ଆଖି ପାଇଁ ଭାଇରାଲ ହୋଇଥିବା ମୋନାଲିସାଙ୍କୁ ମିଳିଲା ଫିଲ୍ମ

ପ୍ରୟାଗରାଜ: ମହାକୁମ୍ଭ ମେଳାରେ ରୁଦ୍ରାକ୍ଷ ମାଳ ବିକ୍ରି କରୁଥିବା ମୋନାଲିସାଙ୍କୁ ଫିଲ୍ମରେ କାମ କରିବାର ପ୍ରସ୍ତାବ ମିଳିଛି। ଚଳଚ୍ଚିତ୍ର ନିର୍ମାତା ସନୋଜ ମିଶ୍ର ତାଙ୍କୁ ତାଙ୍କର ଆଗାମୀ ଚଳଚ୍ଚିତ୍ର "ଦି ଡାଏରୀ ଅଫ୍ ମଣିପୁର"ରେ ମୁଖ୍ୟ ଅଭିନେତ୍ରୀ ଭାବରେ କାମ କରିବାକୁ ଅଫର ଦେଇଛନ୍ତି। ପରିବାରର ଅନୁମତି ପରେ ମୋନାଲିସା ଏହି ଫିଲ୍ମ କରିବାକୁ ରାଜି ହୋଇଛନ୍ତି ବୋଲି କୁହାଯାଉଛି।

ଏହି ଫିଲ୍ମରେ ମୋନାଲିସା ଜଣେ ଅବସରପ୍ରାପ୍ତ ସେନା ଅଧିକାରୀଙ୍କ ଝିଅ ଭୂମିକାରେ ଅଭିନୟ କରିବେ। ଫିଲ୍ମର ସୁଟିଂ ଏପ୍ରିଲରୁ ଜୁନ୍ ପର୍ଯ୍ୟନ୍ତ ଉତ୍ତର-ପୂର୍ବ ଭାରତର ବିଭିନ୍ନ ସ୍ଥାନରେ ହେବ। ଏହି ଫିଲ୍ମ ଅକ୍ଟୋବର କିମ୍ବା ନଭେମ୍ବରରେ ମୁକ୍ତିଲାଭ କରିବ ବୋଲି କୁହାଯାଉଛି। ମିଳିଥିବା ସୂଚନା ମୁତାବକ, ସୁଟିଂ ପୂର୍ବରୁ ମୋନାଲିସାଙ୍କୁ ତିନି ମାସ ପାଇଁ ମୁମ୍ବାଇରେ ଅଭିନୟ ତାଲିମ ଦିଆଯିବ।

ତେବେ ମହାକୁମ୍ଭରେ କିଛି ଲୋକଙ୍କ ଦ୍ୱାରା ନିରନ୍ତର ନିର୍ଯାତନାର ଶିକାର ହେବାରୁ ମୋନାଲିସା ଏବଂ ତାଙ୍କ ବାପା ମଧ୍ୟପ୍ରଦେଶର ମହେଶ୍ୱରରେ ଥିବା ନିଜ ଘରକୁ ଚାଲିଯାଇଛନ୍ତି। ଚଳଚ୍ଚିତ୍ର ନିର୍ଦ୍ଦେଶକ ସନୋଜ ମିଶ୍ର ଏବଂ ତାଙ୍କ ଦଳ ଦୁଇ ଦିନ ପରେ ମହେଶ୍ୱର ପହଞ୍ଚିବେ ଏବଂ ମୋନାଲିସା ଓ ତାଙ୍କ ପରିବାରକୁ ଭେଟିବେ। ମହେଶ୍ୱରରେ ହିଁ ସେମାନଙ୍କ ସହିତ ଫିଲ୍ମ ପାଇଁ ଚୁକ୍ତିନାମା ସ୍ୱାକ୍ଷର କରାଯିବ ବୋଲି ଜଣାପଡ଼ିଛି।