ଭଦ୍ରକ ସୋସିଆଲ ମିଡିଆ ପୋଷ୍ଟ: ୯ ଅଭିଯୁକ୍ତ ଗିରଫ, ଛାନ୍‌ଭିନ୍‌ ଜାରି

ଭଦ୍ରକ: ସାମାଜିକ ଗଣମାଧ୍ୟମରେ ଏକ ପୋଷ୍ଟକୁ ନେଇ ଶୁକ୍ରବାର ଅପରାହ୍ନରେ ଭଦ୍ରକ ସହରର ସନ୍ଥିଆଠାରେ ଉପୁଜିଥିବା ତୁମୁଳକାଣ୍ଡ ଘଟଣାରେ ପୁଲିସ ଶନିବାର ୯ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏଥି ସହିତ ଏହି ଘଟଣାରେ ସଂପୃକ୍ତ ଅନ୍ୟ ଅଭିଯୁକ୍ତମାନଙ୍କୁ ବାନ୍ଧିବା ପାଇଁ ପୁଲିସ ଛାନଭିନ୍‌ ଜାରି ରଖିଛି। ଭଦ୍ରକ ସହରରେ ଶାନ୍ତି ଶୃଙ୍ଖଳା ରକ୍ଷା ପାଇଁ ପୁଲିସ ନଜର ରଖିତିବା ବେଳେ ସହରରେ ଫୋର୍ସ ମୁତୟନ କରିଛି। ଏଥି ସହିତ ସନ୍ଥିଆରେ ୧୬୩ ଧାରା ଲାଗୁ କରିଛି। ସହରରେ ୪୮ ଘଣ୍ଟା ପାଇଁ ଇଣ୍ଟରନେଟ୍‌ ସେବା ସ୍ଥଗିତ ରଖିଛି।   

ଆରକ୍ଷୀ ଅଧୀକ୍ଷକ କହିଛନ୍ତି, ସୋଶାଲ ମିଡିଆରେ ବିବାଦୀୟ ପୋଷ୍ଟ କରିଥିବା ଯୁବକ ଗିରଫ ହୋଇଛି। ବିବାଦୀୟ ପୋଷ୍ଟ ପାଇଁ କାଲି ଭଦ୍ରକରେ ଉତ୍ତେଜନା ଦେଖା ଦେଇଥିଲା ବୋଲି ସେ କହିଛନ୍ତି।

ଭଦ୍ରକରେ ଶାନ୍ତିଶୃଙ୍ଖଳା ବଜାୟ ରଖିବାକୁ ରାଜ୍ୟ ସରକାରଙ୍କ ମନ୍ତ୍ରୀ ସୂର୍ଯ୍ୟବଂଶୀ ସୂରଜ ସାଧାରଣ ଜନତାଙ୍କ ନିକଟରେ ଅପିଲ୍ କରିଛନ୍ତି। ସେ ଆଜି ଭଦ୍ରକ ଏସ୍‌ପି କାର୍ଯ୍ୟାଳୟରେ ଭଦ୍ରକ ସାଂସଦ, ବିଧାୟକ, ଡିଆଇଜିଙ୍କ ସହ ସ୍ଥିତି ଉପରେ ଆଲୋଚନା କରିଛନ୍ତି।