ଆମେରିକା ସ୍ୱାସ୍ଥ୍ୟ ସହାୟତା ବନ୍ଦ କଲେ ଭୟାନକ ସ୍ଥିତି ଆସିବ

ୱାସିଂଟନ: ଲାନ୍‌ସେଟ୍‌ରେ ପ୍ରକାଶିତ ଏକ ନୂତନ ଅଧ୍ୟୟନ ଅନୁଯାୟୀ ଯଦି ଆମେରିକା ‘ପେପ୍‌ଫାର୍’ କାର୍ଯ୍ୟକ୍ରମ ମାଧ୍ୟମରେ ସମର୍ଥନ ହ୍ରାସ କରେ ତେବେ ଆଫ୍ରିକାରେ ଏଚ୍‌ଆଇଭି/ଏଡ୍ସ ଚିକିତ୍ସାର ଭବିଷ୍ୟତ ଅନ୍ଧାର ହୋଇଯିବ ଏବଂ ୨୦୩୦ ସୁଦ୍ଧା ଏଡ୍ସରେ ୫ ଲକ୍ଷ ଶିଶୁଙ୍କର ମୃତ୍ୟୁ ହୋଇପାରେ। ‘ପେପ୍‌ଫାର’ ବା ‘ଏଡ୍ସ ରିଲିଫ୍ ପାଇଁ ଆମେରିକା ରାଷ୍ଟ୍ରପତିଙ୍କ ଜରୁରିକାଳୀନ ଯୋଜନା’ ୨୦୦୩ ମସିହାରୁ ଉପ-ସାହାରା ଆଫ୍ରିକାର ଦେଶଗୁଡ଼ିକୁ ଏଚ୍‌ଆଇଭି/ଏଡ୍ସ ମୁକାବିଲାରେ ସାହାଯ୍ୟ କରିଆସୁଛି। ଏହା ପୂର୍ବରୁ ୨୬ ନିୟୁତରୁ ଅଧିକ ଲୋକଙ୍କ ଜୀବନ ବଞ୍ଚାଇସାରିଛି ଏବଂ ୭.୮ ନିୟୁତ ଶିଶୁଙ୍କୁ ଏଚ୍‌ଆଇଭି ନେଇ ଜନ୍ମ ହେବାରୁ ରୋକିବାରେ ସାହାଯ୍ୟ କରିଛି।

୨୦୩୦ ସୁଦ୍ଧା ୫,୦୦,୦୦୦ ଶିଶୁ ଏଡ୍ସରେ ମୃତ୍ୟୁବରଣ କରିପାରନ୍ତି: ଲାନ୍‌ସେଟ୍

ଏହି ଅଧ୍ୟୟନରେ ଆକଳନ କରାଯାଇଛି ଯେ, ଯଦି ପେପ୍‌ଫାର୍ ପାଣ୍ଠି ହ୍ରାସ କିମ୍ବା ବନ୍ଦ କରାଯାଏ ତେବେ ୨୦୩୦ ସୁଦ୍ଧା ପାଖାପାଖି ୫,୦୦,୦୦୦ ଶିଶୁ ଏଡ୍ସ ଜନିତ ରୋଗରେ ମୃତ୍ୟୁବରଣ କରିପାରନ୍ତି ଏବଂ ୧ ନିୟୁତ ଅଧିକ ଏଚ୍‌ଆଇଭି ସଂକ୍ରମିତ ହୋଇପାରନ୍ତି। ଆଗାମୀ ପାଞ୍ଚ ବର୍ଷ ମଧ୍ୟରେ ୨.୮ ନିୟୁତ ଶିଶୁ ଅନାଥ ହୋଇପାରନ୍ତି ବୋଲି ମଧ୍ୟ ସତର୍କ କରାଇ ଦିଆଯାଇଛି। ଗବେଷକମାନେ କହିଛନ୍ତି ଯେ ଏହି କାର୍ଯ୍ୟକ୍ରମ କେବଳ ଏଚ୍‌ଆଇଭି ସହ ଲଢ଼ିବା ବ୍ୟତୀତ ଅଧିକ କିଛି କରିଛି। ଏହା ସ୍ୱାସ୍ଥ୍ୟସେବା ବ୍ୟବସ୍ଥାକୁ ସୁଦୃଢ଼ କରିଛି, ଶିଶୁ ସ୍ୱାସ୍ଥ୍ୟକୁ ସମର୍ଥନ କରିଛି ଏବଂ ଝିଅମାନଙ୍କୁ ଯୌନ ହିଂସାରୁ ରକ୍ଷା କରିବାରେ ସାହାଯ୍ୟ କରିଛି। ଏହାଦ୍ୱାରା ଆମେରିକା ଓ ଆଫ୍ରିକୀୟ ରାଷ୍ଟ୍ରମାନଙ୍କ ମଧ୍ୟରେ ବାଣିଜ୍ୟ ଓ କୂଟନୈତିକ ସମ୍ପର୍କରେ ମଧ୍ୟ ଉନ୍ନତି ଆସିଛି। କିନ୍ତୁ ସାମ୍ପ୍ରତିକ ରାଜନୈତିକ ଘଟଣାକ୍ରମ କାର୍ଯ୍ୟକ୍ରମର ଭବିଷ୍ୟତକୁ ଅନିଶ୍ଚିତତା ଭିତରକୁ ଠେଲି ଦେଇଛି।

ନିକଟରେ ଆମେରିକାର ଏକ ନୀତି ପେପ୍‌ଫାର୍ ସମେତ ବୈଦେଶିକ ସହାୟତାକୁ ୯୦ ଦିନ ପାଇଁ ସ୍ଥଗିତ ରଖିଛି, ଯାହା ପୂର୍ବରୁ ଅନେକ ଅଞ୍ଚଳରେ ସେବା ବାଧାପ୍ରାପ୍ତ କରିଛି। ଏହି ଅଧ୍ୟୟନ ପଛରେ ଥିବା ବିଶେଷଜ୍ଞମାନେ ଆଫ୍ରିକୀୟ ଦେଶମାନଙ୍କୁ ସେମାନଙ୍କ ନିଜ ଏଚ୍‌ଆଇଭି କାର୍ଯ୍ୟକ୍ରମ ଦୃଢ଼ କରିବାରେ ସାହାଯ୍ୟ କରିବା ସହିତ ‘ପେପ୍‌ଫାର୍’ ସମର୍ଥନ ଜାରି ରଖିବା ପାଇଁ ଏକ ସ୍ପଷ୍ଟ ପଞ୍ଚବାର୍ଷିକ ଯୋଜନା ପାଇଁ ଆହ୍ୱାନ ଦେଇଛନ୍ତି।