ଯେତିକି ସମ୍ମାନ ଅର୍ଜନ କରିଥିଲେ, ଏବେ ଧୋନି ତାହା ହରାଉଛନ୍ତି: ପୂର୍ବତନ କ୍ରିକେଟର

ନୂଆଦିଲ୍ଲୀ: ନିଜ ଅଧିନାୟକତ୍ୱରେ ଚେନ୍ନାଇ ସୁପର କିଙ୍ଗ୍ସକୁ ୫ଥର ଚାମ୍ପିଅନ କରିଥିବା ଏମଏସ ଧୋନି ତାଙ୍କ ଖରାପ ଫର୍ମ ପାଇଁ ସମାଲୋଚନାର ଶିକାର ହୋଇଛନ୍ତି। ଶନିବାର ଅନୁଷ୍ଠିତ ମ୍ୟାଚ୍‌ରେ ଯେତେବେଳେ ଧୋନି ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ବ୍ୟାଟିଂ କରିବାକୁ ଆସିଥିଲେ, ସେତେବେଳେ ବିଜୟ ପାଇଁ ୫୬ ବଲ୍‌ରେ ୧୧୦ ରନ୍ ଆବଶ୍ୟକ ଥିଲା। ପ୍ରଶଂସକମାନେ ଆଶା କରିଥିଲେ ଯେ ଧୋନି ଆଜି ମ୍ୟାଚ୍ ଶେଷ କରିବେ। ଏହି ମ୍ୟାଚ୍ ଦେଖିବା ପାଇଁ ତାଙ୍କ ବାପାମାଆ ମଧ୍ୟ ଷ୍ଟାଡିୟମକୁ ଆସିଥିଲେ। କିନ୍ତୁ ଧୋନି ଜିତାଇ ପାରିଲେ ନାହିଁ। ବିଜୟ ଶଙ୍କର ୬୯ ରନ୍ କରି ଅପରାଜିତ ରହିଥିଲେ ଏବଂ ଧୋନି ୨୬ ବଲ୍ ରୁ ମାତ୍ର ୩୦ ରନ୍ କରିଥିଲେ।

ଏମଏସ ଧୋନିଙ୍କ ଧିମା ଇନିଂସ କୌଣସି ପ୍ରକାରେ ପରାଜୟର ଏକ ପ୍ରମୁଖ କାରଣ ପାଲଟିଥିଲା। ଶେଷ ଓଭରଗୁଡ଼ିକରେ ୧୧୫ ଷ୍ଟ୍ରାଇକ୍ ରେଟ୍‌ରେ ବ୍ୟାଟିଂ କରିବା ସଠିକ୍ ବୋଲି ବିବେଚନା କରାଯାଇପାରିବ ନାହିଁ ବୋଲି ସୋସିଆଲ ମିଡିଆରେ ବିଭିନ୍ନ ପ୍ରତିକ୍ରିୟା ଆସୁଛି | କିନ୍ତୁ ଧୋନିଙ୍କ ସହ ଖେଳିଥିବା ମନୋଜ ତିୱାରୀ କଡ଼ା ଭାଷାରେ ଧୋନିଙ୍କୁ ପରାମର୍ଶ ଦେଇଛନ୍ତି ଯେ ତାଙ୍କୁ ୨୦୨୩ ପରେ ଆଇପିଏଲରୁ ଅବସର ନେବା ଉଚିତ ଥିଲା।

ଧୋନିଙ୍କ ସହିତ ଡ୍ରେସିଂ ରୁମ୍ ସେୟାର କରିଥିବା ମନୋଜ ତିୱାରୀ କହିଛନ୍ତି, "ଯଦି ମୁଁ କଠୋର ହୋଇଯାଏ ତେବେ ମୋତେ କ୍ଷମା କରିଦିଅ, ପ୍ରଶଂସକମାନେ ରାଗିପାରନ୍ତି। ମୋ ମତରେ, ତାଙ୍କ (ଏମ୍ ଏସ୍ ଧୋନି) ଅବସର ନେବାର ସଠିକ୍ ସମୟ ଥିଲା ୨୦୨୩ ଯେତେବେଳେ ତାଙ୍କ ଦଳ ଟାଇଟଲ୍ ଜିତିଥିଲା। ସେ ଏହା ପରେ ଅବସର ନେବା ଉଚିତ ଥିଲା। ମୁଁ ଅନୁଭବ କରୁଛି ଯେ ସେ କ୍ରିକେଟରୁ ଯେଉଁ ନାମ ଏବଂ ସମ୍ମାନ ଅର୍ଜନ କରିଛନ୍ତି, ଏବେ ତାହା ହରାଉଛନ୍ତି । 

ସେ ଆହୁରି କହିଛନ୍ତି, "ସେ ଚେଷ୍ଟା କରୁଛନ୍ତି କିନ୍ତୁ ପ୍ରଶିକ୍ଷକ ଫ୍ଲେମିଂ ମଧ୍ୟ କହୁଛନ୍ତି ଯେ ସେ ୧୦ ଓଭରରୁ ଅଧିକ ଦୌଡ଼ିପାରିବେ ନାହିଁ କିନ୍ତୁ ମୁଁ ବୁଝିପାରୁନାହିଁ ଯେ ଯଦି ଆପଣ ୨୦ ଓଭର ଫିଲ୍ଡିଂ କରିପାରିବେ, ୱିକେଟ୍ କିପିଂ କରିପାରିବେ, ଯେଉଁଠାରେ ଆପଣଙ୍କୁ ଉଠି ବସିବାକୁ ପଡିବ, ଡାଇଭ୍ କରିବାକୁ ପଡିବ, ତେବେ ଆପଣଙ୍କ ଆଣ୍ଠୁ ଆଘାତ ପାଇବ ନାହିଁ। କିନ୍ତୁ ଯେତେବେଳେ ଆପଣଙ୍କୁ ବ୍ୟାଟିଂ କରିବାକୁ ପଠାଯାଏ, ଯେଉଁଠାରେ ଲୋକଙ୍କ ଆଶା ଥାଏ, ସେତେବେଳେ ଆପଣ ୧୦ ଓଭର ବିଷୟରେ କଥା ହୁଅନ୍ତି। ମୁଁ ଭାବୁଛି ଏକ ଦୃଢ଼ ନିଷ୍ପତ୍ତି ନିଆଯିବା ଉଚିତ ଏବଂ ଯଦି ଏହା ଏବେ ସମ୍ଭବ ନୁହେଁ, ତେବେ ଏହାକୁ ଛାଡିଦିଅନ୍ତୁ ।"