ବହୁଦିନ ଲିଭ୍-ଇନ୍‌ରେ ରହିଲେ ଦୁଷ୍କର୍ମ ଅଭିଯୋଗ କରିପାରିବେ ନାହିଁ

ନୂଆଦିଲ୍ଲୀ: ବହୁଦିନ ଧରି ଲିଭ୍ ଇନ୍ ସଂପର୍କରେ ରହୁଥିବା  ମହିଳା ତାଙ୍କ ସାଥୀଙ୍କ ବିରୋଧରେ ଦୁଷ୍କର୍ମ ଅଭିଯୋଗ (ବିବାହ ପ୍ରତିଶ୍ରୁତି ଆଳରେ) ଆଣିପାରିବେ ନାହିଁ ବୋଲି ସୁପ୍ରିମ୍‌କୋର୍ଟ ଆଜି ଏକ ରାୟରେ କହିଛନ୍ତି। ଏଭଳି କ୍ଷେତ୍ରରେ ଶାରୀରିକ ସମ୍ପର୍କ କେବଳ ବିବାହ ପ୍ରତିଶ୍ରୁତି ଆଧାରରେ ହିଁ ହୋଇଛି ବୋଲି ନିଶ୍ଚିତ ଭାବେ ନିଷ୍ପତ୍ତି ନିଆଯାଇପାରିବ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ଲିଭ୍-ଇନ୍ ପାର୍ଟନରଙ୍କ ଦ୍ୱାରା ଦୁଷ୍କର୍ମ ଅଭିଯୋଗ ଆଣିଥିବା ଜଣେ ବ୍ୟାଙ୍କ ଅଧିକାରୀଙ୍କ ବିରୋଧରେ ଚାଲିଥିବା ଆପରାଧିକ ମାମଲାକୁ ରଦ୍ଦ କରିବା ଅବସରରେ ଅଦାଲତ ଏହି ମନ୍ତବ୍ୟ ଦେଇଛନ୍ତି।

ଜଷ୍ଟିସ୍ ବିକ୍ରମ ନାଥ ଓ ଜଷ୍ଟିସ୍ ସନ୍ଦୀପ ମେହେଟ୍ଟାଙ୍କୁ ନେଇ ଗଠିତ ଖଣ୍ଡପୀଠ ଆଜି ବିବାହର ପ୍ରତିଶ୍ରୁତି ଆଧାରରେ ୧୬ ବର୍ଷ ଧରି ଅଭିଯୁକ୍ତଙ୍କ ସହ ଯୌନ ସମ୍ପର୍କ ରଖିଥିବା ଅଭିଯୋଗ ଆଣିଥିବା ଜଣେ ମହିଳା ଅଧ୍ୟାପକଙ୍କ ଆବେଦନକୁ ଖାରଜ କରିଦେଇଛନ୍ତି। ଅଦାଲତ କହିଛନ୍ତି ଯେ ଉଭୟ ବ୍ୟକ୍ତି ସୁଶିକ୍ଷିତ ଏବଂ ସ୍ବେଚ୍ଛାକୃତ ଭାବରେ ସହମତିକ୍ରମେ ସମ୍ପର୍କ ବଜାୟ ରଖିଥିଲେ ଏବଂ ବିଭିନ୍ନ ସହରରେ ରହୁଥିବା ସମୟରେ ମଧ୍ୟ ବାରମ୍ବାର ପରସ୍ପରର ବାସଭବନକୁ ଯାଆନ୍ତି। ଏଥିରେ ଦର୍ଶାଯାଇଥିଲା ଯେ ଏହି ମାମଲାରେ ଏକ ବିଫଳ ପ୍ରେମ ସମ୍ପର୍କ କିମ୍ବା ଲିଭ୍-ଇନ୍ ସଂପର୍କ ପ୍ରତିଫଳିତ ହୋଇଥିଲା ଯାହା ତିକ୍ତ ହୋଇଯାଇଥିଲା।  

ଅଦାଲତ କହିଛନ୍ତି-‘ବିବାହର ମିଥ୍ୟା ପ୍ରତିଶ୍ରୁତି ଦେଇ ଯୌନ ଶୋଷଣ କରାଯାଇଥିବା ସଂପର୍କରେ ଅଭିଯୋଗକାରୀ ପୂର୍ବରୁ କୌଣସି ମହଲରେ ପ୍ରତିବାଦ କରିନଥିଲେ।  ତେଣୁ ସେ ୧୬ ବର୍ଷ ଧରି ଆବେଦନକାରୀଙ୍କ ଦାବି ଆଗରେ ମୁଣ୍ଡ ନୁଆଁଇ ଚାଲିଥିଲେ ବୋଲି ବିଶ୍ୱାସ କରିବା କଷ୍ଟକର। ୧୬ ବର୍ଷ ଧରି ଉଭୟ ପକ୍ଷଙ୍କ ମଧ୍ୟରେ ଶାରୀରିକ ସମ୍ପର୍କ ନିରବଚ୍ଛିନ୍ନ ଭାବରେ ଚାଲିଥିବାରୁ  ଏହାକୁ ବଳପ୍ରୟୋଗ ବା ଠକେଇର ଉପାଦାନ ଭାବେ ଗ୍ରହଣ କରାଯାଇପାରିବ ନାହିଁ।’ ଯଦିଓ ମିଥ୍ୟା ପ୍ରତିଶ୍ରୁତି ଦିଆଯାଇଥିଲା ବୋଲି ଧରାଯାଏ, ତେବେ ସମ୍ପର୍କର ଲମ୍ବା ଅବଧି ଅଭିଯୋଗକାରୀଙ୍କ ଦାବିକୁ ଗୌଣ କରିଦେଉଛି। ତାଙ୍କ ସଂପର୍କ ସହମତି କେବଳ ବିବାହ ଆଶା ଉପରେ ଆଧାରିତ ଥିଲା। ବହୁଦିନ ଧରି ସମ୍ପର୍କ ଚାଲିଲେ ଏଭଳି ଦାବି ବିଶ୍ୱସନୀୟତା ହରାଇଥାଏ ବୋଲି କୋର୍ଟ କହିଛନ୍ତି।