ଅଭିନେତ୍ରୀ ଉର୍ମିଳା ମାତଣ୍ଡକରଙ୍କୁ ବିଧାନପରିଷଦ ସଦସ୍ୟ କରିବାକୁ ଶିବସେନା ରାଜି

ମୁମ୍ବାଇ: ମହାରାଷ୍ଟ୍ର ସରକାର ବଲିଉଡ ଅଭିନେତ୍ରୀ ଉର୍ମିଲା ମାତଣ୍ଡକରଙ୍କୁ ବିଧାନ ପରିଷଦର ସଦସ୍ୟ କରିବାକୁ ପ୍ରସ୍ତୁତ ହେଉଛନ୍ତି। ସରକାର ତାଙ୍କ ନାମ ରାଜ୍ୟପାଳ ଭଗତ ସିଂ କୋଶାରିଙ୍କ ନିକଟକୁ ପଠାଇଛନ୍ତି। ମହାରାଷ୍ଟ୍ରର ମହା ବିକାଶ ଅଘାଡି ସରକାର ରାଜ୍ୟପାଳଙ୍କ ନିକଟକୁ ୧୨ ଜଣଙ୍କର ନାମ ଥିବା ଏକ ତାଲିକା ପଠାଇଛନ୍ତି | ସେମାନଙ୍କୁ ରାଜ୍ୟପାଳଙ୍କ କୋଟାରୁ ବିଧାନପରିଷଦକୁ ପଠାଯିବ। ମହା ବିକାଶ ଅଘାଡି ଶିବସେନା, ଏନସିପି ଏବଂ କଂଗ୍ରେସର ଏକ ମିଳିତ ମଞ୍ଚ ହୋଇଥିବାବେଳେ ତିନି ଦଳର ୧୨ ଜଣ ନେତାଙ୍କ ନାମ ରାଜ୍ୟପାଳ ଭଗତ ସିଂ କୋଶାରିଙ୍କ ନିକଟକୁ ପଠାଯାଇଛି।

ଏନସିପି ଏକନାଥ ଖଡସେ, ରାଜୁ ଶେଟ୍ଟୀ, ଯଶପାଲ ବିଙ୍ଗେ ଏବଂ ଆନନ୍ଦ ସିନ୍ଦେଙ୍କ ନାମ ପଠାଇଛି । ସେହିପରି କଂଗ୍ରେସ ରଜନୀ ପାଟିଲ, ସଚିନ ସାୱନ୍ତ, ମୁଜାଫର ହୁସେନ୍ ଏବଂ ଅନିରୁଦ୍ଧ ଭଙ୍କରଙ୍କ ନାମ ପଠାଇଛି। ଆଉ ଶିବସେନା ଉର୍ମିଲା ମାତଣ୍ଡକର, ଚନ୍ଦ୍ରକାନ୍ତ ରଘୁବଂଶୀ, ବିଜୟ କରଞ୍ଜକର ଏବଂ ନିତିନ ବାଙ୍ଗୁଡେ ପାଟିଲଙ୍କ ନାମ ପଠାଇଛି ।

ଏଠାରେ ସୂଚନା ଥାଉ କି ଗତ ବର୍ଷ ହୋଇଥିବା ଲୋକସଭା ନିର୍ବାଚନ ପୂର୍ବରୁ ଉର୍ମିଲା ମାତଣ୍ଡକର କଂଗ୍ରେସରେ ଯୋଗ ଦେଇଥିଲେ। ଦଳ ତାଙ୍କୁ ମୁମ୍ବାଇ ଉତ୍ତରରୁ ଟିକେଟ ଦେଇଥିଲା। ତେବେ ତାଙ୍କୁ ପରାଜୟର ସାମ୍ନା କରିବାକୁ ପଡିଥିଲା । ଅନ୍ୟପକ୍ଷରେ ବିଜେପି ଛାଡି ଏନସିପିରେ ଯୋଗ ଦେଇଥିବା ଏକନାଥ ଖଡସେଙ୍କୁ ମଧ୍ୟ ଏନସିପି ବିଧାନ ପରିଷଦ ପଠାଇବାକୁ ନିଷ୍ପତ୍ତି ନେଇଛି | ଭାରତୀୟ ଜନତା ପାର୍ଟି (ବିଜେପି) ରୁ ଇସ୍ତଫା ଦେଇଥିବା ପୂର୍ବତନ ମନ୍ତ୍ରୀ ଏକନାଥ ଖଡସେ ଶରଦ ପାୱାରଙ୍କ ଉପସ୍ଥିତିରେ ଏନସିପିରେ ଯୋଗ ଦେଇଥିଲେ।