ପୁଲିସ ଡାଏରି: କଳ୍ପନା ଫ୍ଲାଟ୍ ଡବଲ୍‌ ମର୍ଡର; ୨୦ବର୍ଷ ପରେ ବି ଖୋଲିଲାନି ରହସ୍ୟ

ଗୋଟିଏ ଗୋଟିଏ ଘଟଣା ଦଶନ୍ଧି ପରେ ମଧ୍ୟ ମନରୁ ଲିଭେନା। ବିଶେଷ କରି ଯେତେବେଳେ  ଅପରାଧୀଙ୍କୁ ଠିକଣା ଜବାବ ଦେବା ପାଇଁ ଜଣେ ପୁଲିସ ଅଫିସର, ସବୁକିଛି ବାଜିରେ ଲଗାଇ ଦେଇଥା’ନ୍ତି, ତାହା  ସେହି ପୁଲିସ ଅଫିସରଙ୍କ ମନରେ ସବୁଦିନ ପାଇଁ ରେଖାଙ୍କିତ ହୋଇ ରହିଯାଇଥାଏ। ଏହିପରି  ପୁଲିସ ଅଧିକାରୀମାନଙ୍କ ଜୀବନରେ ଘଟିଥିବା ଲୋମହର୍ଷକ ଘଟଣାକୁ ନେଇ ଏଥର ଅବସରପ୍ରାପ୍ତ ପୁଲିସ ଅଧିକାରୀ ହରିହର ପାଣିଙ୍କ ଅନୁଭୂତି ଓ ଅନୁଭବକୁ ନେଇ ‘ସମ୍ବାଦ’ର ସ୍ବତନ୍ତ୍ର ଉପସ୍ଥାପନା।

୨୦୦୫ ମସିହା ଅଗଷ୍ଟ ୧୨ ତାରିଖ। ସକାଳୁ ସକାଳୁ ରାଜଧାନୀରେ ଚାଞ୍ଚଲ୍ୟ ଖେଳିଗଲା। କଳ୍ପନା ଫ୍ଲାଟ୍‌ରେ ଡବଲ୍‌ ମର୍ଡର ହେଇଛି। ଦୁଇ ତିନି ଦିନ ପୂର୍ବରୁ  ଉତ୍କଳ ସଂଗୀତ ମହାବିଦ୍ୟାଳୟ ସିତାର ବିଭାଗର ଅଧ୍ୟାପକ ବିଜୟ କୁମାର ତ୍ରିପାଠୀ ଓ ତାଙ୍କ ପତ୍ନୀ ଲିନା ତ୍ରିପାଠୀଙ୍କ ତଣ୍ଟିକାଟି କେହି  ଦୁର୍ବୃତ୍ତ ବୀଭତ୍ସ ଭାବେ ହତ୍ୟା କରିଛି। ସେତେବେଳେ ବୋଧହୁଏ ରାଜଧାନୀ ପାଇଁ ଏହା ଥିଲା ପ୍ରଥମ ହାଇପ୍ରୋଫାଇଲ୍ ମର୍ଡର। ତେଣୁ ସେଦିନ କଳ୍ପନା ଛକରୁ ବଡ଼ଗଡ଼ ପର୍ଯ୍ୟନ୍ତ ହଜାର ହଜାର ଲୋକଙ୍କ ଭିଡ଼ ହୋଇଥିଲା। ହତ୍ୟାକାରୀ କିଏ? ହତ୍ୟାର କାରଣ କ’ଣ? ସମସ୍ତଙ୍କ ମୁହଁରେ ଥିଲା ଏହି ଦୁଇଟି ପ୍ରଶ୍ନ। ତତ୍କାଳୀନ ଏସ୍‌ପି ଅମିତାଭ ଠାକୁର ନିଜେ ଉପସ୍ଥିତ ରହି ଲକ୍ଷ୍ମୀସାଗର ଥାନା ପୁଲିସର ତଦନ୍ତ ତଦାରଖ କଲେ। ଏହି ସମୟରେ ମୋତେ ଲକ୍ଷ୍ମୀସାଗର ଥାନାରେ ଆଇଆଇସି ଭାବେ ନିଯୁକ୍ତି ମିଳିଲା ଏବଂ ତଦନ୍ତ ଭାର ମୋ ହାତକୁ ଆସିଲା। ହାଇପ୍ରୋଫାଇଲ୍‌ ଡବଲ୍‌ ମର୍ଡର ପୁଣି ରହସ୍ୟମୟ। ହତ୍ୟାକାରୀକୁ ଠାବ କରିବା ଥିଲା ବଡ଼ ଆହ୍ବାନ। ମୁଖ୍ୟ କଥା ହେଉଛି, ଘଟଣାସ୍ଥଳରେ ହତ୍ୟାକାରୀ କିଛି ବି ସୁରାକ୍ ଛାଡ଼ିନଥିଲା। ଅଧ୍ୟାପକ ବିଜୟଙ୍କ ମୋବାଇଲ ଫୋନ୍‌ ନଥିଲା ଏବଂ ଘରୁ କିଛି ଲୁଟ୍‌ପାଟ୍‌ ହେବା ଭଳି ଜଣାପଡ଼ୁନଥିଲା।