ବିଶାଳ ଗଛ ଉପାଡ଼ିଲା କାଳବୈଶାଖୀ: ଚାପି ହୋଇଗଲେ ଅଟୋଚାଳକ-ଯାତ୍ରୀ

ବଲାଙ୍ଗୀର: ଯାତ୍ରୀଙ୍କ ଯାତ୍ରା ସଂପୂର୍ଣ୍ଣ ହୋଇପାରି ନାହିଁ। ଅଟୋରେ ଯାଉଥିବା ବେଳେ ଯାତ୍ରୀ ଜଣକ ଏକ ଦୁଃଖଦ ଘଟଣାର ସାମ୍ନା କରିଛନ୍ତି। କାଳବୈଶାଖୀର ତାଣ୍ଡବ ଲୀଳାରେ ଜୀବନ ହାରିବାକୁ ପଡ଼ିଛି। ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକ ଅଧୀନ ଆଠଗାଁ ରାସ୍ତାର କଂସବାହାଲ ଛକରେ ଯାତ୍ରୀବାହୀ ଅଟୋ ଉପରେ ବିଶାଳକାୟ ନିମ୍ବ ଗଛ ପଡ଼ିଯିବାରୁ ୨ ଜଣଙ୍କର ମୃତୁୃ ଘଟିଛି। ମୃତ ଯାତ୍ରୀ ହେଲେ ନଦୀ ନନ୍ଦ। ଚାଳକଙ୍କର ପରିଚୟ ମିଳିପାରି ନାହିଁ। 

ସୂଚନା ଅନୁସାରେ ବଲାଙ୍ଗୀର ସହର ନିକଟ ଆଠଗାଁ ରାସ୍ତାର କଂସବାହାଲ ଦେଇ ତଣ୍ଡାମୁଣ୍ଡାର ନନ୍ଦୀ ନନ୍ଦଙ୍କୁ ନେଇ ଅଟୋ ଚାଳକ ଆଗକୁ ବଢୁଥିଲେ। ଅଟୋଟି କଂସବାହାଲ ନିକଟରେ ପହଞ୍ଚିବା ପୂର୍ବରୁ କାଳବୈଶାଖୀର ତାଣ୍ଡବ ଆରମ୍ଭ ହୋଇଯାଇଥିଲା। ଅଟୋରେ ଡ୍ରାଇଭର ଓ ଜଣେ ଯାତ୍ରୀ ଆସୁଥିବା ସମୟରେ ହଠାତ ଜୋରରେ ପବନ ବହିଥିଲା। ଏହି ସମୟରେ ରାସ୍ତାକଡ଼ରେ ଥିବା ଏକ ବଡ଼ ନିମ୍ବ ଗଛ ଉପୁଡ଼ି ଥିଲା। ନିମ୍ବଗଛଟି ଅଟୋ ଉପରେ ପଡ଼ିଥିଲା। ଫଳରେ ଅଟୋଟି ଚେପା ହୋଇଯାଇଥିଲା।

ଅଟୋ ଉପରେ ବିଶାଳକାୟ ନିମ୍ବ ଗଛ ପଡ଼ିଯିବା ପରେ ଏଥିରେ ଥିବା ନନ୍ଦ ନନ୍ଦୀ ଓ ଯାତ୍ରୀ ଚିତ୍କାର କରୁଥିଲେ। କାଳବୈଶାଖୀ ଶାନ୍ତ ପଡ଼ିଲା ପରେ ସ୍ଥାନୀୟ ଲୋକେ ଘଟଣା ସଂପର୍କରେ ପୁଇଁତଳା ପୁଲିସ ଓ ଅଗ୍ନିଶମ ବାହିନୀକୁ ସୂଚନା ଦେଇଥିଲେ।

ବଲାଙ୍ଗୀର ଉପକଣ୍ଠ ପୁଇଁତଳା ବ୍ଲକ ଅଧୀନ ଆଠଗାଁ ଅଞ୍ଚଳରେ ଆଜି ଅପରାହ୍‌ଣରେ କାଳବୈଶାଖୀ ହୋଇଥିଲା। କାଳବୈଶାଖୀ ଯୋଗୁଁ ଏହି ଅଞ୍ଚଳରେ ସାମାନ୍ୟ କିଛି ଲୋକଙ୍କର ଚାଳଛପର ଉଡ଼ାଇ ନେଇଛି।  

ଖବର ପାଇ ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଥିଲେ। ନିମ୍ବଗଛକୁ କାଟି ଅଟୋ ଭିତରୁ ନନ୍ଦଙ୍କ ସମେତ ୨ଟି ମୃତଦେହ ଉଦ୍ଧାର କରିଛନ୍ତି। ମୃତଦେହ ପୋଷ୍ଟମର୍ଟମ ପାଇଁ ପଠାଇଛନ୍ତି। ଅଟୋ ଚାଳକଙ୍କର ପରିଚୟ ମିଳିନାହିଁ। ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି। ଏହି ଅପ୍ରୀତିକର ଅଘଟଣ ପରେ ଦୀର୍ଘ ସମୟ ଧରି ଯାତାୟତ ପ୍ରଭାବିତ ହୋଇଛି। 

 Balangir