ରାଜଧାନୀ ଉପକଣ୍ଠରେ ବୁଲୁଛି ରାମୁ

ମେଣ୍ଢାଶାଳ: ଭରତପୁର ସଂରକ୍ଷିତ ଜଙ୍ଗଲରେ ରହୁଥିବା ଦନ୍ତା ହାତୀ ରାମୁ ଏବେ ଜନବସତି ମୁହାଁ ହୋଇଛି। ଗତ କିଛି ଦିନ ହେଲା ସେ ସାଙ୍ଗରେ ଅନ୍ୟ ଏକ ଦନ୍ତାକୁ ଧରି ରାତିରେ ଜଙ୍ଗଲରୁ ବାହାରି ନିକଟସ୍ଥ ଭରତପୁର ଓ ଜିଏ କଲୋନି ଅଞ୍ଚଳରେ ବୁଲୁଛି। ବନ କର୍ମଚାରୀମାନେ ସେମାନଙ୍କୁ ଜଗି ରହୁଥିଲେ ମଧ୍ୟ ବିଳମ୍ବିତ ରାତିରେ ବାହାରି ସେମାନେ ପୁଣି ଭୋର୍‌ ସମୟରେ ଫେରି ଯାଉଛନ୍ତି। ଲୋକଙ୍କ ବାଡ଼ିବଗିଚାରୁ ଗଛଡାଳ ଓ ଅନ୍ୟାନ୍ୟ ପରିବାପତ୍ର ଖାଇ ସେମାନେ ଫେରିଯାଉଛନ୍ତି।
ବହୁ ଦିନ ଧରି ଭରତପୁର ସଂରକ୍ଷିତ ଜଙ୍ଗଲରେ ୧୭ଟି ହାତୀ ଅଛନ୍ତି। ଏହି ହାତୀ ପଲରେ ୨ ଟି ଦନ୍ତାହାତୀ ଅଛନ୍ତି। ତା’ ଭିତରେ ଚନ୍ଦକା-ଡମପଡ଼ା ଅଭୟାରଣ୍ୟର ବିଶାଳ ଦନ୍ତା ରାମୁ ଅଛି। ହାତୀ ପଲ ଜଙ୍ଗଲ ବାହାରକୁ ଆସୁନଥିବା ବେଳେ ଦନ୍ତା ରାମୁ ଓ ତା’ ସାଥୀ ଅନ୍ଧା‌ରୁଆ ମାଳିମ ଠାକୁରାଣୀ ମନ୍ଦିର ଛକ ଦେଇ ଅନ୍ଧାରୁଆ, ମଳିପଡ଼ା, ଦାସପୁର ଓ ଭରତପୁରରେ ବୁଲୁଛନ୍ତି। ଫଳରେ ଲୋକଙ୍କ ଭିତରେ ହାତୀ ଆତଙ୍କ ଖେଳିଯାଇଛି। ଗତ କିଛି ଦିନ ଧରି ରାମୁ ଖୋର୍ଦ୍ଧା ରତନପୁର ଜଙ୍ଗଲକୁ ଚାଲି ଯାଇଥିଲା। ଏବେ ସେ ଅରିଶଲ, ମଦନପୁର ଓ ଦେଉଳିଆପାଟଣା ଦେଇ ଭରତପୁର ଜଙ୍ଗଲକୁ ଫେରିଛି। ଗତକାଲି ସନ୍ଧ୍ୟାରେ ରାମୁ ଏକାକୀ ମେଣ୍ଢାଶାଳ ଗିରିଙ୍ଗାପୁଟ ଆଦିବାସୀ ସାହିରେ ପଶି ବ୍ୟାପକ କଦଳୀ ଗଛ, ଅମୃତ ଭଣ୍ଡା ଗଛ ଭାଙ୍ଗି ନଷ୍ଟ କରିଥିଲା। ପରେ କଣ୍ଟାବାଡ଼ ଆଦୃତା ଆଶ୍ରମ ଦେଇ ଭରତପୁର ଫେରିଥିଲା।