ତେଜୁଛି ଉତ୍ତର ଭୁବନେଶ୍ବର ଭସାଣି ରାଜନୀତି: ପ୍ରତି ମଣ୍ଡପକୁ ଲ‌େକ୍ଷ ଟଙ୍କା ଦେବେ ବିଧାୟକ

ଚନ୍ଦ୍ରଶେଖରପୁର: ମା’ ଦୁର୍ଗାଙ୍କ ଭସାଣି ଉତ୍ସବକୁ ନେଇ ଉତ୍ତର ଭୁବନେଶ୍ବରରେ ରାଜ‌ନୈତିକ ଉଷ୍ମତା ବଢ଼ିବାରେ ଲାଗିଛି। ବିଜେପି ନେତାମାନଙ୍କୁ ମଞ୍ଚରେ ବସାଇ ଉତ୍ତର ଭୁବନେଶ୍ବର ଭସାଣି ସମିତି ବୈଠକ କରିବାର ଗୋଟିଏ ଦିନ ପରେ ଉତ୍ତର ଭୁବନେଶ୍ବର ଭସାଣି କମିଟି ଆଜି ବିଜେଡି ନେତାମାନଙ୍କୁ ଏକାଠି କରି ଶକ୍ତି ପ୍ରଦର୍ଶନ କରିଛି। ପଟିଆସ୍ଥିତ ଏକ ହୋଟେଲରେ ଅନୁଷ୍ଠିତ ବୈଠକରେ ସ୍ଥାନୀୟ ବିଜେଡି ବିଧାୟକ ସୁଶାନ୍ତ କୁମାର ରାଉତ ଯୋଗଦେଇ ସମସ୍ତେ ଏକାଠି ହୋଇ ଭସାଣି ଉତ୍ସବକୁ ସରସ ସୁନ୍ଦର କରିବାକୁ ଆହ୍ବାନ ଦେଇଥିଲେ। ଶ୍ରୀ ରାଉତ କହିଛନ୍ତି, ଉତ୍ତର ଭୁବନେଶ୍ବର ହେଉଛି ଭାଇଚାରାର ନିର୍ବାଚନମଣ୍ଡଳୀ। ରାଜନୈତିକ ଦଳ ଓ ଧର୍ମ ନିର୍ବିଶେଷରେ ସମସ୍ତେ ଏକତ୍ର ହୋଇ ମା’ଙ୍କ ଆରାଧନା କରିଥାନ୍ତି। ବହୁ ବର୍ଷ ଧରି ଚାଲି ଆସିଥିବା ଏହି ପରମ୍ପରାକୁ ବଜାୟ ରଖିବାକୁ ପଡ଼ିବ। ପୂଜାମଣ୍ଡପଗୁଡ଼ିକ କିଭଳି ଆକର୍ଷଣୀୟ ହୋଇପାରିବ ସେଥିପାଇଁ ପ୍ରତି ପୂଜାମଣ୍ଡପକୁ ଏ ବର୍ଷ ବିଧାୟକ ପାଣ୍ଠିରୁ ଏକ ଲକ୍ଷ ଟଙ୍କା ଲେଖାଏ ସହାୟତା ଦିଆଯିବ ବୋଲି ସେ ଘୋ‌ଷଣା କରିଥିଲେ।

ସୂଚନାଯୋଗ୍ୟ ଯେ ଦୁଇଦିନ ତଳେ ବିଜେପି ପକ୍ଷରୁ ବିଭିନ୍ନ ପୂଜା କମିଟିକୁ ନେଇ ଭସାଣି ପାଇଁ ପ୍ରସ୍ତୁତି ବୈଠକ ହୋଇଥିଲା। ଏଥିରେ ସାଂସଦଙ୍କ ତରଫରୁ ପୂଜା କମିଟିଗୁଡ଼ିକୁ ଏକ ଲକ୍ଷ ଟଙ୍କା ଲେଖାଏଁ ପ୍ରଦାନ କରାଯିବ ବୋଲି ଘୋଷଣା କରାଯାଇଥିଲା। ତେଣୁ ବିଭିନ୍ନ ପୂଜା କମିଟିକୁ ନିଜ ସପକ୍ଷରେ ନେବା ପାଇଁ ବିଜେଡି-ବିଜେପି ମଧ୍ୟରେ ଚାଲିଥିବା ଟଣାଓଟରା ଭସାଣି ପ୍ରସ୍ତୁତି ବୈଠକ ପରେ ରୋଚକ ସ୍ଥିତିରେ ପହଞ୍ଚିଛି।