ବିଶ୍ୱକୁ ଭାରତର ବୟାନ ଅପରେସନ ସିନ୍ଦୂର ବ୍ରିଫିଂର ନେତୃତ୍ୱ ନେଲେ ୨ ମହିଳା ଅଧିକାରୀ

ନୂଆଦିଲ୍ଲୀ: ବୈଦେଶିକ ସଚିବ ବିକ୍ରମ ମିସ୍ରି, ୱିଙ୍ଗ୍ କମାଣ୍ଡର୍ ବ୍ୟୋମିକା ସିଂହ ଓ କର୍ଣ୍ଣେଲ ସୋଫିଆ କୁରେଶୀ ଅପରେସନ୍ ସିନ୍ଦୂର ଉପରେ ଗଣମାଧ୍ୟମକୁ ସମ୍ବୋଧିତ କରି ଏପ୍ରିଲ ୨୨ରେ ହୋଇଥିବା ଭୟଙ୍କର ପହଲଗାମ ଆତଙ୍କବାଦୀ ଆକ୍ରମଣରେ ଭାରତର ପ୍ରତିକ୍ରିୟା ଉପରେ ଆଲୋକପାତ କରିଥିଲେ। ଆତଙ୍କବାଦର ମୁକାବିଲା ପାଇଁ ଭାରତର ସଂକଳ୍ପ, ମୃତକଙ୍କ ବିଧବାମାନଙ୍କୁ ଶ୍ରଦ୍ଧାଞ୍ଜଳି ଦେବା ଏବଂ ଏକତା ଓ ସାମ୍ପ୍ରଦାୟିକ ସଦ୍ଭାବନାର ଏକ ଶକ୍ତିଶାଳୀ ବାର୍ତ୍ତା ପ୍ରଦାନ କରିବା ପାଇଁ ଦୁଇ ଜଣ ମହିଳା ଅଧିକାରୀଙ୍କୁ ଏହି ବ୍ରିଫିଂର ନେତୃତ୍ୱ ନେବାର ନିଷ୍ପତ୍ତି ପ୍ରତୀକାତ୍ମକ ଥିଲା।

ଏହି ମହିଳା ଅଧିକାରୀଦ୍ବୟ କିଏ?
ଭାରତୀୟ ସେନାର କର୍ପସ୍ ଅଫ୍ ସିଗ୍ନାଲର ଅଧିକାରୀ କର୍ଣ୍ଣେଲ ସୋଫିଆ କୁରେଶୀ ଅନେକ ଗୁରୁତ୍ୱପୂର୍ଣ୍ଣ ସଫଳତା ସହ ସାମରିକ ଇତିହାସରେ ନିଜର ସ୍ଥାନ ସୃଷ୍ଟି କରିଛନ୍ତି। ୩୫ ବର୍ଷୀୟା କୁରେଶୀ ହେଉଛନ୍ତି ପ୍ରଥମ ମହିଳା ଅଧିକାରୀ ଯିଏ ଏକ ବହୁରାଷ୍ଟ୍ରୀୟ ସାମରିକ ଅଭ୍ୟାସରେ ସେନା ଦଳର ନେତୃତ୍ୱ ନେଇଛନ୍ତି। ଅଭ୍ୟାସ ଫୋର୍ସ ୧୮ ନାମକ ଏହି ଅଭ୍ୟାସ ଭାରତ ଦ୍ୱାରା ଆୟୋଜନ କରାଯାଇଥିବା ସର୍ବବୃହତ୍ ସାମରିକ ଅଭ୍ୟାସ ଥିଲା, ଯେଉଁଥିରେ ୧୮ଟି ଦେଶ ଭାଗ ନେଇଥିଲେ। କୁରେଶୀ ୨୦୦୬ରେ କଙ୍ଗୋରେ ମିଳିତ ଜାତିସଂଘର ଶାନ୍ତିରକ୍ଷା ଅଭିଯାନରେ ସାମରିକ ପର୍ଯ୍ୟବେକ୍ଷକ ଭାବରେ କାର୍ଯ୍ୟ କରିଥିଲେ ଏବଂ ୨୦୧୦ ମସିହାରୁ ଶାନ୍ତିରକ୍ଷା ଅଭିଯାନ ସହିତ ଜଡ଼ିତ ଅଛନ୍ତି। କୁରେଶୀଙ୍କ ରକ୍ତରେ ରହିଛି ସାମରିକ ସେବା। ତାଙ୍କ ଜେଜେବାପା ସେନାରେ କାର୍ଯ୍ୟ କରିଥିଲେ ଏବଂ ସେ ମେକାନିକାଲ୍ ଇନଫାଣ୍ଟ୍ରିର ଜଣେ ଅଧିକାରୀଙ୍କୁ ବିବାହ କରିଛନ୍ତି, ଯାହା ଭାରତର ସଶସ୍ତ୍ର ବାହିନୀ ସହିତ ତାଙ୍କର ଗଭୀର ସମ୍ପର୍କକୁ ସୂଚାଇଥାଏ।

ଵିଙ୍ଗ୍ କମାଣ୍ଡର୍ ବ୍ୟୋମିକା ସିଂହଙ୍କ ବାୟୁସେନା ଯାତ୍ରା ପିଲାଦିନେ ଏକ ସ୍ୱପ୍ନ ଦେଖି ଆରମ୍ଭ ହୋଇଥିଲା। ସ୍କୁଲ ସମୟରୁ ସେ ଉଡ଼ିବାକୁ ଚାହୁଥିଲେ। ସେ ଏନ୍‌ସିସିରେ ଯୋଗ ଦେଇ ନିଜର ଲକ୍ଷ୍ୟ ହାସଲ କରିଥିଲେ ଏବଂ ପରେ ଇଞ୍ଜିନିୟରିଂ ଶେଷ କରିଥିଲେ। ସେ ତାଙ୍କ ପରିବାରର ପ୍ରଥମ ବ୍ୟକ୍ତି ଭାବେ ସଶସ୍ତ୍ର ବାହିନୀରେ ଯୋଗ ଦେଇଥିଲେ। ସେ ଭାରତୀୟ ବାୟୁସେନାରେ ହେଲିକପ୍ଟର ପାଇଲଟ୍ ଭାବରେ ନିଯୁକ୍ତ ହୋଇଥିଲେ ଏବଂ ୨୦୧୯ ଡିସେମ୍ବର ୧୮ରେ ଫ୍ଲାଇଂ ଶାଖାରେ ସ୍ଥାୟୀ କମିସନିଂ ପାଇଥିଲେ। ୱିଙ୍ଗ୍ କମାଣ୍ଡର ସିଂହଙ୍କର ୨୫୦୦ ଘଣ୍ଟାରୁ ଅଧିକ ଉଡ଼ାଣ ଅଭିଜ୍ଞତା ରହିଛି। ସେ ଜମ୍ମୁ-କାଶ୍ମୀର ଏବଂ ଉତ୍ତର-ପୂର୍ବ ସମେତ କେତେକ ଦୁର୍ଗମ ଅଞ୍ଚଳରେ ଚେତକ ଓ ଚିତା ଭଳି ହେଲିକପ୍ଟର ଉଡ଼ାଇଛନ୍ତି। ଏକାଧିକ ଉଦ୍ଧାର ଅଭିଯାନରେ ସେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ୨୦୨୦ ନଭେମ୍ବରରେ ଅରୁଣାଚଳ ପ୍ରଦେଶରେ ତାଙ୍କ ନେତୃତ୍ୱରେ ଏକ ପ୍ରମୁଖ ମିସନ ହୋଇଥିଲା। ୱିଙ୍ଗ୍ କମାଣ୍ଡର ସିଂହ ହାଇ-ଏଣ୍ଡୁରେନ୍ସ ମିସନରେ ବି ଭାଗ ନେଇଛନ୍ତି। ୨୦୨୧ ମସିହାରେ ସେ ୨୧,୬୫୦ ଫୁଟ ଉଚ୍ଚତା ବିଶିଷ୍ଟ ମାଉଣ୍ଟ ମଣିରଙ୍ଗରେ ତ୍ରିସେନାର ମହିଳା ପର୍ବତାରୋହଣ ଅଭିଯାନରେ ଯୋଗ ଦେଇଥିଲେ।