'ଜେଲରେ ଖାଇବାକୁ ମିଳିବ ଭାବି ଆକ୍ରମଣ କଲି'

ବେଙ୍ଗାଲୁରୁ: ମଙ୍ଗଳବାର ବେଙ୍ଗାଲୁରୁ ମେଟ୍ରୋ ଟ୍ରାନ୍ସପୋର୍ଟ କର୍ପୋରେସନ ଅର୍ଥାତ୍ ବିଏମଟିସି ବସ୍‌ରେ ଏକ ବଡ଼ ଘଟଣା ଦେଖିବାକୁ ମିଳିଥିଲା। ବସ୍‌ରେ ଥିବା ଜଣେ ଯାତ୍ରୀ ହଠାତ୍ ଛୁରୀ ବାହାର କରି ବସ୍ କଣ୍ଡକ୍ଟର ଉପରେ ଆକ୍ରମଣ କରିଥିଲେ। ଆକ୍ରମଣର ଏକମାତ୍ର କାରଣ ହେଉଛି କଣ୍ଡକ୍ଟର ଯାତ୍ରୀମାନଙ୍କୁ ବସ୍ ସିଡ଼ିରୁ ଦୂରେଇ ଯିବାକୁ କହିଥିଲେ। ଅଭିଯୁକ୍ତ ଜଣକ ହରିଶ ସିହ୍ନା ବୋଲି ଜଣାପଡିଛି। ବାସ୍ତବରେ ହରିଶ ମଙ୍ଗଳବାର ସନ୍ଧ୍ୟାରେ ହ୍ୱାଇଟଫିଲ୍ଡ ଅଞ୍ଚଳରୁ ସିଟି ସେଣ୍ଟରକୁ ଯାଉଥିବା ଏକ ସିଟି ବସ୍‌ରେ ଯାତ୍ରା କରୁଥିଲେ। ଏହି ସମୟରେ ସେ ବସର କବାଟ ପାଖରେ ଠିଆ ହୋଇଥିଲେ | ତେଣୁ କଣ୍ଡକ୍ଟର ଯୋଗେଶ ହରିଶଙ୍କୁ କବାଟ ପାଖରେ ଠିଆ ନ ହୋଇ ବସ୍ ଭିତରକୁ ଯିବାକୁ କହିଥିଲେ। ଏତିକି କଥାରେ ରାଗିଯାଇ ହରିଶ ତାଙ୍କ ପକେଟରୁ ଏକ ଛୁରୀ ବାହାର କରି କଣ୍ଡକ୍ଟର ଉପରେ ଆକ୍ରମଣ ଆରମ୍ଭ କଲେ |

ଏହା ପରେ ବସ୍‌ରେ ଥିବା ଯାତ୍ରୀମାନଙ୍କ ମଧ୍ୟରେ ଆତଙ୍କ ଖେଳିଯାଇଥିଲା ଏବଂ ଯାତ୍ରୀମାନେ ଚିତ୍କାର କରିବା ସହ ବସ୍‌ରୁ ଡେଇଁପଡ଼ିବା ସହ ବସ୍ ଖାଲି ହୋଇଯାଇଥିଲା। ଯେତେବେଳେ ବସ୍‌ରେ ଯାତ୍ରା କରୁଥିବା କିଛି ଲୋକ ହରିଶଙ୍କୁ ଧରିବାକୁ ଚେଷ୍ଟା କରିଥିଲେ, ସେତେବେଳେ ସେ ସେମାନଙ୍କୁ ଛୁରୀରେ ଧମକ ମଧ୍ୟ ଦେଇଥିଲେ। ବସ୍ ଡ୍ରାଇଭର ଚତୁରତାର ସହ ଯୁବକକୁ ଭିତରେ ରଖି ବସ୍ ର କବାଟ ବନ୍ଦ କରି ପୁଲିସକୁ ସୂଚନା ଦେଇଥିଲେ। ବସ୍‌ରୁ ଓହ୍ଲାଇବା ପାଇଁ ହରିଶ ବସ୍‌ର ଝରକା ଓ କବାଟ ଭାଙ୍ଗିବା ଆରମ୍ଭ କରିଦେଲା। ସେ ଖସି ପଳାଇବା ପୂର୍ବରୁ ପୁଲିସ ସେଠାରେ ପହଞ୍ଚି ଅଭିଯୁକ୍ତ ହରିଶକୁ ଗିରଫ କରିଥିଲା।

 ଏହି ଘଟଣାରେ ଆହତ ହୋଇଥିବା କଣ୍ଡକ୍ଟର ଯୋଗେଶଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ବର୍ତ୍ତମାନ ସେଠାରେ ତାଙ୍କର ଚିକିତ୍ସା ଚାଲିଛି। ଏହି ସମୟରେ ହରିଶ ପୁଲିସକୁ କହିଥିଲେ ଯେ କିଛି ମାସ ପୂର୍ବରୁ ସେ ବେଙ୍ଗାଲୁରୁର ଟେଲିପର୍ମାନ୍ସ ନାମକ ଏକ ବିପିଓରେ କାମ କରୁଥିଲେ। କିନ୍ତୁ ତାଙ୍କୁ ସେଠାରୁ ବାହାର କରିଦିଆଯାଇଥିଲା। ଯେତେବେଳେ ସେ ଦୀର୍ଘମାସ ଧରି ଚାକିରି ପାଇଲେ ନାହିଁ, ସେତେବେଳେ ସେ ମାନସିକ ସ୍ତରରେ ବିବ୍ରତ ହୋଇ ଅନୁଭବ କଲେ ଯେ ଯଦି ସେ କୌଣସି ଅପରାଧ କରି ଜେଲ ଯିବେ, ତେବେ ସେ ଅନ୍ତତଃ ଖାଦ୍ୟ ତ ଖାଇବାକୁ ପାଇବେ। ପୁଲିସ ବର୍ତ୍ତମାନ ଏହି ଘଟଣାରେ ଅଧିକ ତଦନ୍ତ କରୁଛି |