ବିଜେପି ବିବାହ ଶୋଭାଯାତ୍ରାରେ ବର କିଏ: ସଂକଳ୍ପ ପତ୍ର ନେଇ ମନୀଷ ସିସୋଡିଆଙ୍କ କଟାକ୍ଷ

ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଖେଇ ଆସୁଛି ଏବଂ ରାଜନୈତିକ ବାତାବରଣ ଉଷ୍ଣ ହେବାରେ ଲାଗିଛି।  ଏହି କ୍ରମରେ ଶନିବାର ଦିନ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଭାରତୀୟ ଜନତା ପାର୍ଟି(ବିଜେପି)ର ସଂକଳ୍ପ ପତ୍ର ପ୍ରକାଶ କରିଛନ୍ତି।

ଏହି ସଂକଳ୍ପ ପତ୍ରରେ ତିନି ବର୍ଷ ମଧ୍ୟରେ ଯମୁନାକୁ ସଫା କରିବାକୁ, ୧,୭୦୦ ଅନଧିକୃତ ବସତିକୁ ମାଲିକାନା ଅଧିକାର ପ୍ରଦାନ କରିବା ତଥା ଶ୍ରମିକଙ୍କ ପାଇଁ କଲ୍ୟାଣକାରୀ ଯୋଜନା ପ୍ରଣୟନ କରିବାକୁ ପ୍ରତିଶ୍ରୁତି ପ୍ରଦାନ କରାଯାଇଛି। ଏହାକୁ ନେଇ ଆମ୍ ଆଦମୀ ପାର୍ଟି (ଏଏପି)ର ନେତା ତଥା ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ ବିଜେପିକୁ କଟାକ୍ଷ କରିଛନ୍ତି।

ମନୀଷ ସିସୋଡିଆ ବିଜେପିର ସିଏମ ଚେହେରାକୁ ନେଇ ପ୍ରଶ୍ନ ଉଠାଇଛନ୍ତି। ସେ କଟାକ୍ଷ କରି କହିଛନ୍ତି, ପ୍ରଥମେ ଆମକୁ କୁହ ଯେ, ବିଜେପିର ବିବାହ ଶୋଭାଯାତ୍ରାରେ ବର କିଏ ? ସେମାନଙ୍କର ମୁଖ୍ୟ ମନ୍ତ୍ରୀ କିଏ ? ଅମିତ ଶାହଙ୍କ ଘୋଷଣାକୁ ନେଇ ସିସୋଡିଆ କହିଛନ୍ତି ଯେ, ଦିଲ୍ଲୀ ନିର୍ବାଚନରେ ​​ପରାଜୟକୁ ବିଜେପି ନିର୍ବାଚନ ପୂର୍ବରୁ ଗ୍ରହଣ କରିସାରିଛି। ସିସୋଡିଆ ବିଜେପିର ସଂକଳ୍ପ ପତ୍ରରେ ଦିଆଯାଇଥିବା ପ୍ରତିଶ୍ରୁତିକୁ ନେଇ କଡ଼ା ସମାଲୋଚନା କରିଛି।

୫୦ ହଜାର ଚାକିରି ଯୋଗାଇବାର ପ୍ରତିଶ୍ରୁତି ଉପରେ ପ୍ରଶ୍ନ କରି ସେ କହିଛନ୍ତି ଯେ, ଦିଲ୍ଲୀର ଜନସଂଖ୍ୟା ୨.୫କୋଟି, ଏବଂ ଏପରି ପରିସ୍ଥିତିରେ କେବଳ ୫୦ ହଜାର ଚାକିରି ଦେବାର ପ୍ରତିଶ୍ରୁତି ହାସ୍ୟାସ୍ପଦ ଅଟେ। ଏଥିସହ ସେ କହିଛନ୍ତି, କୋଭିଡ ଅବଧି ତଥା ତା’ପରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ୧୨ ଲକ୍ଷ ଚାକିରି ଦେଇଛନ୍ତି।

ସିସୋଡିଆ ସିଲିଂ ପ୍ରସଙ୍ଗରେ ବିଜେପିକୁ କଡ଼ା ସମାଲୋଚନା କରି ସେ କହିଛନ୍ତି ଯେ, ବିଜେପି ବର୍ତ୍ତମାନ ଦୋକାନ ଖୋଲିବା କଥା କହୁଛି, ପୂର୍ବରୁ ଏହି ଦଳ ସିଲିଂ କରିବା ପାଇଁ ଦାୟୀ ଥିଲା। ଯେତେବେଳେ ଆମେ ବ୍ୟବସାୟୀମାନଙ୍କ ପାଇଁ ଠିଆ ହୋଇଥିଲୁ, ସେମାନେ ଏହାକୁ ବିରୋଧ କରୁଥିଲେ।

ବର୍ତ୍ତମାନ ସେମାନେ ସିଲିଂ ହଟାଇବା ବିଷୟରେ କହୁଛନ୍ତି। ଏସବୁ ହେଉଛି ନିର୍ବାଚନ ସ୍ଲୋଗାନ। ଦିଲ୍ଲୀର ବ୍ୟବସାୟୀଙ୍କ ସୁରକ୍ଷା ସମ୍ପର୍କରେ ସେ କହିଛନ୍ତି ଯେ, ବ୍ୟବସାୟୀମାନେ ଭୟଭୀତ ଅଛନ୍ତି। ଗ୍ୟାଙ୍ଗଷ୍ଟରଙ୍କ ଦ୍ୱାରା ଧମକ ଓ ଗୁଳି ବିନିମୟ ଘଟଣାରେ ସିସୋଡିଆ କହିଛନ୍ତି ଯେ, ବିଜେପି କେବଳ ପ୍ରତିଶ୍ରୁତି ଦେଉଥିବାବେଳେ ବ୍ୟବସାୟୀମାନେ ସୁରକ୍ଷା ଆବଶ୍ୟକ କରୁଛନ୍ତି। 

ଅଧିକ ପଢ଼ନ୍ତୁ: ଭାରତ-ବାଂଲାଦେଶ ସୀମା ଉତ୍ତେଜନା: ବିଏସଏଫ-ବିଜିବି ମୁଖ୍ୟଙ୍କ ମଧ୍ୟରେ ଶାନ୍ତି ପ୍ରୟାସ

ଆଇନଜୀମୀମାନଙ୍କୁ ବୀମା ଯୋଗାଇଦେବାକୁ ବିଜେପିର ପ୍ରତିଶ୍ରୁତି ଉପରେ ସିସୋଡିଆ ମଧ୍ୟ ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି ଯେ, ଦିଲ୍ଲୀ ସରକାର ଆଇନଜୀବୀମାନଙ୍କୁ ବୀମା ଯୋଗାଇ ସାରିଛନ୍ତି। ଏହା ବ୍ୟତୀତ ସେ ବିଜେପିର ବୈଦ୍ୟୁତିକ ବସ୍ ପ୍ରତିଶ୍ରୁତିକୁ ମଧ୍ୟ ଖଣ୍ଡନ କରି କହିଛନ୍ତି, ଦିଲ୍ଲୀରେ କେଜ୍ରିୱାଲ ସରକାର ସର୍ବାଧିକ ସଂଖ୍ୟକ ଇ-ବସ୍ ଚଳାଉଛନ୍ତି। ସିସୋଡିଆ କହିଛନ୍ତି, ବିଜେପିର ଏହି ସଂକଳ୍ପ ପତ୍ର କେବଳ ଠକାମିର ଏକ ପତ୍ର। ଏହା ସ୍ପଷ୍ଟ ଯେ, ସେମାନେ ସେମାନଙ୍କର ପରାଜୟକୁ ଗ୍ରହଣ କରି ସାରିଛନ୍ତି।

ଅଧିକ ପଢ଼ନ୍ତୁ: କଳା, ସାହିତ୍ୟ ଓ ଚିକିତ୍ସା କ୍ଷେତ୍ରରେ ଅବଦାନ ପାଇଁ ଓଡ଼ିଶାରୁ ୪ ଜଣଙ୍କୁ ‘ପଦ୍ମଶ୍ରୀ’