେ କୌଣସି ଯୁଦ୍ଧ ହୋଇନଥାନ୍ତା। ଟ୍ରମ୍ପ ଏଥିପାଇଁ ପୂର୍ବତନ ଆମେରିକା ରାଷ୍ଟ୍ରପତି ବାରାକ ଓବାମା ଏବଂ ପୂର୍ବତନ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କୁ ଦାୟୀ କରିଛନ୍ତି।

ଟ୍ରମ୍ପ କହିଛନ୍ତି ଯେ ପୂର୍ବତନ ଆମେରିକା ରାଷ୍ଟ୍ରପତି ବାରାକ ଓବାମା ଏବଂ ପୂର୍ବତନ କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋ ରୁଷକୁ ଜି-୮ରେ ରଖିବାକୁ ଚାହୁଁ ନଥିଲେ କାରଣ ରୁଷ କ୍ରିମିଆକୁ କବଜା କରିଥିଲା। ଟ୍ରମ୍ପ କହିଛନ୍ତି, "ରୁଷକୁ ଜି-୮ରୁ ବାହାର କରିବା ଏକ ଭୁଲ ଥିଲା, କାରଣ ମୁଁ ଭାବୁଛି ଯଦି ରୁଷ ସେଠାରେ ଥାଆନ୍ତା, ତେବେ ବର୍ତ୍ତମାନ କୌଣସି ଯୁଦ୍ଧ ହୋଇନଥାଆନ୍ତା।" ସେ କହିଛନ୍ତି ଯେ ଯଦି ସେ ନିଜେ ସେହି ସମୟରେ ରାଷ୍ଟ୍ରପତି ହୋଇଥାଆନ୍ତେ, ତେବେ ଏହି ଯୁଦ୍ଧ ହୋଇନଥାଆନ୍ତା, କିନ୍ତୁ ଏହା ହୋଇନଥିଲା।

କ୍ରିମିଆ ଦଖଲ ପ୍ରତିବାଦରେ ଜୁନ୍ ୨୦୧୪ରେ ରୁଷକୁ ଜି-୮ରୁ ବାହାର କରାଯାଇଥିଲା। ସେହି ସମୟରେ, ଅନ୍ୟ ସାତଟି ଦେଶ, ଆମେରିକା, କାନାଡା, ୟୁନାଇଟେଡ୍ କିଙ୍ଗଡମ୍, ଫ୍ରାନ୍ସ, ଜର୍ମାନୀ, ଇଟାଲୀ ଏବଂ ଜାପାନର ନେତାମାନେ ବୈଠକରେ ଯୋଗଦେବାକୁ ମନା କରିଦେଇଥିଲେ।