ସମ୍ପର୍କୀୟଙ୍କୁ ଭେଟିବାକୁ ଡାକ୍ତରଖାନା ଯାଇଥିବା ବେଳେ ଧକ୍କା ଦେଲା କାର୍, ଚାଲିଗଲା ମହିଳାଙ୍କ ଜୀବନ

ଝାନ୍ସି: ସମ୍ପର୍କୀୟଙ୍କୁ ଭେଟିବାକୁ ଡାକ୍ତରଖାନା ଯାଇଥିବା ବେଳେ ଧକ୍କା ଦେଲା କାର୍। ଚାଲିଗଲା ମହିଳାଙ୍କ ଜୀବନ। ଉତ୍ତରପ୍ରଦେଶର ଝାନ୍ସିରେ ଘଟିଛି ଏଭଳି ଘଟଣା। ରାସ୍ତା ପାର ହେଉଥିବା ବେଳେ ଦୁର୍ଘଟଣା ଘଟିଥିବା ଜଣାଯାଇଛି। ମୃତକଙ୍କ ନାମ ଗୁଡ୍ଡୋ ବୋଲି ଜଣାପଡ଼ିଛି। ଦୁର୍ଘଟଣା ପରେ ଅଭିଯୁକ୍ତ ଫେରାର ଅଛି।

ମିଳିଥିବା ସୂଚନା ମୁତାବକ, ଲକ୍ଷ୍ମୀ ଗେଟ୍ ନିବାସୀ ରାଜୁ ରାୟକରଙ୍କ ପତ୍ନୀ ଗୁଡ୍ଡୋଙ୍କ ସମ୍ପର୍କୀୟଙ୍କୁ ନବାବାଦର ମ୍ୟାକ୍ସ କେୟାର ହସ୍ପିଟାଲରେ ଭର୍ତ୍ତି କରାଯାଇଥିଲା। ସେ ତାଙ୍କୁ ଦେଖିବା ପାଇଁ ସ୍ୱାମୀଙ୍କ ସହ ଡାକ୍ତରଖାନା ଯାଇଥିଲେ। ଶୁକ୍ରବାର ରାତି ପ୍ରାୟ ୯:୧୫ ସମୟରେ ସେ ସ୍ୱାମୀଙ୍କ ସହ ଘରକୁ ଯିବା ପାଇଁ ଡାକ୍ତରଖାନାରୁ ବାହାରିବା ସହ ରାସ୍ତା ପାର ହେଉଥିଲେ। ଏହି ସମୟରେ ଦ୍ରୁତ ଗତିରେ ଆସୁଥିବା ଏକ କାର୍ ତାଙ୍କୁ ଧକ୍କା ଦେଇଥିଲା। ଏହି ଧକ୍କା ଏତେ ଶକ୍ତିଶାଳୀ ଥିଲା ଯେ ଗୁଡ୍ଡୋ ଖୁବ ଉପରକୁ ଉଠିବା ପରେ କାରର ବୋନେଟ ଉପରେ ଆସି ପଡ଼ିଥିଲେ | ଏହା ପରେ ମଧ୍ୟ ଡ୍ରାଇଭର କାରକୁ ଅଟକାଇ ନଥିଲେ, ଯାହାଦ୍ବାରା ଗୁଡ୍ଡୋ ପ୍ରାୟ ୧୦୦ମିଟର ପର୍ଯ୍ୟନ୍ତ ଟାଣି ହୋଇଯାଇଥିଲେ। ଏହି ଘଟଣା ଡାକ୍ତରଖାନାରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଥିଲା, ଯାହା ଏବେ ଭାଇରାଲ ହେଉଛି।

ମହିଳାଙ୍କ ମୃତ୍ୟୁ ପରେ ମ୍ୟାକ୍ସ କେୟାର ହସ୍ପିଟାଲରେ ତାଙ୍କର ବ୍ୟବଚ୍ଛେଦ କରାଯାଇଥିବା ଜଣାପଡ଼ିଛି। ଦୁର୍ଘଟଣା ଘଟାଇବା ପରେ ଫେରାର ହୋଇଯାଇଥିବା ଅଭିଯୁକ୍ତକୁ ଏବେ ପୁଲିସ ଖୋଜିବା ଆରମ୍ଭ କରିଛି।