‘ମୁଁ ୟୁପି ନିିର୍ବାଚନ ଲଢ଼ିବି; କିନ୍ତୁ, କେଉଁଠୁ? ଏ ନିଷ୍ପତ୍ତି ଦଳର’: ଯୋଗୀ ଆଦିତ୍ୟନାଥ

ଲକ୍ଷ୍ନୌ: ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଶନିବାର ନିଶ୍ଚିତ କରିଛନ୍ତି ଯେ ସେ ଆଗାମୀ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ, କିନ୍ତୁ ଯେଉଁଠାରୁ ଦଳର ନେତୃତ୍ୱ ନିଷ୍ପତ୍ତି ନେବେ ସେ ସେଠାରୁ ଲଢ଼ିବେ।
ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କୁ ସେ ଅଯୋଧ୍ୟା, ମଥୁରା କିମ୍ବା ତାଙ୍କ ନିଜ ଜିଲ୍ଲା ଗୋରଖପୁରରୁ ପ୍ରତିଦ୍ୱନ୍ଦ୍ୱିତା କରିବେ କି ବୋଲି ପଚରାଯିବାରୁ ସେ କହିଛନ୍ତି ଯେ ଯେଉଁଠାରୁ ଦଳ କହିବ ସେଠାରୁ ମୁଁ ନିର୍ବାଚନ ଲଢିବି।

ବର୍ତ୍ତମାନ ଉତ୍ତରପ୍ରଦେଶ ବିଧାନ ପରିଷଦର ସଦସ୍ୟ ଥିବା ଯୋଗୀ ଏଠାରେ ଗଣମାଧ୍ୟମ ସହ ବାର୍ତ୍ତାଳାପ ବେଳେ କହିଛନ୍ତି ଯେ ପାଞ୍ଚ ବର୍ଷର କାର୍ଯ୍ୟକାଳ ମଧ୍ୟରେ ତାଙ୍କୁ ଯାହା କୁହା ଯାଇଥିଲା ଓ ଯେଉଁ ସମସ୍ତ ଦାୟିତ୍ୱ ଦିଆ ଯାଇଥିଲା ସେସବୁକୁ ସେ ଦାୟିତ୍ୱପୂର୍ଣ୍ଣ ଭାବେ ନିର୍ବାହ କରିଛନ୍ତି। କୌଣସି କାମ ବାକି ନାହିଁ ଯାହା ପାଇଁ ସେ ଦୁଃଖ ପ୍ରକାଶ କରିବେ।

ତେବେ, ବିଜେପି ଏକ ବହୁତ ବଡ ପରିବାର ଏବଂ ଏଥିରେ ଲୋକଙ୍କ ଭୂମିକା ସମୟ ସହିତ ବଦଳିପାରେ ବୋଲି କହିଛନ୍ତି ମୁଖ୍ୟମନ୍ତ୍ରୀ ଯୋଗୀ। ପ୍ରତ୍ୟେକ ବ୍ୟକ୍ତିଙ୍କ ଭୂମିକା ବିଭିନ୍ନ ସମୟରେ ଭିନ୍ନ ଅଟେ। ଏହା ଆବଶ୍ୟକ ନୁହେଁ ଯେ ଜଣେ ବ୍ୟକ୍ତି ସର୍ବଦା ସରକାରରେ ରହିବା ଉଚିତ। ବେଳେବେଳେ ସେ ସଂଗଠନର କାର୍ଯ୍ୟ ମଧ୍ୟ କରିପାରିବେ ବୋଲି ସେ କହିଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି ଯେ ନିର୍ବାଚନ ପାଇଁ ତାରିଖ ଘୋଷଣା ହେଲେ ରାଜ୍ୟରେ ଆଦର୍ଶ ନିର୍ବାଚନ ଅଚରଣ ବିଧି ବା ପ୍ରୋଟୋକଲକୁ ଅନୁସରଣ କରାଯିବ।

୨୦୧୭ ନିର୍ବାଚନ ପରଠାରୁ କ’ଣ ପରିବର୍ତ୍ତନ ହୋଇଛି ସେ ବିଷୟରେ ପଚରାଯିବାରୁ ଆଦିତ୍ୟନାଥ କହିଛନ୍ତି: ୨୦୧୭ ରେ ଆମେ ରାଜ୍ୟ ସରକାରଙ୍କ ବିଫଳତା ଉପରେ ଲଢିଥିଲୁ। ଏଥର ଆମେ ଆମର ସଫଳତା ଆଧାରରେ ପ୍ରତିଦ୍ୱନ୍ଦ୍ୱିତା କରୁଛୁ। କ୍ଷମତାକୁ ଆସିବା ପରେ ଘରୋଇ ଗ୍ରାହକଙ୍କୁ ୩୦୦ ମାଗଣା ୟୁନିଟ୍‌ ବିଦ୍ୟୁତ୍‌ ଦେବାର ପ୍ରତିଶ୍ରୁତି ଉପରେ ମଧ୍ୟ ମୁଖ୍ୟମନ୍ତ୍ରୀ ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବଙ୍କ ପ୍ରତିଶ୍ରୁତି ଉପରେ ଆକ୍ଷେପ କରି କହିଛନ୍ତି ଯେ ରାଜ୍ୟର ଲୋକମାନେ ଜାଣନ୍ତି ଯେ ୨୦୧୭ ପୂର୍ବରୁ କେବଳ ପାଞ୍ଚଟି ଜିଲ୍ଲା ବିଦ୍ୟୁତ ଯୋଗାଣ ପାଉଥିଲେ।

ସେହିପରି, କ୍ଷମତାକୁ ଆସିବା ପରେ ମହିଳାମାନଙ୍କୁ ସ୍କୁଟି ଦେବା ପାଇଁ କଂଗ୍ରେସର ପ୍ରତିଶ୍ରୁତି ଉପରେ ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କୁ ପଚାରା ଯିବାରୁ ସେ ପାଲଟା ପଚାରିଛନ୍ତି ଯେ ପଞ୍ଜାବ, ଛତିଶଗଡ଼ ଏବଂ ରାଜସ୍ଥାନରେ କେତେ ସ୍କୁଟି ବଣ୍ଟନ କରାଯାଇଛି ଯେଉଁଠାରେ ଦଳର ସରକାର ଅଛି?