ବିଜୟନଗରମ୍‌ ଟ୍ରେନ୍‌ ଦୁର୍ଘଟଣା: ମୃତ୍ୟୁ ସଂଖ୍ୟା ୯କୁ ବୃଦ୍ଧି, ୨୯ରୁ ଊର୍ଦ୍ଧ୍ବ ଯାତ୍ରୀ ଆହତ

ରାୟଗଡ଼ା: ଆନ୍ଧ୍ରପ୍ରଦେଶର ବିଜୟନଗରମ୍‌ ନିକଟରେ ଘଟିଥିବା ରେଳ ଦୁର୍ଘଟଣାରେ ମୃତ୍ୟୁ ସଂଖ୍ୟା ୯କୁ ବୃଦ୍ଧି ପାଇଛି । ପୂର୍ବତଟ ରେଳପଥର ମୁଖ୍ୟ ସୂଚନା ଅଧିକାରୀ ଏହି ସୂଚନା ଦେଇଛନ୍ତି । ବର୍ତ୍ତମାନ ସୁଦ୍ଧା ଦୁର୍ଘଟଣାରେ ୯ ଜଣଙ୍କ ମୃତ୍ୟୁ ହେବା ସହ ୨୯ରୁ ଊର୍ଦ୍ଧ୍ବ ଯାତ୍ରୀ ଆହତ ହୋଇଛନ୍ତି । ମୃ୍ତ୍ୟୁ ସଂଖ୍ୟା ବଢିବ‌ାର ଆଶଙ୍କା ମଧ୍ୟ ‌ରହିଛି । ଏ ପର୍ଯ୍ୟନ୍ତ ମିଳିଥିବା ସୂଚନା ଅନୁସାରେ ଘଟଣାସ୍ଥଳରେ ଉଦ୍ଧାର କାର୍ଯ୍ୟକୁ ତ୍ବରାନ୍ଵିତ କରିବା ସହ ଆହତଙ୍କୁ ସ୍ଥାନୀୟ ଆଲାମଣ୍ଡ ହସ୍ପିଟାଲରେ ଚିକିତ୍ସା ବ୍ୟବସ୍ଥା କରାଯାଇଛି।

ସ୍ଥାନୀୟ ପ୍ରଶାସନ ନିକଟରୁ ମିଳିଥିବା ସୂଚନା ଅନୁସାରେ ଉଭୟ ରେସ୍କ୍ୟୁ ଓ ରିଲିଫ୍‌ ଟିମ୍ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟକୁ ଜୋରଦାର କରିଛନ୍ତି । ବର୍ତ୍ତମାନସୁଦ୍ଧା ୧୦୦ରୁ ଉର୍ଦ୍ଦ ଲୋକଙ୍କୁ ଉଦ୍ଧାର କରାଯାଇଛି। ଏପର୍ଯ୍ୟନ୍ତ ୧୦ଟି ଟ୍ରେନ୍‌ ବାତିଲ ହୋଇଥିବା ବେଳେ ୩ଟି ଟ୍ରେନ୍‌ ଆଂଶିକ ବାତିଲ ହୋଇଛି । ସେହିପରି ୧୦ଟି ଟ୍ରନ୍‌ର ଗତିପଥ ପରିବର୍ତ୍ତନ କରାଯାଇଛି ବୋଲି ପୂର୍ବତଟ ରେଳପଥ ପକ୍ଷରୁ ବୁଲେଟିନ୍‌ ଜାରି କରାଯାଇଛି ।

ଦୁର୍ଘଟଣା ପରେ ପଛ ପଟୁ ଧକ୍କା ଦେଇଥିବା ଟ୍ରେନର ଇଞ୍ଜିନ ମଧ୍ୟ ଲାଇନ୍‌ଚ୍ୟୁ୍ତ ହୋଇଯାଇଛି। ଦୁର୍ଘଟଣାର କାରଣ ଏପର୍ଯ୍ୟନ୍ତ ସ୍ପଷ୍ଟ ହେଇ ନାହିଁ ଯାହା ତଦନ୍ତ ସାପେକ୍ଷ। ଦୁର୍ଘଟଣାସ୍ଥଳରୁ ବିଜୟନଗରମ୍‌ ଓ ବିଶ‌ାଖାପାଟଣା ଯିବା ପାଇଁ ବସ୍‌ର ବ୍ୟବସ୍ଥା କରାଯାଇଛି । ତେବେ ଘଟଣା ସ୍ଥଳରେ ଆହତଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦେବା ଓ ଫସି ରହିଥିବା ଯାତ୍ରୀଙ୍କୁ ନିଜ ଗନ୍ତବ୍ୟ ସ୍ଥଳକୁ ଯିବାର ବ୍ୟବସ୍ଥା କରିବା ଆମ ପ୍ରାଥମିକ ଦାୟିତ୍ଵ ‌ବୋଲି ଅଧିକାରୀ କହିଛନ୍ତି। ଡିଆର୍‌ଏମ୍‌ ସମ୍ବଲପୁର ଓ ୱାଲ୍ଟିୟର ଏବଂ ଭୁବନେଶ୍ବରରୁ ମହାପ୍ରବନ୍ଧକ ମଧ୍ୟ ଘଟଣାସ୍ଥଳକୁ ବାହାରି ସାରିଛନ୍ତି।

ମୃତ୍ୟୁ ବରଣ କରିଥିବା ଯାତ୍ରୀଙ୍କ ପାଇଁ ଆନ୍ଧ୍ର ପ୍ରଦେଶ ସରକାର କ୍ଷତିପୂରଣ ଘୋଷଣା କରିଛନ୍ତି। ଆନ୍ଧ୍ର ନିବାସୀଙ୍କ ପାଇଁ ୧୦ ଲକ୍ଷ ଟଙ୍କା ଏବଂ ଅନ୍ୟ ରାଜ୍ୟ ମୃତ ଯାତ୍ରୀଙ୍କୁ ୨ ଲକ୍ଷ ଟଙ୍କା ପ୍ରଦାନ କରିବେ। ଆହତଙ୍କୁ ମଧ୍ୟ ୨ଲକ୍ଷ ଟଙ୍କା ମିଳିବ ।