ଆତିଶୀ କାହିଁକି ଆପ୍‌ର ସ୍ପଷ୍ଟ ପସନ୍ଦ?

ନୂଆଦିଲ୍ଲୀ: ଦିଲ୍ଲୀ କ୍ୟାବିନେଟରେ ଏକମାତ୍ର ମହିଳା ମନ୍ତ୍ରୀ ଆତିଶୀ ମାର୍ଲେନା ସିଂହଙ୍କୁ ଶାସକ ଆମ୍ ଆଦମୀ ପାର୍ଟି (ଆପ୍)ର ବିଧାୟକମାନେ ମଙ୍ଗଳବାର ଦିଲ୍ଲୀ ମୁଖ୍ୟମନ୍ତ୍ରୀ ପଦ ପାଇଁ ମନୋନୀତ କରିଛନ୍ତି। ଦିଲ୍ଲୀ ବିଧାନସଭା ନିର୍ବାଚନକୁ ଆଉ ମାତ୍ର କିଛି ମାସ ବାକି ଥିବା ବେଳେ ଆପ୍ ସରକାରରେ ସର୍ବାଧିକ ବିଭାଗ ସମ୍ଭାଳିଥିବା କାଲକାଜୀ ବିଧାୟିକା ଦଳର ମୁଖ୍ୟ ଅରବିନ୍ଦ କେଜ୍ରିୱାଲଙ୍କଠାରୁ ଦାୟିତ୍ୱ ଗ୍ରହଣ କରିବେ। ମଦ ନୀତି ମାମଲାରେ ଗିରଫ ହୋଇ ଅନ୍ତରୀଣ ଜାମିନରେ ଥିବା କେଜ୍ରିୱାଲ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାକୁ ଘୋଷଣା କରିବା ପରେ ଆପ୍‌ର ଅନେକ ନେତାଙ୍କ ନାମ ଚର୍ଚ୍ଚାରେ ରହିଥିଲା। ଏହି ପ୍ରାର୍ଥୀମାନଙ୍କ ମଧ୍ୟରେ ମନ୍ତ୍ରୀ ଆତିଶୀ, ଗୋପାଳ ରାୟ, କୈଳାସ ଗେହଲଟ, ସୌରଭ ଭରଦ୍ୱାଜ ଏବଂ ଅରବିନ୍ଦ କେଜ୍ରିୱାଲଙ୍କ ପତ୍ନୀ ସୁନୀତା କେଜ୍ରିୱାଲ ଥିଲେ। ତେବେ ମଦ ନୀତି ମାମଲାରେ କେଜ୍ରିୱାଲ ଓ  ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆ ଗିରଫ ହେବା ପରେ ଦଳରେ କେନ୍ଦ୍ରୀୟ ଭୂମିକା ଗ୍ରହଣ କରିଥିବାରୁ ଆତିଶୀ ଏହି ପଦ ପାଇଁ ସବୁଠାରୁ ଆଗରେ ଥିଲେ।

ମାର୍ଚ୍ଚ ୨୧ରେ କେଜ୍ରିୱାଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ଗିରଫ କରିଥିଲା। ତାଙ୍କ ପୂର୍ବତନ ଡେପୁଟି ମନୀଷ ସିସୋଦିଆ ମଧ୍ୟ ଜେଲରେ ଥିବାରୁ ଦଳ ଓ ସରକାରରେ କୌଣସି ସେକେଣ୍ଡ୍ କମାଣ୍ଡ୍ ନ ଥିଲା। ଦଳୀୟ ମୁଖ୍ୟଙ୍କ ଗିରଫଦାରୀକୁ ନେଇ ଆତିଶୀ କେନ୍ଦ୍ରୀୟ ଆଭିମୁଖ୍ୟ ଗ୍ରହଣ କରିଥିଲେ ଏବଂ ସୌରଭ ଭରଦ୍ୱାଜଙ୍କ ସହ ମିଶି ଲୋକସଭା ନିର୍ବାଚନ ସମୟରେ ସରକାରଙ୍କ ଦାୟିତ୍ୱ ତୁଲାଇଥିଲେ। ଏହି ସମୟରେ ସେ ଦିଲ୍ଲୀରେ ଥିବା ତାଙ୍କ ସହକର୍ମୀମାନଙ୍କ ମଧ୍ୟରେ ସର୍ବାଧିକ ଗଣମାଧ୍ୟମରେ ଉପସ୍ଥିତ ଥିଲେ, ଯାହା ତାଙ୍କୁ ଘରେ ଘରେ ପରିଚିତ କରାଇଥିଲା। ଜୁନ୍ ମାସରେ ସେ ହରିୟାଣା ସରକାରଙ୍କ ବିରୋଧରେ ଅନିର୍ଦ୍ଦିଷ୍ଟ କାଳ ପାଇଁ ଅନଶନରେ ବସିଥିଲେ କାରଣ ଏହା ଦୈନିକ ୧୦୦ ନିୟୁତ ଗ୍ୟାଲନ୍ ପାଣି ନ ଛାଡ଼ିବାରୁ ଜାତୀୟ ରାଜଧାନୀରେ ଜଳ ସଙ୍କଟ ସୃଷ୍ଟି କରିଥିଲା।  

ଗତ ବର୍ଷ ମାର୍ଚ୍ଚ ୯ ତାରିଖରେ ଆପ୍ ବିଧାୟିକା ଆତିଶୀ ଦିଲ୍ଲୀ କ୍ୟାବିନେଟରେ ମନ୍ତ୍ରୀ ଭାବେ ଶପଥ ନେଇଥିଲେ। ଦୁର୍ନୀତି ଓ ମନିଲଣ୍ଡରିଂ ମାମଲାରେ ତିହାର ଜେଲରେ ଥିବା ମନୀଷ ସିସୋଦିଆ ଓ ସତ୍ୟେନ୍ଦ୍ର ଜୈନଙ୍କ ଇସ୍ତଫା ପରେ ତାଙ୍କୁ ଦିଲ୍ଲୀ କ୍ୟାବିନେଟରେ ସ୍ଥାନ ମିଳିଥିଲା। ଆତିଶୀଙ୍କୁ ୧୪ଟି ବିଭାଗ - ଶିକ୍ଷା, ଅର୍ଥ, ଯୋଜନା, ପିଡବ୍ଲ୍ୟୁଡି, ଜଳ, ଶକ୍ତି ଏବଂ ଲୋକସମ୍ପର୍କ ଆଦି ପ୍ରମୁଖ ମନ୍ତ୍ରଣାଳୟର ଦାୟିତ୍ୱ ମିଳିଥିଲା। ସେ ୨୦୧୮ ଏପ୍ରିଲ ପର୍ଯ୍ୟନ୍ତ ପୂର୍ବତନ ଶିକ୍ଷାମନ୍ତ୍ରୀ ମନୀଷ ସିସୋଦିଆଙ୍କ ପରାମର୍ଶଦାତା ଥିଲେ। ଅକ୍ସଫୋର୍ଡ‌୍ ସ୍କଲାର ଆତିଶୀ ଆମ୍ ଆଦମୀ ପାର୍ଟିର ସବୁଠାରୁ ଶିକ୍ଷିତ ସଦସ୍ୟଙ୍କ ମଧ୍ୟରୁ ଅନ୍ୟତମ। ସେ ଦିଲ୍ଲୀ ବିଶ୍ୱବିଦ୍ୟାଳୟର ସେଣ୍ଟ ଷ୍ଟିଫେନ୍ କଲେଜରେ ଶିକ୍ଷା ସମାପ୍ତ କରିଥିଲେ ଏବଂ ପରେ ଅକ୍ସଫୋର୍ଡ ବିଶ୍ୱବିଦ୍ୟାଳୟରେ ଅଧିକ ଅଧ୍ୟୟନ କରିଥିଲେ। ଆପ୍ ସହ ଜଡ଼ିତ ହେବା ପୂର୍ବରୁ ସେ ମଧ୍ୟପ୍ରଦେଶର ଏକ ଛୋଟ ଗାଁରେ ୭ ବର୍ଷ ବିତାଇଥିଲେ ଯେଉଁଠାରେ ସେ ଜୈବିକ କୃଷି ଓ ପ୍ରଗତିଶୀଳ ଶିକ୍ଷା ବ୍ୟବସ୍ଥା ସହ ଜଡ଼ିତ ହୋଇଥିଲେ।