ସାମ୍ନାକୁ ଆସିଲା ଯଶସ୍ବୀଙ୍କ ମୁମ୍ବାଇ ଛାଡିବା ପଛର କାରଣ!

ମୁମ୍ବାଇ: ଆଇପିଏଲ ୨୦୨୫ ମଧ୍ୟରେ, ଏକ ଖବର ଚାଞ୍ଚଲ୍ୟ ସୃଷ୍ଟି କରିଥିଲା ​​ଯେତେବେଳେ ଜଣାପଡିଲା ଯେ ଯଶସ୍ୱୀ ଜୟସୱାଲ ମୁମ୍ବାଇ ଦଳ ଛାଡି ଘରୋଇ ଟୁର୍ଣ୍ଣାମେଣ୍ଟରେ ଗୋଆ ପାଇଁ ଖେଳିବାକୁ ଚାହୁଁଛନ୍ତି। ସେ ଏ ବିଷୟରେ ଏମସିଏ (ମୁମ୍ବାଇ କ୍ରିକେଟ୍ ଆସୋସିଏସନ୍)କୁ ଏକ ଇମେଲ୍ ମଧ୍ୟ ଲେଖିଥିଲେ ଏବଂ ଏନଓସି ମାଗିଥିଲେ। ଏହା ପରେ, ଜୟସୱାଲ ଏହାକୁ ନିଶ୍ଚିତ କରିଥିଲେ ଏବଂ କହିଥିଲେ ଯେ ସେ ନୂତନ ସୁଯୋଗ ପାଇଁ ଗୋଆ ଦଳରେ ଯୋଗ ଦେବାକୁ ନିଷ୍ପତ୍ତି ନେଇଛନ୍ତି। ସେ ଗୋଆର ଅଧିନାୟକ ହେବେ। ଏବେ ଏକ ନୂତନ ରିପୋର୍ଟ ଆସିଛି, ଯେଉଁଥିରେ ଏକ ଆଶ୍ଚର୍ଯ୍ୟଜନକ ଖୁଲାସା ହୋଇଛି।

ରିପୋର୍ଟ ଅନୁଯାୟୀ, ରଣଜୀ ଟ୍ରଫିରେ ଜମ୍ମୁ-କାଶ୍ମୀର ବିପକ୍ଷରେ ପରାଜୟ ପରେ ପ୍ରଶିକ୍ଷକ ଯଶସ୍ୱୀ ଜୟସୱାଲଙ୍କୁ ଟାର୍ଗେଟ କରିଥିଲେ। ଆପଣଙ୍କୁ କହି ରଖୁଛୁ ଯେ ବିସିସିଆଇ ସମସ୍ତଙ୍କୁ ଜଣାଇ ଦେଇଥିଲା ଯେ ଯେଉଁ କ୍ରିକେଟରମାନେ ଅନ୍ତର୍ଜାତୀୟ କ୍ରିକେଟ ଖେଳୁନାହାଁନ୍ତି ସେମାନେ କୌଣସି କାରଣ ବିନା ଘରୋଇ କ୍ରିକେଟକୁ ମିସ୍ କରିପାରିବେ ନାହିଁ। ଏହା ପରେ, ଜୟସୱାଲ ମୁମ୍ବାଇ ପାଇଁ ଖେଳିଥିଲେ, କିନ୍ତୁ ଜମ୍ମୁ ଏବଂ କାଶ୍ମୀର ବିପକ୍ଷ ସେହି ମ୍ୟାଚ୍ ରେ, ସେ ପ୍ରଥମ ଇନିଂସରେ କେବଳ ୪ ରନ ଏବଂ ଦ୍ୱିତୀୟ ଇନିଂସରେ ୨୬ ରନ କରିଥିଲେ। ମୁମ୍ବାଇ ଏହି ମ୍ୟାଚ୍ ୫ ୱିକେଟରେ ହାରିଯାଇଥିଲା।

ରିପୋର୍ଟ ଅନୁଯାୟୀ, ଯଶସ୍ୱୀ ଏବଂ ରାହାଣେଙ୍କ ମଧ୍ୟରେ ଫାଟ ୨୦୨୨ ମସିହାରୁ ଆରମ୍ଭ ହୋଇଥିଲା । ରିପୋର୍ଟରେ କୁହାଯାଇଛି ଯେ ଜମ୍ମୁ ଏବଂ କାଶ୍ମୀର ବିପକ୍ଷରେ ଉଭୟ ଇନିଂସରେ ବିଫଳ ହେବା ପରେ ମୁମ୍ବାଇ ଦଳର ଅଧିନାୟକ ଅଜିଙ୍କ୍ୟ ରାହାଣେ ଏବଂ ପ୍ରଶିକ୍ଷକ ଓମକାର ସାଲଭି ଜୟସୱାଲଙ୍କ ପ୍ରତିବଦ୍ଧତା ଉପରେ ପ୍ରଶ୍ନ ଉଠାଇଥିଲେ। ଉଭୟ ଖେଳାଳି ବର୍ତ୍ତମାନ ଇଣ୍ଡିଆନ୍ ପ୍ରିମିୟର ଲିଗର ୧୮ତମ ସିଜିନରେ ଖେଳୁଛନ୍ତି। ଅଜିଙ୍କ୍ୟ ରାହାଣେ କୋଲକାତା ନାଇଟ୍ ରାଇଡର୍ସର ଅଧିନାୟକ ଥିବାବେଳେ, ତାଙ୍କ ଦଳ ଗୁରୁବାର ସିଜିନର ଦ୍ୱିତୀୟ ମ୍ୟାଚ୍ ଜିତିଛି। ଯଶସ୍ୱୀ ରାଜସ୍ଥାନ ରୟାଲ୍ସ ପାଇଁ ଖେଳୁଛନ୍ତି |