ଅସଲ ବିଜେତାଙ୍କ ହାତରେ ଓସ୍କାର୍ ଟ୍ରଫି

ଚଳିତବର୍ଷ ଶ୍ରେଷ୍ଠ କ୍ଷୁଦ୍ର ବୃତ୍ତଚିତ୍ର ଭାବେ ଓସ୍କାର ପୁରସ୍କାର ଲାଭ କରିଥିବା ‘ଦି ଏଲିଫେଣ୍ଟ ହ୍ବିସ୍‌ପରର୍ସ’ର ଦୁଇ ଭାରତୀୟ ତାରକା (ଏକଦା ଅନାମଧେୟ ଥିବା) ବୋମ୍ମନ ଓ ବେଲିଙ୍କ ପାଖରେ ସେହି ବିରଳ ଓସ୍କାର ଟ୍ରଫି ପହଞ୍ଚିଛି। ବୋମ୍ମନ ଓ ବେଲି ଓସ୍କାର ଟ୍ରଫି ଧରିଥିବାର ଦୃଶ୍ୟକୁ ନିର୍ଦ୍ଦେଶକ କାର୍ତ୍ତିକୀ ଗଞ୍ଜାଲ୍‌ବିସ ନିଜର ଇନ୍‌ଷ୍ଟାଗ୍ରାମ ପୃଷ୍ଠାରେ ଛାଡ଼ିଲା ପରେ ଅନୁଗାମୀମାନେ ଶ୍ରଦ୍ଧା ଓ ଶୁଭକାମନା ବରଷି ଚାଲିଛନ୍ତି। ତାହାକୁ ଛୁଇଁ ସେମାନଙ୍କ ମୁହଁରେ ଭାସି ଆସିଥିବା ନିଷ୍କପଟ ହସ ଏବେ ସଭିଙ୍କୁ ମୁଗ୍‌ଧ କରିଛି। ଟ୍ରଫିଟି ସେମାନଙ୍କ ହାତରେ ଶୋଭା ପାଇବା ପରେ ସିନେପ୍ରେମୀମାନେ ଉଭୟଙ୍କୁ ସେହି ଓସ୍କାର ପୁରସ୍କାରର ଅସଲ ବିଜେତା ବୋଲି କହୁଛନ୍ତି।