ଭୋଟବେଳେ ହିଂସାକାଣ୍ଡ, ଥାନା ଘେରାଉ କଲେ ସନ୍ଦେଶଖାଲି ମହିଳା

ସନ୍ଦେଶଖାଲି : ପଶ୍ଚିମବଙ୍ଗରେ ସପ୍ତମ ପର୍ଯ୍ୟାୟ ଲୋକସଭା ନିର୍ବାଚନ ପାଇଁ ମତଦାନ ଚାଲିଛି । ସେପଟେ ରାଜ୍ୟର ବିଭିନ୍ନ ସ୍ଥାନରୁ ହିଂସାକାଣ୍ଡର ଖବର ସାମ୍ନାକୁ ଆସୁଛି । ନିର୍ବାଚନ ପ୍ରଚାର ସମୟରେ ଚର୍ଚ୍ଚାରେ ଥିବା ସନ୍ଦେଶଖାଲିର ପରିସ୍ଥିତି ମଧ୍ୟ ଖରାପ ହୋଇଯାଇଛି। ଏଠାକାର ମହିଳାମାନେ ଥାନା ଘେରାଉ କରିଛନ୍ତି। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଛି। ମହିଳାମାନେ ରାଜବାରୀ ଥାନା ଘେରାଉ କରିବା ସହ ଏଠାରେ ସରକାର ବିରୋଧୀ ସ୍ଲୋଗାନ ଦେଇଥିଲେ ।

ସନ୍ଦେଶଖାଲିର ଶେଖପଡ଼ା ଅଗ୍ରାଟି ଗାଁର ଲୋକେ ତୀବ୍ର ଉତ୍ତେଜନା ପ୍ରକାଶ କରିଛନ୍ତି। ଏହି ଲୋକମାନେ ଅଭିଯୋଗ କରିଛନ୍ତି ଯେ ଗାଁର ଏକ ଘରେ କେହି ବୋମା ରଖିଥିଲା। ଏହି ଘଟଣାରେ ପୁଲିସ ଜଣେ ୧୯ ବର୍ଷୀୟ ନାବାଳକଙ୍କୁ ଗିରଫ କରିଛି। ଏହାବ୍ୟତୀତ ଆଉ ୨ ଜଣଙ୍କୁ ଅଟକ ରଖାଯାଇଛି। ସ୍ଥାନୀୟ ଲୋକଙ୍କ ବିରୋଧ ପରେ ପୁଲିସ ବାଳକକୁ ଛାଡ଼ି ଦେଇଥିଲେ ହେଁ ଅଟକ ଥିବା ଦୁଇ ଜଣଙ୍କୁ ଛାଡ଼ି ଦିଆଯାଇନାହିଁ। ଏହାକୁ ନେଇ ଏଠାରେ ବିରୋଧ କରାଯାଉଛି।

ସନ୍ଦେଶଖାଲି ବ୍ୟତୀତ ଭଙ୍ଗରରେ ମଧ୍ୟ ହିଂସାକାଣ୍ଡ ଘଟିଛି। ଶୁକ୍ରବାର ବିଳମ୍ବିତ ରାତିରୁ ଆରମ୍ଭ ହୋଇଥିବା ଏହି ହିଂସା କାଣ୍ଡ ଶନିବାର ମତଦାନ ପ୍ରକ୍ରିୟା ଆରମ୍ଭ ହେବା ପର୍ଯ୍ୟନ୍ତ ଜାରି ରହିଥିଲା। ସନ୍ଦେଶଖାଲି ବସିରହାଟ ଲୋକସଭା ନିର୍ବାଚନ ମଣ୍ଡଳୀ ଏବଂ ଭଙ୍ଗର ଯାଦବପୁର ଲୋକସଭା ନିର୍ବାଚନ ମଣ୍ଡଳୀ ଅଧୀନରେ ରହିଛି ।