ସପ୍ତାହକୁ ୩ ଦିନ ଉଡ଼ିବନି ବିମାନ! ନିୟମିତ ବିମାନସେବା ଏଠି ସାତସପନ

ରାଉରକେଲା: ରାଉରକେଲାରେ ବିମାନସେବା ନିମ୍ନଗାମୀ ହେବାରେ ଲାଗିଛି। ଆଲିଆନ୍ସ ଏୟାର୍‌ର କ୍ରମାଗତ ଅବହେଳା ଯୋଗୁଁ, ବିମାନସେବା ଏବେ ପ୍ରହସନ ପାଲଟିଲାଣି। କେତେବେଳେ ଯାନ୍ତ୍ରିକ ତ୍ରୁଟି ପାଇଁ ସେବା ବନ୍ଦ ହେଉଛି ତ ପୁଣି କେତେବେଳେ ମରାମତି କାରଣ ଦର୍ଶାଇ ବନ୍ଦ କରିଦିଆଯାଉଛି। ଏବେ ବିମାନ ଅଭାବ ଯୋଗୁଁ ରାଉରକେଲା-ଭୁବନେଶ୍ବର ବିମାନ ଉଡ଼ାଣକୁ ୩ ଦିନ ବନ୍ଦ କରିଦିଆଯାଇଛି। ବର୍ତ୍ତମାନ ବିମାନ ରାଉରକେଲାରୁ ସପ୍ତାହକୁ କେବଳ ୪ ଦିନ, ସୋମବାର, ବୁଧବାର, ଶୁକ୍ରବାର ଓ ଶନିବାର ଉଡ଼ିବ। ଅନ୍ୟ ତିନି ଦିନ ମଙ୍ଗଳବାର, ଗୁରୁବାର, ଶନିବାର ସେବା ବନ୍ଦ ରହିବ। ଆସନ୍ତା ଡିସେମ୍ବର ୧୫ ତାରିଖ ଯାଏ ଏହି ଅବ୍ୟବସ୍ଥା ବଳବତ୍ତର ରହିବାନେଇ ସଦ୍ୟ ପ୍ରକାଶିତ ବିମାନଉଡ଼ାଣ ସୂଚୀରୁ ସ୍ପଷ୍ଟ ହୁଏ।ଆଲିଆନ୍ସ ଏୟାର୍‌ ପାଖରେ ପର୍ଯ୍ୟାପ୍ତସଂଖ୍ୟକ ବିମାନର ଅଭାବ ଯୋଗୁଁ ଏହି ସମସ୍ୟା ନିୟମିତ ବ୍ୟବଧାନରେ ଦେଖିବାକୁ ମିଳୁଛି।