ପୂର୍ବତନ ଵିଧାୟକଙ୍କୁ ଚାପୁଡ଼ା ମାରିଲେ ଅଟୋ ଡ୍ରାଇଭର, ସନ୍ଦେହଜନକ ଅବସ୍ଥାରେ ମିଳିଲା ନେତାଙ୍କ ମୃତଦେହ

ବେଲଗାଭି: କର୍ଣ୍ଣାଟକର ବେଲଗାଭିରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଏଠାରେ ଗୋଆର ଜଣେ ପୂର୍ବତନ ବିଧାୟକଙ୍କୁ ଜଣେ ଅଟୋ ଡ୍ରାଇଭର ଚାପୁଡ଼ା ମାରିଥିଲେ, ଘଟଣାର କିଛି ସମୟ ପରେ ପୂର୍ବତନ ବିଧାୟକଙ୍କ ମୃତ୍ୟୁ ହୋଇଥିଲା। ଏହି ଘଟଣା ଜଣାପଡ଼ିବା ପରେ ଉତ୍ତେଜନା ପ୍ରକାଶ ପାଇଛି।

ଶନିବାର ଦିନ ବେଲଗାଭି ସହରରେ ଜଣେ ଅଟୋ ଡ୍ରାଇଭରଙ୍କ ସହ ଝଗଡ଼ା ପରେ ପୂର୍ବତନ ଗୋଆ ବିଧାୟକ ଲାଭୁ ମାମଲେଦାରଙ୍କ ମୃତ୍ୟୁ ଘଟିଛି। ଝଗଡ଼ା ପରେ, ଯେତେବେଳେ ପୂର୍ବତନ ବିଧାୟକ ତାଙ୍କ ହୋଟେଲରେ ପ୍ରବେଶ କରୁଥିଲେ, ସେ ହଠାତ୍ ଚେତାଶୂନ୍ୟ ହୋଇ ପଡ଼ିଗଲେ ଏବଂ ତାଙ୍କର ମୃତ୍ୟୁ ହୋଇଗଲା। ପୂର୍ବତନ ବିଧାୟକଙ୍କ ବୟସ ୬୯ ବର୍ଷ ଥିବାବେଳେ ଏହି ମାମଲାରେ ଅଭିଯୁକ୍ତ ଅଟୋ ଡ୍ରାଇଭରକୁ ଗିରଫ କରାଯାଇଛି।

ଘଟଣାଟି ଅପରାହ୍ନ ପ୍ରାୟ ୧:୪୫ ସମୟରେ ଖାଡେବଜାରର ଶ୍ରୀନିବାସ ଲଜ୍ ନିକଟରେ ଘଟିଥିଲା। ଏକ ଅଟୋ ସହ ଲାଭୁ ମାମଲେଦାରଙ୍କ କାର ଘଶିହୋଇଯାଇଥିଲା | ଯାହା ପରେ ସେ ଅଟୋ ଡ୍ରାଇଭରଙ୍କ ସହ ଯୁକ୍ତିତର୍କ କଲେ। ବିବାଦ ଏତେ ବଢିଗଲା ଯେ ଅଟୋ ଡ୍ରାଇଭର ଲାଭୁ ମାମଲେଦାରଙ୍କୁ ଆକ୍ରମଣ କରି ଚାପୁଡ଼ା ମାରିଲେ। ଏହି ଝଗଡ଼ା ପରେ, ସେ ଲଜ୍ ଭିତରକୁ ପ୍ରବେଶ କରିବା ମାତ୍ରେ ତାଙ୍କର ମୃତ୍ୟୁ ହୋଇଗଲା।

ଖାଡେ ବଜାର ପୁଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତଙ୍କୁ ହେପାଜତକୁ ନେଇଥିଲା ଏବଂ ଡିସିପି ରୋହନ ଜଗଦୀଶ ଘଟଣାସ୍ଥଳ ପରିଦର୍ଶନ କରିଥିଲେ। ପ୍ରାପ୍ତ ସୂଚନା ଅନୁଯାୟୀ, ପୂର୍ବତନ ବିଧାୟକ ଜଣକ ଏକ ବ୍ୟବସାୟିକ କାମରେ ଯାଇଥିଲେ। ସେ ୨୦୧୨ ମସିହାରେ ରାଜନୀତିରେ ପ୍ରବେଶ କରିଥିଲେ। ପୂର୍ବରୁ, ମାମଲେଦାର ଗୋଆ ପୋଲିସରେ ଡିଏସ୍ପି ରାଙ୍କ ଅଧିକାରୀ ଥିଲେ।

ପୁଲିସ କହିଛି ଯେ ଲାଭୁ ମାମଲେଦାର ହଠାତ୍ ଏକ ହୋଟେଲର ସିଡ଼ି ପାଖରେ ପଡ଼ିଯାଇଥିଲେ। ତା’ପରେ ତାଙ୍କୁ ଡାକ୍ତରଖାନା ନିଆଯାଇଥିଲା, କିନ୍ତୁ ଭର୍ତ୍ତି କରିବା ପୂର୍ବରୁ ତାଙ୍କୁ ମୃତ ଘୋଷଣା କରାଯାଇଥିଲା। ପୁଲିସ ସିସିଟିଭି ଫୁଟେଜ୍ ମଧ୍ୟ ଜବତ କରିଛି, ଯାହାର ତଦନ୍ତ କରାଯାଉଛି।