ଉଡ଼ିଲାନି ବିମାନ, ଆସିପାରିଲେନି ୬୨ ଯାତ୍ରୀଙ୍କ ସହିତ କେନ୍ଦ୍ରମନ୍ତ୍ରୀ

ରାଉରକେଲା: ଘରୋଇ ବିମାନ କଂପାନି ‘ଆଲିଆନ୍ସ ଏୟାର୍‌’ର ମନମାନି କମିବାର ନାଁ ନେଉନି। ନିୟମିତ ବ୍ୟବଧାନରେ ବିମାନସେବାକୁ ଅଘୋଷିତ ବାତିଲ କରାଯାଉଛି। କେତେବେଳେ ଯାନ୍ତ୍ରିକ ସମସ୍ୟା ଯୋଗୁଁ ବନ୍ଦ ହେଉଛି ତ ପୁଣି କେତେବେଳେ ଖରାପ ପାଣିପାଗ ଯୋଗୁଁ ସେବାକୁ ବାତିଲ କରାଯାଉଛି। ୨୦୨୩ ଜାନୁଆରି ୭ ତାରିଖରେ ବିମାନସେବା ଆରମ୍ଭ ହେବା ଦିନଠାରୁ ଏହି ଅବ୍ୟବସ୍ଥା ଲାଗିରହିଛି। ଶନିବାର ମଧ୍ୟ ଏହି ଅବ୍ୟବସ୍ଥା ଦେଖିବାକୁ ମିଳିଛି।

ବିମାନସେବା ବାତିଲ ହେବାରୁ କେନ୍ଦ୍ର ଆଦିବାସୀ କଲ୍ୟାଣ ମନ୍ତ୍ରୀ ଜୁଏଲ ଓରାମଙ୍କ ସମେତ ୬୨ ଜଣ ଯାତ୍ରୀ ରାଉରକେଲା ଆସିପାରିନାହାନ୍ତି। ସେହିଭଳି ରାଉରକେଲାରୁ ଭୁବନେଶ୍ବରକୁ ଯିବାକୁ ଟିକଟ୍‌ ସଂରକ୍ଷିତ କରିଥିବା ୬୮ ଜଣଯାତ୍ରୀଙ୍କୁ ମଧ୍ୟ ନିରାଶ ହେବାକୁ ପଡ଼ିଛି। ବିମାନ ରାଉରକେଲାରେ ଓହ୍ଲାଇ ଭୁବନେଶ୍ବରକୁ ଫେରିବା ବେଳକୁ ସନ୍ଧ୍ୟା ହେବାର ଆଶଙ୍କାଥିବାରୁ ବିମାନ ଅବତରଣ ଓ ଉଡ଼ାଣରେ ସମସ୍ୟା ଦେଖାଦେବା କାରଣ ଦର୍ଶାଇ ବାତିଲ କରାଯାଇଛି।