ଆସନ୍ତା ଫେବ୍ରୁଆରି ୨୧ ରେ ଲଞ୍ଚ ହେବାକୁ ଯାଉଛି ଟ୍ରମ୍ପଙ୍କ ସୋସିଆଲ ମିଡ଼ିଆ ନେଟୱାର୍କ 'ଟ୍ରୁଥ'!

ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜର ସୋସିଆଲ ମିଡିଆ ପ୍ଲାଟଫର୍ମକୁ ଉନ୍ମୋଚନ କରିବାକୁ ପ୍ରସ୍ତୁତ ହେଉଛନ୍ତି | ଆସନ୍ତା ଫେବ୍ରୁଆରି ୨୧ ତାରିଖରେ ଟ୍ରୁଥ ଲଞ୍ଚ ହେବ ବୋଲି କୁହାଯାଉଛି | ସୋସିଆଲ ମିଡିଆଠାରୁ ବ୍ୟାନ ହେବା ପରେ ଟ୍ରମ୍ପ ନିଜ ସୋସିଆଲ ମିଡିଆ ପ୍ଲାଟଫର୍ମ ମାଧ୍ୟମରେ ତାଙ୍କ ପ୍ରଶଂସକଙ୍କ ସହ ପୁଣି ଯୋଡି ହେବେ। ଟ୍ରୁଥ୍ ସୋସିଆଲ୍ ଆପ, ଆପଲ୍ ଆପ୍ ଷ୍ଟୋର୍‌ରେ ତାଲିକାଭୁକ୍ତ ହୋଇସାରିଛି | ବଡ କଥା ଯେ ଟ୍ରମ୍ପ ମିଡିଆ ଆଣ୍ଡ ଟେକ୍ନୋଲୋଜି ଗ୍ରୁପ୍ (ଟିଏମଟିଜି) ଦ୍ୱାରା ପ୍ରସ୍ତୁତ କରାଯାଇଥିବା ଟ୍ରୁଥ୍ ସୋସିଆଲ୍, ଟ୍ୱିଟର ସହିତ ସମାନ |

ଏହି ଆପ୍ ଲୋକମାନଙ୍କୁ ଅନ୍ୟ ଲୋକଙ୍କୁ ଅନୁସରଣ କରିବାକୁ ଅନୁମତି ଦିଏ ଏବଂ ଲାଟେଷ୍ଟ ଟ୍ରେଣ୍ଡ ମଧ୍ୟ ଦେଖାଏ | ତେବେ ଟୁଇଟ୍ ପରିବର୍ତ୍ତେ, ପୋଷ୍ଟଗୁଡ଼ିକୁ “ଟ୍ରୁଥ୍” କୁହାଯିବ | ତେବେ ଉଭୟ ଆପଲ୍ ଏବଂ ଟ୍ରମ୍ପଙ୍କ ମ୍ୟାନେଜମେଣ୍ଟ ସୋସିଆଲ ମିଡିଆ ଆପର ଶୁଭାରମ୍ଭ ଉପରେ ମନ୍ତବ୍ୟ ଦେବାକୁ ମନା କରିଦେଇଛନ୍ତି। ତେବେ ଟ୍ରମ୍ପଙ୍କ ନିକଟ ସୂତ୍ରରୁ ପ୍ରକାଶ ଯେ ଫେବ୍ରୁଆରି ୨୧ ରେ ଏହି ଆପ ଉପଲବ୍ଧ ହେବ।

ଟ୍ରମ୍ପ କେବଳ ଟ୍ୱିଟର ପରି ଏକ ପ୍ଲାଟଫର୍ମ ଲଞ୍ଚ କରିବେ ନାହିଁ, ବରଂ ୟୁଟ୍ୟୁବ ଭଳି ନେଟୱାର୍କ ମଧ୍ୟ ଲଞ୍ଚ କରିବେ | ଉଲ୍ଲେଖଯୋଗ୍ୟ, ଟ୍ୱିଟର ଏବଂ ଫେସବୁକ ଟ୍ରମ୍ପଙ୍କ ଆକାଉଣ୍ଟ ବ୍ଲକ କରିବା ପରେ ଟ୍ରମ୍ପ ପୂର୍ବରୁ ନିଜର ସୋସିଆଲ ମିଡିଆ ସାଇଟ୍ ଲଞ୍ଚ କରିବା ବିଷୟରେ କହିଥିଲେ |