ବୁନ୍ଦେଲଖଣ୍ଡ ତୋପ ଯୋଗୁଁ ଢିଲା ହୁଏ ପାକିସ୍ତାନର ପ୍ୟାଣ୍ଟ: ଯୋଗୀ

ଲଖନଉ: ଲୋକସଭା ନିର୍ବାଚନ ୨୦୨୪ ପାଇଁ ନେତାମାନଙ୍କ ମଧ୍ୟରେ ଏବେ ବୟାନବାଜି ଜୋର ଧରିଛି | ଆଜି ଉତ୍ତରପ୍ରଦେଶର ହମିରପୁର ଲୋକସଭା ଆସନରୁ ବିଜେପି ଟିକେଟରେ ହୋଇଥିବା ପ୍ରାର୍ଥୀଙ୍କ ପାଇଁ ଭୋଟ ମାଗିଥିଲେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ | ଆଉ ଯୋଗୀ ଆଜି କହିଛନ୍ତି ଯେ ଏଥର ଯଦି କେନ୍ଦ୍ରରେ ମୋଦୀ ସରକାର ଗଠନ ହୁଏ, ତେବେ ନୋଏଡା ଭଳି ବୁନ୍ଦେଲଖଣ୍ଡର ନିର୍ମାଣ କରାଯିବ | ସେ କହିଛନ୍ତି ଯେ ବୁନ୍ଦେଲଖଣ୍ଡରେ ତିଆରି ହେଉଥିବା ତୋପ ସୀମାରେ ଗର୍ଜନ କରୁଛି ଏବଂ ଏହି କାରଣରୁ ପାକିସ୍ତାନର ପ୍ୟାଣ୍ଟ ଢିଲା ହୋଇଯାଉଛି। ବାସ୍ତବରେ ବିଜେପିର ମିଶନ ଉତ୍ତରପ୍ରଦେଶ ଦାୟିତ୍ୱ ଖୋଦ ଯୋଗୀ ନେଇଛନ୍ତି |

ଏହି କାରଣରୁ ହମିରପୁର ଲୋକସଭା ପ୍ରାର୍ଥୀ ପୁଷ୍ପେନ୍ଦ୍ର ସିଂ ଚାନ୍ଦେଲଙ୍କ ସମର୍ଥନରେ ଆଜି ଏକ ବିଶାଳ ଜନସଭାକୁ ସମ୍ବୋଧିତ କରିଥିଲେ। ଯେଉଁଠାରେ ଇଣ୍ଡିଆ ମେଣ୍ଟ ଉପରେ ମଧ୍ୟ କଡ଼ା ଆକ୍ରମଣ କରିଥିଲେ । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଏସପି, ବିଏସପି ଏବଂ କଂଗ୍ରେସକୁ ନିନ୍ଦା କରିବା ସହ କହିଛନ୍ତି ଯେ ସେମାନେ କେବଳ ମାଫିଆ ଦେଇଛନ୍ତି। ୨୦୧୭ ପୂର୍ବରୁ, ଉତ୍ତରପ୍ରଦେଶରେ ଏସପି ଏବଂ ବିଏସପି ଲୁଟ୍ କରିଥିଲେ। ଯୋଗୀ କହିଛନ୍ତି ଯେ ଏହି ଲୋକମାନେ ଏଠାରେ ମାଫିଆ ସୃଷ୍ଟି କରିଥିଲେ, ଲୋକଙ୍କୁ ଶୋଷଣ କରିଥିଲେ ଏବଂ ଏହି ସ୍ଥାନର ବିକାଶ ପାଇଁ କୌଣସି ଯୋଜନା କରିନାହାଁନ୍ତି। ଜନସାଧାରଣଙ୍କୁ ନିବେଦନ କରି ଯୋଗୀ କହିଛନ୍ତି ଯେ ଏଥର ଆପଣ ଏପରି ଭାବରେ ଭୋଟ୍ ଦିଅନ୍ତୁ ଯେମିତି କି ସେମାନେ ଅମାନତ ହରାଇବେ |

ସେ କହିଛନ୍ତି ସମାଜବାଦୀ ପାର୍ଟିର ଲୋକମାନେ କହୁଛନ୍ତି ଯେ ଅଯୋଧ୍ୟାରେ ରାମ ମନ୍ଦିର ନିର୍ମାଣ ବ୍ୟର୍ଥ । ଯଦି ଏଠାରେ ନିର୍ମାଣ ହେବ ନାହିଁ, ତେବେ କଣ ଇଟାଲୀରେ ରାମ ମନ୍ଦିର ନିର୍ମାଣ ହେବ କି? ପୂର୍ବତନ ମୁଖ୍ୟମନ୍ତ୍ରୀ କଲ୍ୟାଣ ସିଂଙ୍କ ଦେହାନ୍ତରେ ସମାଜବାଦୀ ପାର୍ଟିରୁ କେହି ମଧ୍ୟ ସମବେଦନା ଜଣାଇ ନଥିଲେ | ଯେତେବେଳେ ଜଣେ ମାଫିଆର ମୃତ୍ୟୁ ହେଲା ସେମାନେ ସମବେଦନା ଜଣାଇଥିଲେ। ତାଙ୍କର ମାଫିଆଙ୍କ ପ୍ରତି ସହାନୁଭୂତି ଅଛି କିନ୍ତୁ ରାମ ଭକ୍ତଙ୍କ ପ୍ରତି ନାହିଁ |