ଜେଏମଏମ ଓ କଂଗ୍ରେସ ପାଇଁ ଟେନସନ ବଢ଼ାଇଲା ଆରଜେଡି

ରାଞ୍ଚି: ଝାଡଖଣ୍ଡ ବିଧାନସଭା ନିର୍ବାଚନ ପୂର୍ବରୁ ଇଣ୍ଡିଆ ମେଣ୍ଟ ସହଯୋଗୀ ଦଳମାନଙ୍କ ମଧ୍ୟରେ ବିବାଦ ଦେଖାଦେଇଛି | ବାସ୍ତବରେ ଗତକାଲି ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ କହିଥିଲେ ଯେ ଝାଡଖଣ୍ଡର ୮୧ଟି ବିଧାନସଭା ଆସନ ମଧ୍ୟରୁ ଜେଏମଏମ ଏବଂ କଂଗ୍ରେସ ୭୦ଟି ଆସନରେ ପ୍ରତିଦ୍ୱନ୍ଦ୍ୱିତା କରିବେ। ଏହା ବ୍ୟତୀତ ଆରଜେଡି, ସିପିଏମ୍  ଏବଂ ସେମାନଙ୍କର ଅନ୍ୟ ସହଯୋଗୀମାନେ ବାକି ସିଟରେ ପ୍ରତିଦ୍ୱନ୍ଦ୍ୱିତା କରିବେ। ଏନେଇ ରାଷ୍ଟ୍ରିୟ ଜନତା ଦଳ (ଆରଜେଡି) ଶନିବାର କହିଥିଲା ଯେ ଏହି ଘୋଷଣା ସେମାନଙ୍କୁ ନିରାଶ କରିଛି। ଆଜି ଆରଜେଡି ସାଂସଦ ମନୋଜ ଝାଙ୍କର ଏକ ବିବୃତ୍ତି ସାମ୍ନାକୁ ଆସିଛି ଯେଉଁଥିରେ ସେ କହିଛନ୍ତି ଯେ ଆମେ ୧୨-୧୩ ରୁ କମ୍ ଆସନ ସ୍ୱୀକାର କରିବୁ ନାହିଁ।

ଆରଜେଡି ସାଂସଦ ମନୋଜ ଝା କହିଛନ୍ତି ଯେ ଝାଡଖଣ୍ଡରେ ୧୮-୨୦ ସିଟ୍ ଉପରେ ଆମର ଦୃଢ଼ତା ରହିଛି, ଆମେ ୧୨-୧୩ରୁ କମ୍ ସିଟ୍ ଗ୍ରହଣ କରିବୁ ନାହିଁ। ଏଥିସହ ସେ ଏହା ମଧ୍ୟ କହିଛନ୍ତି ଯେ ଆମର ଏକମାତ୍ର ଉଦ୍ଦେଶ୍ୟ ହେଉଛି ବିଜେପିକୁ ପରାସ୍ତ କରିବା, ଆମେ ଇଣ୍ଡିଆ ମେଣ୍ଟର କୌଣସି କ୍ଷତି କରିବୁ ନାହିଁ କିନ୍ତୁ ଝାଡଖଣ୍ଡରେ ଏକୁଟିଆ ନିର୍ବାଚନରେ ଲଢ଼ିଲେ ବି ଇଣ୍ଡିଆ ମେଣ୍ଟର ୬୦-୬୨ ପ୍ରାର୍ଥୀଙ୍କୁ ସମର୍ଥନ କରିବୁ।

ଏହାପୂର୍ବରୁ ଶନିବାର ଦିନ ଆରଜେଡି ପକ୍ଷରୁ ମନୋଜ ଝା କହିଥିଲେ ଯେ ଇଣ୍ଡିଆ ଆଲାଇନ୍ସର ଦୁଇ ଦଳ ଦ୍ୱାରା ଆସନ ଘୋଷଣା ଏକପାଖିଆ। ସେ ସ୍ପଷ୍ଟ କରିଥିଲେ ଯେ ସେ ସମସ୍ତ ବିକଳ୍ପ ଖୋଲା ରଖିଛନ୍ତି। ସାଂସଦ ଝା କହିଥିଲେ, "ଆମ ସହ ଆଲୋଚନା କରାଯାଇନଥିଲା | ସମସ୍ତ ବିକଳ୍ପ ଆମ ପାଇଁ ଖୋଲା ଅଛି।"