ପରିବେଶ ଅନୁକୂଳ ବର୍ଜ୍ୟଜଳ ବିଶୋଧନ ବ୍ୟବସ୍ଥା ବିକଶିତ

ରାଉରକେଲା: ଗବେଷଣା କ୍ଷେତ୍ରରେ ପୁଣି ସଫଳତା ଦୋହରାଇଛି ସ୍ଥାନୀୟ ଜାତୀୟ ପ୍ରଯୁକ୍ତି ପ୍ରତିଷ୍ଠାନ(ଏନ୍‌ଆଇଟି)। ଅନୁଷ୍ଠାନର ଗବେଷକମାନେ ଉନ୍ନତ ହାଇବ୍ରିଡ୍ ବ୍ୟବସ୍ଥା ସହ ପରିବେଶ ଅନୁକୂଳ ବର୍ଜ୍ୟଜଳ ବିଶୋଧନ କରିବାକୁ ନୂଆ ବ୍ୟବସ୍ଥା ଆବିଷ୍କାର କରିଛନ୍ତି। କେମିକାଲ୍ ଇଞ୍ଜିନିୟରିଂ ବିଭାଗର ପ୍ରଫେସର ସୁଜିତ ସେନଙ୍କ ନେତୃତ୍ୱରେ ତଥା ଗବେଷକ ଡ. ମଧୁମିତା ମାନ୍ନା ଓ ଆଇଆଇଟି ଖଡ଼ଗପୁରର ପୂର୍ବତନ ପ୍ରାଧ୍ୟାପକ ପ୍ରଫେସର ବିନୟ କାନ୍ତି ଦତ୍ତଙ୍କୁ ନେଇ ଗଠିତ ଦଳକୁ ଏହି ସଫଳତା ମିଳିଛି। 

ଗବେଷକ ଦଳ ରଙ୍ଗ ଅପସାରଣ କ୍ଷମତା ବୃଦ୍ଧି କରିବା ପାଇଁ ମାଇକ୍ରୋବବଲ୍ ପ୍ରଯୁକ୍ତିବିଦ୍ୟା ସହିତ ନାନୋକମ୍ପୋଜିଟ୍ ଭିତ୍ତିକ ସିରାମିକ୍ ମେମ୍ବ୍ରେନ୍‌କୁ ପ୍ରଯୁକ୍ତିବିଦ୍ୟା ସହିତ ମିଶ୍ରଣ କରିଛନ୍ତି। ‘ଅନୁସନ୍ଧାନ ନ୍ୟାସନାଲ ରିସର୍ଚ୍ଚ ଫାଉଣ୍ଡେସନ’ ଦ୍ୱାରା ସମର୍ଥିତ ଏହି ଗବେଷଣା ସମ୍ମାନଜନକ ‘ଜର୍ଣ୍ଣାଲ ଅଫ୍ ଏନ୍‌ଭିରନ୍‌ମେଣ୍ଟାଲ୍ କେମିକାଲ ଇଞ୍ଜିନିୟରିଂ’ରେ ପ୍ରକାଶିତ ହୋଇଛି।