ହ୍ବାଟସଆପ ଡେସ୍କଟପ୍ ବ୍ୟବହାରକାରୀଙ୍କୁ ଭାରତ ସରକାର ଦେଲେ ଚେତାବନୀ

ନୂଆଦିଲ୍ଲୀ: ଚଳିତ ସପ୍ତାହରେ ଭାରତ ସରକାର ହ୍ବାଟସଆପ ଡେସ୍କଟପ୍ ବ୍ୟବହାରକାରୀଙ୍କୁ ସେମାନଙ୍କ ଡାଟା ସୁରକ୍ଷା ଦୃଷ୍ଟି ଏକ ବଡ଼ ଚେତାବନୀ ଦେଇଛି। 

ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଅଧୀନରେ ଥିବା ଇଣ୍ଡିଆନ୍ କମ୍ପ୍ୟୁଟର ଜରୁରୀକାଳୀନ ପ୍ରତିକ୍ରିୟା ଦଳ ଏପ୍ରିଲ ୯ ତାରିଖରେ ହ୍ବାଟସଆପ ବ୍ୟବହାରକାରୀଙ୍କ ପାଇଁ ଏକ ଉଚ୍ଚ ଗମ୍ଭୀରତା ଚେତାବନୀ ଜାରି କରିଛି। ଏହି ଚେତାବନୀ ବିଶେଷ ଭାବେ ସେମାନଙ୍କ ପାଇଁ ରହିଛି ଯେଉଁମାନେ ସେମାନଙ୍କ ପିସିରେ ଡେସ୍କଟପ୍ ଆପ୍ ଇନଷ୍ଟଲ କରିଛନ୍ତି।

ସରକାର ହ୍ୱାଟସଆପରେ କିଛି ସୁରକ୍ଷା ତ୍ରୁଟି ପାଇଛନ୍ତି। ଏହି ତ୍ରୁଟିର ସୁଯୋଗ ନେଇ ହ୍ୟାକର୍ସ ଆପଣଙ୍କ ବ୍ୟକ୍ତିଗତ ତଥ୍ୟ ଚୋରି କରିପାରିବାର ଅନେକ ସମ୍ଭାବନା ରହିଛି। ଏହି ତ୍ରୁଟି ଯୋଗୁଁ ଆପଣଙ୍କ ଆକାଉଣ୍ଟ ମଧ୍ୟ ହ୍ୟାକ୍ ହୋଇପାରେ। 

ସରକାର ବ୍ୟବହାରକାରୀମାନଙ୍କୁ ତୁରନ୍ତ ସେମାନଙ୍କର ହ୍ୱାଟସଆପକୁ ଅପଡେଟ୍ କରିବାକୁ ପରାମର୍ଶ ଦେଇଛନ୍ତି। ନୂତନ ଅପଡେଟରେ ଏହି ତ୍ରୁଟିଗୁଡ଼ିକୁ ସଂଶୋଧନ କରାଯାଇଛି। ଏହା ବ୍ୟତୀତ, ଯେକୌଣସି ସନ୍ଦିଗ୍ଧ ଲିଙ୍କ୍ ଉପରେ କ୍ଲିକ୍ ନକରିବାକୁ ବ୍ୟବହାରକାରୀମାନଙ୍କୁ ପରାମର୍ଶ ଦିଆଯାଇଛି।

ଯଦି କୌଣସି ଅଜଣା ବ୍ୟକ୍ତି ମେସେଜ୍ ପଠାଏ, ତେବେ ଏହାକୁ ଅଣଦେଖା କରନ୍ତୁ ଏବଂ ତୁରନ୍ତ ତାହାକୁ ବ୍ଲକ୍ କରିବା ପାଇଁ ସରକାର ଚେତାବନୀ ଦେଇଛନ୍ତି।