ଆଧିପତ୍ୟ କମୁଥିବାରୁ ପାଶ୍ଟାତ୍ୟ ଦେଶ ଚିନ୍ତିତ : ଜୟଶଙ୍କର

ନୂଆଦିଲ୍ଲୀ: ଭାରତ ଓ କାନାଡା ମଧ୍ୟରେ ବଢ଼ୁଥିବା ଉତ୍ତେଜନା କୁ ନେଇ ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି। ସୋମବାର ନୂଆଦିଲ୍ଲୀରେ ଆୟୋଜିତ ଏନଡିଟିଭି ବିଶ୍ୱ ଶିଖର ସମ୍ମିଳନୀ ୨୦୨୪ - 'ଦି ଇଣ୍ଡିଆ ସେଞ୍ଚୁରି'ରେ ଯୋଗଦେଇ ବୈଦେଶିକ ମନ୍ତ୍ରୀ କହିଛନ୍ତି, କାନାଡା ସହିତ ପ୍ରସଙ୍ଗ ଉଭୟ ଏକ ସାଧାରଣ ପାଶ୍ଚାତ୍ୟ ପ୍ରସଙ୍ଗ ଏବଂ କାନାଡା ପାଇଁ ଏକ ନିର୍ଦ୍ଦିଷ୍ଟ ପ୍ରସଙ୍ଗ। ଏହାର ଦ୍ବିତୀୟ ଚରିତ୍ର ରହିଛି। ବିଶ୍ବରେ ପରିବର୍ତ୍ତନ ଆସୁଛି । ବିଶ୍ୱସ୍ତରରେ ଶକ୍ତିର ସନ୍ତୁଳନ ବଦଳିବାରେ ଲାଗିଛି । ପାଶ୍ଚାତ୍ୟ ଦେଶମାନେ ଏହାକୁ ହଜମ କରିପାରୁନାହାନ୍ତି । କିନ୍ତୁ ସବୁ ପାଶ୍ଚାତ୍ୟ ଦେଶ ସମାନ ନୁହଁନ୍ତି। 

ଜୟଶଙ୍କର କହିଛନ୍ତି, ଯେତେବେଳେ ମୁଁ ଆମେରିକା କିମ୍ବା ୟୁରୋପ ଗସ୍ତ କରେ, ସେହି ଦେଶଗୁଡ଼ିକ କହୁଛନ୍ତି ଯେ ଭାରତ ସହ କାମ କରିବା ଅର୍ଥପୂର୍ଣ୍ଣ। କିନ୍ତୁ କାନାଡାରେ ଏଭଳି କଥା ଶୁଣିବାକୁ ମିଳୁନାହିଁ । ୧୯୪୫ ମସିହା ପରେ ବିଶ୍ୱ ବ୍ୟବସ୍ଥା ଅତ୍ୟନ୍ତ ପାଶ୍ଚାତ୍ୟ କେନ୍ଦ୍ରୀତ ଥିଲା । ୧୯୯୦ ଦଶକ ପରେ ଏହା ପାଶ୍ଚାତ୍ୟ କେନ୍ଦ୍ରୀତ ରହିଥିଲା। କିନ୍ତୁ ଗତ ୨୦ ବର୍ଷ ମଧ୍ୟରେ ସ୍ଥିତି ବଦଳିଯାଇଛି। ବିଶ୍ୱର ସନ୍ତୁଳନ ବଦଳିଯାଇଛି । ଅନେକ ଅଣ-ପାଶ୍ଚାତ୍ୟ ଦେଶ ପ୍ରଭାବଶାଳୀ ହୋଇଛନ୍ତି। ଅଣ-ପାଶ୍ଚାତ୍ୟ ଓ ପାଶ୍ଚାତ୍ୟ ଶକ୍ତିମାନଙ୍କ ମଧ୍ୟରେ ସମନ୍ୱୟ ବଦଳିବାରେ ଲାଗିଛି। ତେଣୁ ଏହାକୁ ବୁଝିବା ଓ ଆଡଜଷ୍ଟ କରିବା ସହଜ ନୁହେଁ। କାନାଡା ପାଇଁ ଏହା ଏକ ଚ୍ୟାଲେଞ୍ଜ।