ଏଥିପାଇଁ ଗ୍ୟାଙ୍ଗଷ୍ଟର ଲରେନ୍ସର ଭାଇ ଅନମୋଲକୁ ଗିରଫ କଲା ଆମେରିକା ପୁଲିସ

ନୂଆଦିଲ୍ଲୀ: ଆମେରିକାର ଇମିଗ୍ରେସନ ଏବଂ କଷ୍ଟମ ଏନଫୋର୍ସମେଣ୍ଟ ବିଭାଗ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇର ଭାଇ ଅନମୋଲ ବିଷ୍ଣୋଇକୁ ଗିରଫ କରିଛି | ରିପୋର୍ଟ ଅନୁଯାୟୀ, ଲରେନ୍ସ  ବିଷ୍ଣୋଇର ଭାଇ ଅନମୋଲ ବିଷ୍ଣୋଇକୁ କାଲିଫର୍ଣ୍ଣିଆରୁ ଗିରଫ କରାଯାଇଛି | ଆମେରିକାର ଇମିଗ୍ରେସନ ଏବଂ କଷ୍ଟମ ଏନଫୋର୍ସମେଣ୍ଟ ବିଭାଗର ଡକ୍ୟୁମେଣ୍ଟ ଅନୁଯାୟୀ ଗତ ସପ୍ତାହରେ ବିଭାଗ ଦ୍ୱାରା ଅନମୋଲକୁ ଗିରଫ କରାଯାଇଥିଲା, ଏବେ ତାଙ୍କୁ ପୋଟାୱାଟାମି କାଉଣ୍ଟି ଜେଲରେ ରଖାଯାଇଛି।

ସୂତ୍ର ଅନୁଯାୟୀ, ଅନମୋଲ ବେଆଇନ ଡକ୍ୟୁମେଣ୍ଟ ସହ ଆମେରିକାରେ ପ୍ରବେଶ ହେତୁ ଗିରଫ କରାଯାଇଛି, ଯାହା ବିଷୟରେ ଭାରତ ସରକାର ଆମେରିକା ପ୍ରଶାସନକୁ ସୂଚନା ଦେଇଥିଲେ । ଏହି ସୂଚନା ପରେ ଆମେରିକାର ଇମିଗ୍ରେସନ ଆଣ୍ଡ କଷ୍ଟମ ଏନଫୋର୍ସମେଣ୍ଟ (ICE) ବିଭାଗ ଅନମୋଲକୁ ଅଟକ ରଖିଛି। ସଲମାନ ଖାନଙ୍କ ଘର ସାମ୍ନାରେ ଗୁଳିଚାଳନା ସହ ଅନେକ ହାଇ ପ୍ରୋଫାଇଲ ହତ୍ୟା ପଛରେ ଅନମୋଲ ଜଡିତ ଅଛି ।

ଅନମୋଲକୁ ଗ୍ୟାଙ୍ଗରେ ଛୋଟ ଗୁରୁଜୀ ଏବଂ ଛୋଟ୍ ଡନ୍ ଭାବରେ ଡକାଯାଏ | ଯଦିଓ ଅନମୋଲ ବିଷ୍ଣୋଇ ଭାଇ ଲରେନ୍ସଙ୍କଠାରୁ ୬ ବର୍ଷ ସାନ, କିନ୍ତୁ ଅପରାଧ ଦୁନିଆରେ ତା'ର ସ୍ଥିତି ବହୁତ ମଜଭୁତ | ମାତ୍ର ୨୫ ବର୍ଷ ବୟସରେ, ଆମେରିକା, କାନାଡା, ଆଜେରବାଇଜାନ, ୟୁଏଇ, ପର୍ତ୍ତୁଗାଲ, କେନିଆ ଏବଂ ମେକ୍ସିକୋ ବ୍ୟତୀତ ଭାରତର ଅନେକ ସହରରେ ତା ନେତୃତ୍ୱରେ ଏକ ହଜାରରୁ ଅଧିକ ସୁଟର କାର୍ଯ୍ୟ କରୁଛନ୍ତି। ଗତ ବର୍ଷ ୨୦୨୩ ମସିହାରେ ଲରେନ୍ସ ବିଷ୍ଣୋଇର ଭାଇ ଭାରତ ଛାଡି ପଳାଇଥିଲା। ଏହାର ନାମରେ ଅନେକ ପ୍ରମୁଖ ଅପରାଧିକ ମାମଲା ପଞ୍ଜିକୃତ ହୋଇଛି, ଯେଉଁଥିରେ ୨୦୨୨ ମସିହାରେ ଘଟିଥିବା ପଞ୍ଜାବୀ ଗାୟକ ସିଦ୍ଧୁ ମୋସେୱାଲାଙ୍କ ହତ୍ୟା ମାମଲା ମଧ୍ୟ ଅନ୍ତର୍ଭୁକ୍ତ ହୋଇଛି। ମହାରାଷ୍ଟ୍ରର ପୂର୍ବତନ ମନ୍ତ୍ରୀ ତଥା ଏନସିପି ନେତା ବାବା ସିଦ୍ଦିକିଙ୍କ ହତ୍ୟାରେ ମଧ୍ୟ ଅନମୋଲ ବିଷ୍ଣୋଇଙ୍କ ନାମ ମଧ୍ୟ ଆସିଛି।