ରୁଷ୍‌ ବଡ଼ଦିନ ଅସ୍ତ୍ରବିରତି ଉଲ୍ଲଂଘନ କରିଥିବାରୁ ଗୀର୍ଜା ଉପରେ ଆକ୍ରମଣ ଆଶଙ୍କା କରୁଛି ୟୁକ୍ରେନ୍‌

କିବ୍: ରୁଷୀୟ ରାଷ୍ଟ୍ରପତି ଭ୍ଲାଦିମିର୍‌ ପୁଟିନ୍‌ ବଡ଼ଦିନ ଅସ୍ତ୍ରବିରତି ଘୋଷଣା କରିଥିଲେ ସୁଦ୍ଧା କ୍ରେମ୍‌ଲିନ୍‌ ତାହାକୁ ଉଲ୍ଲଂଘନ କରୁଥିବାରୁ ୟୁକ୍ରେନ୍‌ରେ ଥିବା ଗୀର୍ଜାଗୁଡ଼ିକରେ ଆକ୍ରମଣ ହୋଇପାରେ  ୟୁକ୍ରେନ୍‌ର ଉପ-ପ୍ରଧାନମନ୍ତ୍ରୀ ଇରିନା ଭେରେଶ୍ଚଚୁକ୍‌ ସନ୍ଦେହ କରିଛନ୍ତି।

ସୂଚନାଯୋଗ୍ୟ, ‘ଅର୍ଥୋଡକ୍ସ କ୍ରିସ୍‌ମାସ୍’ (ରକ୍ଷଣଶୀଳଙ୍କ ବଡ଼ଦିନ ଯାହା ଜାନୁଆରି ୭ରେ ପଡ଼େ) ଉପଲକ୍ଷେ ରୁଷୀୟ ରାଷ୍ଟ୍ରପତି ବଡ଼ଦିନ ଅସ୍ତ୍ରବିରତି ଘୋଷଣା କରିଥିଲେ।

କିନ୍ତୁ, ୟୁକ୍ରେନୀୟ ଗୀର୍ଜାଗୁଡ଼ିକ ଏହି ଅସ୍ତ୍ରବିରତି ଘୋଷଣାକୁ ସନ୍ଦେହ କରିଛନ୍ତି। ସେମାନଙ୍କର ଆଶଙ୍କା ରୁଷ୍‌ ଅଧିକୃତ ୟୁକ୍ରେନୀୟ ଅଞ୍ଚଳରେ ଥିବା ଗୀର୍ଜାଗୁଡ଼ିକ ଉପରେ ରୁଷ୍‌ର ସମ୍ଭାବ୍ୟ ଆକ୍ରମଣ ଆଶଙ୍କା ରହିଛି।

Image Courtesy of MSN

ଉପମୁଖ୍ୟମନ୍ତ୍ରୀ ତଥା ‘ରିଇଣ୍ଟିଗ୍ରେସନ୍‌ ଅଫ୍‌ ଦି ଟେମ୍ପରାରିଲି ଅକୁପାଏଡ୍ ଟେରିଟରିଜ୍‌ ଅଫ୍‌ ୟୁକ୍ରେନ୍‌’ର ମନ୍ତ୍ରୀ ଇରିନା ଭେରେଶ୍ଚଚୁକ୍‌ ଶୁକ୍ରବାର ଦିନ ତାଙ୍କ ‘ଫେସ୍‌ବୁକ୍‌’ରେ ଲେଖିଥିଲେ ଯେ, ଜାନୁଆରି ୭ ତାରିଖରେ ରକ୍ଷଣଶୀଳ ଗୀର୍ଜାଗୁଡ଼ିକରେ ଧାର୍ମିକ ଅନୁଷ୍ଠାନ ଚାଲିଥିବା ବ‌େଳେ ଆକ୍ରମଣ କରିବା ପାଇଁ ତାଙ୍କ ନିକଟକୁ ସତର୍କ ସୂଚନା ଆସିଥିଲା। ଏକଥା ‘ନିଉଜ୍‌ଉଇକ୍‌’ ମଧ୍ୟ ରିପୋର୍ଟ କରିଛି।

ଇରିନା ଭେରେଶ୍ଚଚୁକ୍‌ ଲେଖିଥିଲେ: ସାମୟିକଭାବେ ଅଧିକୃତ ଅଞ୍ଚଳରେ ବାସ କରୁଥିବା ୟୁକ୍ରେନୀୟ ନାଗରିକମାନଙ୍କୁ ନିବେଦନ, ସେ ଅଞ୍ଚଳରେ ଥିବା ଗୀର୍ଜାଗୁଡ଼ିକରେ ‘ରକ୍ଷଣଶୀଳ ବଡ଼ଦିନ’ ପାଳନ ସମୟରେ ଆକ୍ରମଣ କରିବା ଲାଗି ରୁଷ୍‌ ମସୁଧା କରୁଥିବା ସୂଚନା ମିଳିଛି। ସତର୍କ ରହିବା ଲାଗି ନାଗରିକମାନଙ୍କୁ ଅନୁରୋଧ। ଯଦି ସମ୍ଭବ ହୁଏ ତେବେ, ଜନଗହଳି ଥିବା ସ୍ଥାନକୁ ଯାଆନ୍ତୁ ନାହିଁ। ନିଜ ପ୍ରତି ଓ ପରିଜନମାନଙ୍କ ପ୍ରତି ଯତ୍ନଶୀଳ ହୁଅନ୍ତୁ। ୟୁକ୍ରେନ୍‌ର ସଶସ୍ତ୍ର ବାହିନୀ ଯିବା ପର୍ଯ୍ୟନ୍ତ ଅପେକ୍ଷା କରନ୍ତୁ।

ସୂଚନାଯୋଗ୍ୟ, ‘ରକ୍ଷଣଶୀଳ ବଡ଼ଦିନ’ ଲାଗି ରୁଷୀୟ ରାଷ୍ଟ୍ରପତି ଭ୍ଲାଦିମିର୍‌ ପୁଟିନ୍‌ ୩୬ ଘଣ୍ଟା ଲାଗି ଅସ୍ତ୍ରବିରତି ଘୋଷଣା କହିଛନ୍ତି। ଏହା ହେଉଛି ଦୀର୍ଘ ୧୦ ମାସ ଯୁଦ୍ଧରେ ପ୍ରଥମ ଉଲ୍ଲେଖନୀୟ ଘଟଣା।